វិបត្តិជំងឺកូវីដ-១៩ បង្កឲ្យប៉ះពាល់ដល់ជីវភាពប្រជាពលរដ្ឋយ៉ាងខ្លាំង ពេញប្រទេសកម្ពុជា និងពិភពលោក ក្នុងរយ:ពេលជិតពីរឆ្នាំមកនេះ។ ទន្ទឹមនឹងនេះ រាជរដ្ឋាភិបាលក៏ដូចជាអាជ្ញាធរដែនដីគ្រប់លំដាប់ថ្នាក់ និងសប្បុរសជនបានខិតខំដោះស្រាយបញ្ហាទាំងនោះយ៉ាងសកម្មបំផុត។ តួយ៉ាងថ្ងៃនេះ ព្រះចៅអធិការវត្តអារញ្ញាសាគរ សង្កាត់សៀមរាប ក្រុងសៀមរាប ខេត្តសៀមរាប សហការជាមួយអាជ្ញាធរមូលដ្ឋាន បាននាំយកគ្រឿងឧបភោគបរិភោគ និងថវិកា ទៅផ្តល់ជូនប្រជាពលរដ្ឋ ដែលមានជីវភាពខ្វះខាតចំនួន ២៣គ្រួសារ នៅភូមិអារញ្ញសង្កាត់សៀមរាប ដែលពួកគាត់រស់នៅ និងអាស្រ័យផលលើផ្ទៃទឹក ក្នុងភូមិសាស្ត្រក្បែរបឹងទន្លេសាប នារសៀលថ្ងៃទី១០ ខែតុលា ឆ្នាំ២០២១នេះ ដោយសារជួបវិបត្តិ នៃជំងឺកូវីដ-១៩ គ្រួសារពួកគាត់បាត់បង់មុខរបរបណ្តាលឱ្យជួបការលំបាកលើជីវភាពប្រចាំថ្ងៃ។
ព្រះវិភត្តិមុនីញាណ ហ៊ាក់ គឹមហ៊ត់ វិសារទោ ព្រះរាជាគណ:ថ្នាក់កិត្តិយស ជាព្រះចៅអធិការវត្តអារញ្ញសាគរ ក្នុងក្រុងសៀមរាប ព្រះអង្គមានសង្ឃដីកាថា គ្រឿងឧបភោគបរិភោគ និងថវិកាទាំងនេះ ជាអំណោយផ្ទាល់របស់លោក សោម សមស័ក្ត នាយកទីចាត់ការហិរញ្ញវត្ថុ នៃសាលាខេត្តសៀមរាប និងភរិយា បានប្រគេនសម្រាប់វត្តនូវអង្ករចំនួន ១តោន និងថវិកាចំនួន ២លានរៀល តែដោយមើលឃើញពីភាពខ្វះខាតជាក់ស្តែងរបស់បងប្អូនប្រជាពលរដ្ឋទាំង ២៣គ្រួសារនេះ ព្រះសង្ឃក៏បានពិភាក្សាជាមួយគណ:កម្មការវត្តធ្វើការបែងចែក និងទិញគ្រឿងឧបភោគបរិភោគយកមកចែកជូននាពេលនេះ។
ព្រះអង្គបានអំពាវនាវឱ្យបងប្អូនប្រជាពលរដ្ឋ យកចិត្តទុកដាក់ថែរក្សាសុខភាព និងត្រូវស្តាប់តាមការណែនាំរបស់អាជ្ញាធរមូលដ្ឋាន ព្រមទាំងប្រុងប្រយ័ត្នឱ្យបានខ្ជាប់ខ្ជួននូវវិធីសាស្ត្រ បង្ការ និងការពារ តាមសេចក្តីណែនាំ របស់ក្រសួងសុខាភិបាល ក៏ដូចជាវិធានការ ៣ការពារ និង៣កុំរបស់រាជរដ្ឋាភិបាល គឺ “៣ការពារ និង៣កុំ។ បើញាតិញោមណាមានអាការ:មិនស្រួលខ្លួន ឬសង្ស័យពីសុខភាព សូមប្រញ៉ាប់ទាក់ទងទៅអាជ្ញាធរមូលដ្ឋាន ដែលនៅជិតបំផុត បន្ថែមពីនេះសូមបងប្អូនចូលរួមថែរក្សាបរិស្ថាន កុំបោះចោលសម្រាម ឬកាកសំណល់មានជ័រផ្លាស្ទីកជាដើម ចូលទៅក្នុងទឹកបឹង។ ព្រះវិភត្តិមុនីញាណ ហ៊ាក់ គឹមហ៊ត់ បានថ្លែង អំណរគុណដល់លោក សោម សមស័ក្ត និងភរិយា ព្រមទាំងក្រុមគ្រួសារ ដែលបានយកចិត្តទុកដាក់ដល់ព្រះសង្ឃ ជានិច្ចកាលតែងតែនាំយកនូវទេយ្យវត្ថុ និងគ្រឿងឧបភោគបរិភោគ ជាបន្តបន្ទាប់យកមកប្រគេនដល់ព្រះសង្ឃនៅវត្តអារញ្ញសាគរនេះ។
សូមបញ្ជាក់ថា ប្រជាពលរដ្ឋទាំង ២៣គ្រួសារ ដោយក្នុងមួយគ្រួសារៗទទួលបាន ៖ អង្ករ ៣០គ.ក្រ, មី ១កេស, ទឹកត្រី ១យួរ, ទឹកស៊ីអ៊ីវ ១យួរ, ទឹកសុទ្ឋ ១យួរ, ត្រីខ ១យួរ និងថវិកា ១ម៉ឺនរៀល៕
អត្ថបទ និងរូបភាព៖ លោក យូ វង្ស
កែសម្រួល៖ លោក លីវ សុខុន
