នៅព្រឹកថ្ងៃទី២៩ ខែកញ្ញា ឆ្នាំ២០២១នេះ អាជ្ញាធរសង្កាត់ជ្រាវ ក្រុងសៀមរាប បានប្រគល់សម្លៀកបំពាក់ឯកសណ្ឋានប្រជាការពារភូមិចំនួន៦០សម្រាប់ ជូនបងប្អូនប្រជាការពារភូមិខ្នារ សម្រាប់ប្រើប្រាស់បម្រើការងារប្រចាំថ្ងៃ ជាពិសេសសម្រាប់ការងារបិទខ្ទប់តំបន់ហានីភ័យនៃការឆ្លងរាលដាលជំងឺកូវីដ-១៩ នេះ។
លោកគង់ ប៊ឹប ចៅសង្កាត់រងទី១ សង្កាត់ជ្រាវ បានឱ្យដឹងថា សម្លៀកបំពាក់ជាឯកសណ្ឋានប្រជាការពារទាំងអស់នេះ បានមកពីការចូលរួមរបស់សប្បុរសជនតាមរយៈលោកផ្ទាល់ ហើយក្រៅពីការប្រគល់ជូនប្រជាការពារនៅក្នុងភូមិខ្នារនេះ លោកនឹងនាំយកសម្លៀកបំពាក់ជាឯកសណ្ឋានប្រជាការពារ ទៅចែកជូនដល់បងប្អូនប្រជាការពារតាមបណ្ដាភូមិផ្សេងៗទៀត ឲ្យបានគ្រប់គ្នានៅក្នុងសង្កាត់ជ្រាវ ដែលមានចំនួន២០០នាក់។
លោកបានបញ្ជាក់ទៀតថា ដោយមើលឃើញការលំបាករបស់បងប្អូនប្រជាការពារ ដែលរយៈកាលកន្លងមក មានសម្លៀកបំពាក់ត្រឹមតែមួយសម្រាប់ ហើយមិនមានសម្លៀកបំពាក់ក្នុងការផ្លាស់ប្ដូរយាមកាមតាមគោលដៅដែលបានកំណត់ដោយអាជ្ញាធរសង្កាត់ជ្រាវ ក្នុងតំបន់បិទខ្ទប់ ទើបលោកព្យាយាមគៀងគរពីសប្បុរសជនផ្សេងៗ ដើម្បីបានបន្ថែមជូនដល់ពួកគាត់។ លោកក៏បានសំណូមពរឱ្យបងប្អូនប្រជាការពារបន្តចូលរួមថែរក្សាសុខភាព ដើម្បីចូលរួមការពារតំបន់បិទខ្ទប់ នៅក្នុងសង្កាត់ជ្រាវ ដែលអាជ្ញាធរខេត្តក្រុងបានកំណត់ជាតំបន់ក្រហម ជាពិសេសសុំឱ្យពលរដ្ឋចូលរួមអនុវត្តវិធានការនានារបស់ក្រសួងសុខាភិបាល ពិសេសវិធានការរបស់រាជរដ្ឋាភិបាល គឺ៣កុំ ៣ការពារ ឲ្យបានជាប់ជានិច្ច ដើម្បីកាត់ផ្ដាច់ការឆ្លងរាលដាលជំងឺកូវីដ-១៩៕
អត្ថបទ និងរូបភាព ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
