អាជ្ញាធរខេត្ដសៀមរាប ប្រកាសបើកយុទ្ធនាការចាក់វ៉ាក់សាំងការពារជំងឺកូវីដ-១៩ ដូសទី២ ជូនដល់ប្រជាពលរដ្ឋមានអាយុចាប់ពី ៦ឆ្នាំ ដល់ក្រោម ១២ឆ្នាំ នៅតាមបណ្ដាស្រុកទាំង១១ នៃខេត្ដសៀមរាប ចាប់ពីថ្ងៃទី១២ ខែតុលានេះតទៅ។
យោងតាមសេចក្ដីជូនដំណឹង របស់រដ្ឋបាលខេត្ដសៀមរាប នៅថ្ងៃទី១១ ខែតុលា ឆ្នាំ២០២១នេះ បានណែនាំឲ្យប្រជាពលរដ្ឋដែលមានកូនអាយុចាប់ពី ០៦ឆ្នាំ ទៅ ១២ឆ្នាំ បានទទួលចាក់វ៉ាក់សាំងបង្ការជំងឺកូវីដ-១៩ ដួសទី១ (ស៊ីណូវ៉ាក់) កាលពីថ្ងៃទី២០ ខែកញ្ញា ឆ្នាំ២០២១ ដល់ថ្ងៃទី១០ ខែតុលា ឆ្នាំ២០២១កន្លងទៅ នៅតាមស្រុកទាំង១១ របស់ខេត្ដសៀមរាប ត្រូវទៅទទួលវ៉ាក់សាំងបង្ការជំងឺកូវីដ-១៩ ដូសទី២ ចាប់ផ្តើមពីថ្ងៃទី១២ ខែតុលា ឆ្នាំ២០២១ ដល់ថ្ងៃទី៣០ ខែតុលា ឆ្នាំ២០២១នេះ។ រយៈពេលត្រូវចាក់វ៉ាក់សាំងដូសលើកទី២នេះ មានរយៈពេលចន្លោះពី២១ថ្ងៃ ទៅ២៨ថ្ងៃ ពោលមិនអោយហួស២៨ថ្ងៃ ក្រោយចាក់ដូសទី១រួច។ ការចាក់លើកទី២នេះ គឺមាននៅតាមមណ្ឌលចាក់វ៉ាក់សាំងដែលបាននាំកូនទៅចាក់វ៉ាក់សាំងកាលពីដូសទី១ កន្លងមក។ យុទ្ធនាការចាក់វ៉ាក់សាំងនេះ ចាប់ផ្តើមពីម៉ោង៨ នឹង០០នាទីព្រឹកដល់ម៉ោង១១ នឹង៣០នាទីថ្ងៃត្រង់ និងម៉ោង១៤ នឹង០០នាទីរសៀល ដល់ម៉ោង១៦ នឹង៣០នាទីល្ងាច។ ក្នុងនោះអាណាព្យាបាល ឬមាតាបីតាត្រូវយកប័ណ្ណចាក់វ៉ាក់សាំងកូវីដ-១៩ លើកទី១ មកជាមួយជាចាំបាច់ ដើម្បីឱ្យក្រុមគ្រូពេទ្យងាយស្រួលក្នុងការផ្ទៀងផ្ទាត់អត្តសញ្ញាណ និងធ្វើការចាក់ជូន។
សេចក្ដីជូនដំណឹង បានបន្ថែមបញ្ជាក់ថា ករណីមកយឺតលើសពី២៨ថ្ងៃ បន្ទាប់ពីចាក់លើកទី១ នឹងមិនអាចចាក់វ៉ាក់សាំងកូវីដ-១៩ ដូសទី២ បាននោះទេ។ ក្នុងនោះចំពោះប្រជាពលរដ្ឋអាយុទី៦ឆ្នាំ ដល់ក្រោម១២ មិនបានចាក់ដូសទី២ទេនោះ នឹងមិនមានអង្គបដិបក្ខប្រាណ (Antibody) ដើម្បីទប់ទល់ជាមួយវីរុសកូវីដ-១៩ បានឡើយ ហើយទោះបីចាក់វ៉ាក់សាំងដូសទី២ រួចហើយក៏ដោយ ក៏ប៉ុន្ដែអាណាព្យាបាល ឬមាតាបីតា ត្រូវណែនាំដល់កូនៗ របស់ខ្លួនឲ្យបន្តអនុវត្តនូវវិធានសុខាភិបាលដដែលគឺ ៣ការពារ និង៣កុំ។
សូមជ្រាបថាតាមរាបាយការណ៍របស់រដ្ឋបាលខេត្ដសៀមរាប ប្រជាពលរដ្ឋដែលមានអាយុចាប់ពី៦ឆ្នាំ ដល់ក្រោម១២ឆ្នាំនៅក្នុងខេត្តសៀមរាប សរុបមានចំនួន១៣៦,០០៣នាក់ ហើយអ្នកដែលបានចាក់វ៉ាក់សាំងការពារជំងឺកូវីដ-១៩ ដូសទី១ គិតមកដល់ថ្ងៃទី១១ ខែតុលា ឆ្នាំ២០២១នេះ មានចំនួន ១១.៩៦២៧នាក់ ដែលនៅក្នុងនោះ នៅក្នុងក្រុងសៀមរាបចំនួន ១៨.៤៨៣នាក់, ស្រុកក្រឡាញ់ មានចំនួន ៧.៣៧៦នាក់, ស្រុកជីក្រែង មានចំនួន ១៧.៣៩៥នាក់, ស្រុកអង្គរធំ មានចំនួន ៣.៩៤៧នាក់, ស្រុកបន្ទាយស្រី មានចំនួន ៦.៥៣៩នាក់, ស្រុកអង្គរជុំ មានចំនួន ៧.៨៣៧នាក់, ស្រុកពួក មានចំនួន ១៦.៥៦៩នាក់, ស្រុកប្រាសាទបាគង មានចំនួន ១១៩៧៧នាក់, ស្រុកស្រីស្នំ មានចំនួន ៤.៧៨៣នាក់, ស្រុកសទ្រនិគម មានចំនួន ១៣.០៤១នាក់, ស្រុកស្វាយលើ មានចំនួន ៥.៥២៣នាក់ និងស្រុកវ៉ារិន មានចំនួន ៦១៥៧នាក់៕
អត្ថបទ និង រូបភាព៖ លោក ឈិត សាវី
