នៅរសៀលថ្ងៃទី០៧ ខែតុលា ឆ្នាំ២០២១ ព្រះគ្រូវិចិត្រវង្សា ហែម គឹមសាន ព្រះចៅអធិការវត្តប្រាសាទគោកចក ក្រុងសៀមរាប បានរៀបចំជាទេយ្យទានមួយចំនួន ប្រគេនព្រះសង្ឃចំនួន ៣៦អង្គ ក្នុងមួយអង្គទទួលមាន៖ ភេសជ្ជមួយចំនួន បច្ច័យ១០ម៉ឺនរៀល ,គណៈកម្មការលោកអាចារ្យ ៥នាក់ ម្នាក់ៗទទួលបាន៖ ភេសជ្ជៈ១០កំប៉ុង និងថវិកាមួយចំនួន និងប្រជាការពារភូមិចំនួន ១៧នាក់ ក្នុងម្នាក់ទទួលបាន៖ អង្ករ ២០គីឡូក្រាម, មី ១០កញ្ចប់, ត្រីខ៥កំប៉ុង និងបច្ច័យ ៥ម៉ឺនរៀល សម្រាប់ដោះស្រាយជីវភាពប្រចាំថ្ងៃ។
ព្រះគ្រូវិចិត្រវង្សា ហែម គឹមសាន មានសង្ឃដីកាថា ចំពោះទេយ្យទាន និងអំណោយដែលប្រគេនដល់ព្រះសង្ឃ គណៈកម្មការលោកអាចារ្យ និងជូនដល់ប្រជាការពារនាពេលនេះ គឺទទួលបានពីការចូលរួមបរិច្ចាករបស់សប្បុរសជន និងប្រជាពុទ្ឋបរិស័ទជិតឆ្ងាយ នៅរយៈពេលបុណ្យភ្ជុំបិណ្ឌកន្លងទៅ និងបានធ្វើការគៀងគរពីសប្បុរសជននារយៈកាលកន្លងមក។ ជាមួយនោះដោយពិនិត្យឃើញពីការសហការ និងឆន្ទៈនៃការយកព្រះទ័យ និងយកចិត្តទុកដាក់ របស់ព្រះសង្ឃក្នុងការបដិបត្តិធម៌វិន័យបានល្អ ការចាត់ចែង និងជួយរំលែកការងាររបស់គណៈកម្មការវត្ត និងឃើញពីឆន្ទៈ ក្នុងការចូលរួមការពារសុវត្ថិភាពក្នុងមូលដ្ឋាន និងទទួលការពឹងអាស្រ័យពីព្រះសង្ឃរបស់ប្រជាការពារមួយចំនួន ចៅអធិការ និងគណៈកម្មការវត្តក៍កំណត់យកចំនួនតែ ១៧នាក់ ផ្តល់ជូនទេយ្យទានទៅតាមលទ្ឋភាពដែលព្រះអង្គមាន។
ព្រះគ្រូវិចិត្រវង្សា ហែម គឹមសាន មានសង្ឃដីកាទឿតថា ក្រៅពីការងារប្រកបរបរចិញ្ចឹមគ្រួសារ ប្រជាការពារក្នុងមូលដ្ឋាននេះ សុទ្ឋតែមានឆន្ទៈលះបង់ពេលវេលា ជួយការពារសន្តិសុខ សណ្តាប់ធ្នាប់ សុវត្ថិភាពជូនដល់ប្រជាជនក្នុងភូមិឃុំរបស់ពួកគាត់។ ក្រៅពីបុណ្យកាន់បិណ្ឌ និងភ្ជុំបិណ្យ ពួកគាត់ក៍សហការរួមសាមគ្គី សហការជួយទុក្ខធុរៈគ្នាទៅវិញទៅមក រួមចំណែក ការពារសន្តិសុខសណ្តាប់ធ្នាប់ក្នុងមូលដ្ឋានជាប្រចាំ ដោយគោរពតាមគោលការណ៍ភូមិឃុំមានសុវត្ថិភាពទាំង ១០ចំណុច របស់ក្រសួងមហាផ្ទៃជា ពិសេសចូលរួមជួយការពារក្នុងពិធីបុណ្យផ្សេងៗ នៅតាមវត្តអារាមក្បែរៗមូលដ្ឋានឱ្យមានសុវត្ថិភាពផងដែរ។ ព្រះអង្គក៏បានផ្តាំផ្ញើ សូមឱ្យចូលរួមទាំងអស់អង្គទាំងអស់គ្នា ដើម្បីរួមគ្នាទប់ស្កាត់ការឆ្លងរាលដាលជំងឺកូវីដ-១៩ នៅក្នុងសហមន៍របស់យើង ត្រូវចូលរួមអនុវត្តឲ្យបានជាប់ជាប្រចាំ តាមសេចក្តីណែនាំរបស់រដ្ឋបាលខេត្ត វិធានការនានារបស់ក្រសួងសុខាភិបាល និងវិធានការរបស់រាជរដ្ឋាភិបាល ៣កុំ និង៣ការពារ ឲ្យបានខ្ជាប់ខ្ជួន៕
ព័ត៌មានជាតិ ថ្មីៗ
អត្ថបទ និងរូបភាព ៖ លោក យូ វង្ស
