កាលពីរសៀលថ្ងៃទី១១ ខែតុលា ឆ្នាំ២០២១នេះ ក្រុមការងារចុះរបស់រដ្ឋបាលខេត្តសៀមរាប រដ្ឋបាលក្រុង និងមន្ទីរពាណិជ្ជកម្ម ព្រមទាំងក្រុមការងារតោះទៅលេងសៀមរាប បានចុះណែនាំ និងផ្សព្វផ្សាយដល់អាជីវករផ្សារលើធំថ្មី និងផ្សារសាមគ្គី ឱ្យបានយល់អំពីដំណើរការប្រើប្រាស់ប្រព័ន្ធស្កែន QR Code ដើម្បីត្រៀមបើកដំណើរការផ្សារឡើងវិញ ហើយការរៀបចំរបៀបនេះជាជំនួយដល់ការគ្រប់គ្រង និងតាមដានការរាតត្បាតនៃជំងឺកូវីដ-១៩ ផងដែរ។ មួយវិញទៀត ក្រុមការងារក៏បានរៀបចំសណ្តាប់ធ្នាប់ និងរបៀបរៀបរយក្នុងផ្សារទាំងពីរ និងកន្លែងលក់ដូររបស់បងប្អូន ដើម្បីឱ្យស្របទៅតាមសភាពការណ៍នៃបរិបត្តកូវីដ-១៩។
លោក បូ ម៉េងទ្រី អភិបាលរងក្រុងសៀមរាប បានបញ្ជាក់ថា ក្នុងឱកាសចុះណែនាំ និងផ្សព្វផ្សាយនេះ ក្រុមការងារក៏បានប្រគល់ក្រដាសស្ទីកគ័រស្កែន QR Code ដល់ផ្សារទាំងពីរ គឺផ្សារលើធំថ្មី មានចំនួន ៥៨៥សន្លឹក (ឬ ៥៨៥ឈ្មោះ ) និងផ្សារសាមគ្គី ហ៊ុយគាំង មានចំនួន ៣៦១សន្លឹក ហើយចំពោះស្ទីកគ័រស្កេន QR Code ដែលផ្ដល់នាពេលនេះនិងដើម្បីសុំគោលការណ៍ អនុញ្ញាតពីរដ្ឋបាលខេត្ត ដើម្បីបានបើកដំណើការផ្សារឡើងវិញដោយរក្សាការគម្លាត។ ចំពោះប្រព័ន្ធបច្ចេកវិទ្យា QR Code ទប់ស្កាត់កូវីដ-១៩ គឺមានសារសំខាន់ណាស់ចំពោះអ្នកប្រើប្រាស់ ដោយប្រជាពលរដ្ឋអាចស្កេនពេលចូលទៅទីតាំងផ្សេងៗ ដើម្បីទទួលបានដំណឹងឆាប់រហ័ស ប្រសិនបើទីតាំងនោះមានករណីឆ្លងជំងឺកូវីដ-១៩ ។ ហើយប្រព័ន្ធបច្ចេកវិទ្យា QR Code បានផ្តល់អត្ថប្រយោជន៍យ៉ាងច្រើន បន្ថែមពីលើវិធានការដែលមានស្រាប់ របស់ក្រសួងសុខាភិបាល ក៏ដូចជារដ្ឋបាលខេត្ត ដើម្បីចូលរួមអនុវត្តន៍ឱ្យកាន់តែមានប្រសិទ្ធភាពខ្ពស់បន្ថែមទៀត។ អត្ថប្រយោជន៍នៃការប្រើប្រាស់ប្រព័ន្ធនេះ គឺផ្ដល់ភាពងាយស្រួលក្នុងការជូនដំណឹងត្រឡប់ទៅបងប្អូនវិញ ក៏ដូចជាសម្រួលដោយការស្វែង រកតាមដាននូវបុគ្គលសង្ស័យ ដែលអាចពាក់ព័ន្ធទៅនឹងករណីឆ្លងជំងឺ នៅពេលដែលទីតាំងដែលបងប្អូនអញ្ជើញទៅដល់នេះ រកឃើញមានវិជ្ជមានជំងឺកូវីដ-១៩។
ក្នុងឱកាសនោះដែរ លោកអភិបាលរងក្រុងសៀមរាប ក៍បានស្នើសុំការយោគយល់ពីសាធារណៈជន និងអាជីវករទាំងអស់ ដោយសារតែពេលនេះ យើងទាំងអស់គ្នារៀនរស់នៅជាមួយកូវីដ-១៩ រស់នៅតាមបែបគន្លងថ្មី ដូច្នេះហើយតាមរយៈការប្រើប្រាស់ប្រព័ន្ធបច្ចេកវិទ្យា QR Code នៅពេលដែលបងប្អូនអញ្ជើញចូលទីតាំងណាមួយ អាចនឹងចំណាយពេលបន្ថែមបន្តិចបន្តួចទៀត ប៉ុន្តែទោះជាយ៉ាងណា នេះជារបៀបដែលយើងនឹងចូលរួមជាមួយ រាជរដ្ឋាភិបាល ក្នុងការបង្ការ និងទប់ស្កាត់ជំងឺកូវីដ-១៩ ។ ជាមួយគ្នានោះក្នុងករណីទីតាំងអាជីវកម្ម ដែលទទួលបានស្ទីកគ័រស្កែន QR Code តែពុំបានគោរពតាមការណែនាំរបស់អាជ្ញាធរ ក្រុមការងារជំនាញនឹងធ្វើការពិន័យតាមនីតិវិធី តាមលិខិតបទដ្ឋានគតិយុត្ត៕
អត្ថបទ៖ លោក ទ្រា ពន្លឺ
រូបភាព៖ លោក ខេង ឧត្តម
