បេសកកម្មរបស់ក្រុមការងារ នៃគណ:កម្មការត្រួតពិនិត្យ និងវាយតម្លៃការបើកដំណើរការឡើងវិញ នូវគ្រឹះស្ថានសិក្សាសាធារណ: និងឯកជន ក្នុងភូមិសាស្ត្រខេត្តសៀមរាប គឺជាការចេញដំណើរក្នុងជំហ៊ានដំបូង ឆ្ពោះទៅរកការបើកបង្រៀន និងរៀនតាមបណ្តុំ ដែលកន្លងមកខេត្តសៀមរាប មានត្រឹមតែការអនុវត្តការបង្រៀន និងរៀនពីចម្ងាយតាមប្រព័ន្ធអេឡិចត្រូនិច និងបណ្តុំក្នុងកម្រឹតសហគមន៍ ដែលមិនមែនជាការបើកសាលារៀននោះឡើយ !
មកដល់ពេលនេះ ការបើកសាលារៀនឡើងវិញ ដើម្បីបង្រៀន និងរៀនតាមបណ្តុំ ដែលជាអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ខេត្តសៀមរាបពុំទាន់បានដំណើរការនៅឡើយនោះទេ ដោយសារតែកាលពីពាក់កណ្តាលខែកញ្ញាកន្លងទៅ ខេត្តសៀមរាបកំពុងស្ថិតក្នុងស្ថានភាពហានីភ័យខ្ពស់ នៃជម្ងឺកូវិដ-១៩ តែយ៉ាងណាក៏ដោយ នៅមានបន្តការបង្រៀនសិស្សពីចម្ងាយតាមប្រព័ន្ធអនឡាញ ដើម្បីបញ្ចៀសហានីភ័យខ្ពស់។ មកដល់ពេលនេះដែរ ក្រោយពីការប្រកាសរំសាយតំបន់លឿងទុំ និងតំបន់ក្រហមនាចុងខែកញ្ញាកន្លងមកនេះ ក្នុងចំណោមបណ្តាក្រុង-ស្រុកទាំង១២ របស់ខេត្តសៀមរាប មានបណ្តាស្រុកចំនួន៨ បានដាក់ពាក្យស្នើសុំបើកសាលាបង្រៀនសិស្សឡើងវិញ មករដ្ឋបាលខេត្ត តាមរយ:មន្ទីរអប់រំ យុវជន និងកីឡា។
លោក ពៅ ពិសិដ្ឋ អភិបាលរងខេត្តសៀមរាប អនុប្រធានអចិន្រ្តៃយ៍ គណ:កម្មការរៀបចំបើកដំណើរការសាលារៀនឡើងវិញ បានឲ្យដឹងយ៉ាងដូច្នេះ កាលពីថ្ងៃទី១១ ខែតុលា ឆ្នាំ២០២១នេះ នៅក្នុងបេសកកម្មការងារទៅកាន់ស្រុកចំនួន៣ គឺស្រុកបន្ទាយស្រី ស្រុកស្វាយលើ និងស្រុកសូទ្រនិគម ក្នុងគោលបំណងជួបប្រឹក្សាជាមួយអាជ្ញាធរមូលដ្ឋាន គ្រូបង្រៀន គណ:កម្មការគ្រប់គ្រងសាលា អាណាព្យាបាលសិស្ស ដើម្បីស្វែងយល់ និងផ្តល់នូវការណែនាំ អំពីការត្រៀមលក្ខណ:បើកសាលាវិញនោះ។ ការចុះបំពេញការងារនៅស្រុកទាំងបីនេះដែរ គឺដើម្បីត្រួតពិនិត្យ សិក្សាស្វែងយល់ និងប្រមូលនូវធាតុចូលសម្រាប់ជាមូលដ្ឋាន ក្នុងការដាក់ចេញនៅផែនការរៀបចំបើកសាលាឡើងវិញនេះដែរ។ លោកបញ្ជាក់ថា ស្រុកទាំង៣នេះ ស្ថិតក្នុងចំណោមស្រុកចំនួន ៥ផ្សេងទៀត ដែលបានដាក់ពាក្យស្នើសុំបើកសាលារៀនឡើងវិញ រួមមាន ស្រុកប្រាសាទបាគង, ស្រីស្នំ, វ៉ារិន្ទ , អង្គរធំ និងស្រុកក្រឡាញ់។ ក្នុងចំណោមទាំង៨ស្រុកនេះ មានគ្រឹះស្ថានសិក្សារដ្ឋកម្រឹតមធ្យមចំនួន ៤៤សាលា និងកម្រឹតបឋមសិក្សាចំនួន ១២៩លាសា។
លោក លី ប៊ុណ្ណា ប្រធានមន្ទីរអប់រំ យុវជន និងកីឡាខេត្តសៀមរាប ក៏បានគូសបញ្ជាក់ដែរថា ការបើកសាលាបង្រៀនសិស្សឡើងវិញនេះ វាមិនមែនជាព្រឹត្តិការណ៍ ឬជាការងារថ្មីនោះទេ ការណែនាំរបស់ក្រសួងអប់រំ កាលពីដើមខែកញ្ញា ឆ្នាំ២០២០នៅជាធរមាននៅឡើយ ព្រមជាមួយនឹងការណែនាំបន្ថែមស្តីពីស្តង់ដារអនាម័យ ការអនុវត្តវិធានការ ៣ការពារ ៣កុំ ការចាក់វ៉ាក់សាំងបង្ការសម្រាប់សិស្ស និងបុគ្គលិកអប់រំ និងការធ្វើតេស្តសំណាកគ្រូបង្រៀន មុនបើកសាលាបង្រៀនសិស្ស ជាដើម។
លោក បានបន្ថែមឲ្យដឹងថា ខេត្តសៀមរាបកន្លងមកនេះ បើទោះជាការបង្រៀន និងរៀនតាមបណ្តុំមិនទាន់បានដំណើរការនៅឡើយ ក៏ប៉ុន្តែការបង្រៀន និងរៀនពីចម្ងាយ ត្រូវបានអនុវត្តតាមការណែនាំរបស់ក្រសួងទាំងនៅទីក្រុង ទីប្រជុំជន និងនៅទីជនបទ ដោយបានរៀបចំឲ្យមានក្នុងរូបភាពចម្រុះជាបណ្តុំតាមសហគមន៍ ដែលធ្វើឲ្យកិច្ចការទាំងនេះ បានបង្កើតឲ្យមានជាបទពិសោធន៍ផងដែរ។ ការត្រៀមបើកសាលារៀនឡើងវិញនេះ ផ្តោតលើអាទិភាពថ្នាក់ទី៥ ទី៦ ទី៩ និងថ្នាក់ទី១២ និងក្នុងថ្នាក់រៀននីមួយៗ មិនឱ្យលើសពី ១៥នាក់។
អត្ថបទ និងរូបភាព: លោកងិន គីមឡេង
កែសម្រួលដោយ លីវ សុខុន!!!
