ក្នុងស្ថានភាពដែលកំពុងជាប់ដៃ ក្នុងការប្រយុទ្ធប្រឆាំងនឹងជំងឺកូវីដ-១៩ រដ្ឋបាលខេត្តសៀមរាប បានទទួលអំណោយជាគ្រឿងឧបភោគបរិភោគ សម្ភារ:ប្រើប្រាស់ និងថវិកា ពីសប្បុរសជន សម្រាប់ផ្គត់ផ្គង់ជីវភាពបងប្អូនប្រជាពលរដ្ឋក្នុងតំបន់បិទខ្ទប់( តំបន់ក្រហម) ។ ជាមួយនោះ មន្ទីរដែនដីនគរួបនីយកម្ម និងសំណង និងសាខាពន្ធដារខេត្តសៀមរាប បានផ្ដល់អំណោយជាអង្ករចំនួន ១០តោន ដើមី្បចូលរួមជាមួយរាជរដ្ឋាភិបាល ក៏ដូចជារដ្ឋបាលខេត្តសៀមរាប ដើម្បីធ្វើការចែកជូនដល់បងប្អូនប្រជាពលរដ្ឋខ្វះខាតផ្នែកជីវភាពប្រចាំថ្ងៃ ក្នុងវិបត្តិជំងឺកូវីដ-១៩។ ពិធីប្រគល់នោះ ក្រោមអធិបតីភាពឯកឧត្តម ទៀ សីហា អភិបាល នៃគណ:អភិបាលខេត្ត និងមន្ត្រីពាក់ព័ន្ធជាច្រើននាក់ នាព្រឹកថ្ងៃទី២៨ ខែកញ្ញា ឆ្នាំ២០២១។
ឯកឧត្តម ទៀ សីហា អភិបាលខេត្តសៀមរាប បានថ្លែងអំណរគុណដល់ថ្នាក់ដឹកនាំ និងមន្ត្រីរាជការ នៃមន្ទីរដែនដីនគរួបនីយកម្ម និងសំណង និងសាខាពន្ធដារខេត្តសៀមរាប ដែលបានផ្តល់ជូននូវអង្ករ ១០តោន សម្រាប់ប្រើប្រាស់ដល់យុទ្ធនាការណ៍ប្រយុទ្ធប្រឆាំងបង្ការ ទប់ស្កាត់ជំងឺកូវីដ-១៩ ដែលអាជ្ញាធរយើងកំពុងតែជួបប្រទះនាពេលនេះ ហើយអ្វីដែលសំខាន់នោះ គឺសម្រាប់យកទៅផ្តល់ជូនប្រជាពលរដ្ឋ នៅតាមមូលដ្ឋាន ភូមិ សង្កាត់ ដែលត្រូវបានបិទខ្ទប់ ដែលកំណត់ជាតំបន់ក្រហមកំពុងជួបការខ្វះខាតស្បៀងអាហារ។ ឯកឧត្តម បានបន្តថា ក្នុងព្រឹត្តការណ៍សហគមន៍ ២០កុម្ភ: ២០២១នេះ អាជ្ញាធរខេត្តបានពង្រីកបន្ថែមនូវមណ្ឌលចត្តាឡីស័ក ជាច្រើនកន្លែង ក្នុងការទទួលបងប្អូនធ្វើចំណាកស្រុកមកពីក្រៅប្រទេស និងទីកន្លែងសម្រាប់ធ្វើការព្យាបាល អ្នកវិជ្ជមានជំងឺកូវីដ-១៩ ព្រមទាំងបានបន្តការបិទខ្ទប់ កំណត់តំបន់ក្រហម និង លឿងទុំ នៅមូលដ្ឋានភូមិ សង្កាត់មួយចំនួន ក្នុងក្រុងសៀមរាប និងភូមិ ឃុំតាមបណ្តាស្រុកមួយចំនួនកន្លងមក ក្នុងគោលបំណងកាត់ផ្តាច់ការឆ្លងរាលដាលជំងឺកូវីដ-១៩ នៅតាមសហគមន៍។ ឯកឧត្តម ក៏បានសំណូមពរ ដល់ក្រុមហ៊ុន ក៏ដូចសប្បុរសជន យើងបន្តនូវប្រពៃណីវប្បធម៌ចែករំលែកនេះ ទៅតាមបណ្តាក្រុង ស្រុកនានាទៀត ដើម្បីមានលទ្ធភាពចែកជូនដល់ប្រជាពលរដ្ឋ។ ចំពោះអំណោយអង្ករ ១០តោននេះ រដ្ឋបាលខេត្ត នឹងធ្វើការបែងចែកជូនទៅអាជ្ញាធរក្រុង ស្រុក ដើម្បីចែកជូនដល់បងប្អូនជាគ្រូសារក្រ១,ក្រ២ នៅក្នុងមូលដ្ឋានខ្លួន ដោយមិនប្រកាន់បក្ខពួក ឬនិន្នាការនយោបាយឡើយ ។
ឯកឧត្តម ក៏បានលើកផងដែរថា ក្នុងរយ:ពេលយើងបិទខ្ទប់ នៅតំបន់ក្រហមនោះ ត្រូវបានរដ្ឋបាលខេត្ត ធ្វើការផ្តល់ស្បៀងជូនដល់បងប្អូនប្រជាពលរដ្ឋក្រ១ ក្រ២ តាមរយ:អាជ្ញាធរមូលដ្ឋានយកទៅផ្តល់ជូននៅតាមលំនៅដ្ឋានផ្ទាល់ៗ។ ចំពោះប្រជាពលរដ្ឋ ប្រភេទក្រ១ , ក្រ២ ដែលនៅទូទាំងក្រុងសៀមរាប មានប្រមាណ ៧ពាន់គ្រួសារ ដែលត្រូវចែកជូនជាបន្តបន្ទាប់ផងដែរ ។ ឯកឧត្តមអភិបាលខេត្ត ក៏បានអំពាវនាវដល់បងប្អូនប្រជាពលរដ្ឋក្នុងខេត្តសៀមរាប សូមចូលរួមជាមួយអាជ្ញាធរគ្រប់លំដាប់ថ្នាក់ ក្នុងការអនុវត្តវិធានការឲ្យមានប្រសិទ្ធភាពខ្ពស់ ដើម្បីកាត់ផ្តាច់ការចម្លងមេរោគដ៏កាចសាហាវនេះ កុំឲ្យរីករាលដាលចូលក្នុងសហគមន៍ ដល់គ្រួសារ ញាតិមិត្តរបស់ខ្លួន ដែលធ្វើឲ្យយើងបាត់បង់នូវពេលវេលា ក្នុងកិច្ចការប្រកបរបរចិញ្ចឹមជីវិត។ សូមបងប្អូនអនុវត្តឲ្យបានខ្ជាប់ខ្ជួននៅវិធានការរបស់រាជរដ្ឋាភិបាល ៣ការពារ, ៣កុំ និងសេចក្តីណែនាំរបស់ក្រសួងសុខាភិបាល ៕
អត្ថបទនិងរូបភាព: លោកស៊ាន សុផាត
កែសម្រួលដោយ លីវ សុខុន!!!
