រដ្ឋបាលក្រុងសៀមរាប បានឲ្យដឹងថា ក្នុងសប្តាហ៍ក្រោយបុណ្យភ្ជុំបិណ្ឌ ភោជនីយដ្ឋាន-អាហារដ្ឋានជិត៥០ទីតាំង នឹងត្រូវបានអនុញ្ញាតិឲ្យដំណើរការឡើងវិញជាបន្តបន្ទាប់ ក្នុងរូបភាពទទួលភ្ញៀវឲ្យពិសាអាហារនៅនឹងកន្លែង។ ជាមួយគ្នានេះដែរ មន្រ្តីជំនាញសេវាកម្មទេសចរណ៍ បង្ហាញឲ្យដឹងថា ប័ណ្ណសំគាល់ចាក់វ៉ាក់សាំង គឺជាឧបករណ៍ដ៏សំខាន់ សម្រាប់ការបង្កើតទំនុកចិត្តគ្នាក្នុងបរិបទកូវីដ-១៩ រវាងអ្នកបំរើសេវាកម្មនិងអតិថិជន។
លោក នួន ពុទ្ធារ៉ា អភិបាលក្រុងសៀមរាប បានឲ្យដឹងថា ក្នុងបណ្តាភោជនីយដ្ឋាន និងអាហារដ្ឋានប្រមាណជិត២០០កន្លែង នៅក្នុងក្រុង មានភោជនីយដ្ឋាន និងអាហារដ្ឋានជិត៥០កន្លែងហើយ ដែលរដ្ឋបាលក្រុងសៀមរាប បានពិនិត្យ និងវាយតម្លៃលើលទ្ធភាពដែលអាចដំណើរការបាន ហើយគ្រោងនឹងអនុញ្ញាតិឲ្យបើកដំណើរអាជីវកម្មដ្ឋានរបស់ខ្លួន ក្នុងរូបភាពលើសពីការវេចខ្ចប់ ដោយការបំរើសេវាកម្មទទួលភ្ញៀវ ឲ្យពិសាអាហារ និងភេសជ្ជ: នៅនឹងកន្លែង។ លោកអភិបាលក្រុង បានឲ្យដឹងយ៉ាងដូច្នេះ ក្នុងពេលដែលលោកបានដឹកនាំក្រុមការងារចម្រុះ ចុះប្រគល់លិខិតបញ្ជាក់ការអនុញ្ញាតដល់ម្ចាស់អាហារដ្ឋានចំនួន ៣កន្លែង នាល្ងាចថ្ងៃទី១២ ខែតុលា ឆ្នាំ២០២១នេះ។ ការប្រគល់លិខិតបញ្ជាក់ការអនុញ្ញាតដល់ម្ចាស់ភោជនីយដ្ឋាន និងអាហារដ្ឋានចំនួន ៣កន្លែងនោះរួមមាន៖ ១.ភោជនីយដ្ឋានផ្ទះក្បឿងសៀមរាប, ២.អាហារដ្ឋានរជនីបបរស និងអាហារដ្ឋាន” ៣៣៣ ” ។
លោកក៏បានបញ្ជាក់ឲ្យដឹងដែរថា មុននឹងឈានមកដល់ការប្រគល់លិខិតបញ្ជាក់ការអនុញ្ញាតនេះ ម្ខាស់សេវាកម្មដ្ឋានម្ហូបអាហារទាំងនេះ ត្រូវបានត្រៀមលក្ខណ:រួចជាស្រេច ក្នុងការអនុវត្តលក្ខ័ណ្ឌស្តង់ដារអប្បរមាភោជនីយដ្ឋាន-អាហារដ្ឋានទេសចរណ៍ក្នុងបរិបទកូវីដ-១៩ ជាមួយនឹងការដាក់ពាក្យស្នើសុំផងដែរ ហើយអ្វីដែលត្រូវឆ្លងកាត់ ដើម្បីធានាសុវត្ថិភាពដោយការទទួលខុសត្រូវនៅពេលដំណើរការនោះ គឺការចុះត្រួតពិនិត្យវាយតម្លៃរបស់ក្រុមការងារចម្រុះថ្នាក់ខេត្ត រួមមានមន្រ្តីជំនាញមកពីមន្ទីរទេសចរណ៍ សុខាភិបាល ទូរគមនាគមន៍ និងមន្ទីរបរិស្ថានជាដើម។
ជាការណែនាំបន្ថែម ដើម្បីធានានិរន្តរភាព នៃកិច្ចដំណើរការបើកអាហារដ្ឋានទទួលភ្ញៀវនោះ លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប បានបញ្ជាក់ថា ៣ការពារ និង៣កុំ គឺជាវិធានការដ៏មានប្រសិទ្ធភាពក្នុងការទប់ស្កាត់ជំងឺកូវី-១៩ ជាមួយគ្នានេះដែរ ប័ណ្ណសំគាល់ចាក់វ៉ាក់សាំងបង្ការជំងឺកូវី-១៩ គឺជាឧបករណ៍ដ៏សំខាន់ផងដែរ សម្រាប់ការប្រើប្រាស់ បង្កើតទំនុកចិត្តរវាងអ្នកបំរើសេវាកម្ម និងអតិថិជន។ វាមិនជាការលំបាកនោះទេ បើគ្រាន់តែជាការបង្ហាញប័ណ្ណនេះ ឲ្យគ្នាឃើញទៅវិញទៅមកនោះ។
លោកប្រធានមន្ទីរ ក៏បានបង្ហើបឲ្យម្ចាស់សេវាកម្ម បានដឹងផងដែរ អំពីវិធីសាស្រ្តក្នុងការរៀបតុ-កៅអីឱ្យមានគម្លាតសុវត្ថិភាពសង្គម ដើម្បីត្រៀមទទួលភ្ញៀវ ហើយក្រៅអំពីការរក្សាគម្លាត ដោយប្រើតុតូចៗដាច់ដោយឡែកពីគ្នា នោះគឺអាចធ្វើបានការរៀបតុធំវែង រក្សាគម្លាតកៅអី សម្រាប់ទទួលភ្ញៀវក្នុងលក្ខណ:ជាក្រុមគ្រួសារ តែជាក្រុមមិនមែនគ្រួសារ គឺមិនអាចអនុញ្ញាតឲ្យប្រើតុកៅអីនោះជាដាច់ខាត។ លោកបន្តទៀតថា អាចនឹងមានករណីរឹតបន្តឹងសុវត្ថិភាពក្នុងភោជនីយដ្ឋានបន្ថែមទៀត ដោយផ្អែកលើហានីភ័យ នៃបញ្ហាកូវីដ នោះគឺអាចនឹងតម្រូវឲ្យមានការរៀបចំតុអាហារនីមួយៗ មានរបាំងកញ្ចក់សុវត្ថិភាព ព្រោះថានៅពេលទទួលទានអាហារ និងភេសជ្ជ: គ្រប់គ្នាមិនមានពាក់ម៉ាសនោះឡើយ។ ទាំងអស់នេះ គឺជាគន្លងថ្មី សម្រាប់ការរៀនរស់ជាមួយកូវីដ-១៩។
សូមជម្រាបជូនថា អាជ្ញាធរមានសមត្ថកិច្ច ខេត្ត ក្រុងសៀមរាប កាលពីចុងសប្ដាហ៍មុន បានប្រគល់លិខិតបញ្ជាក់ការអនុញ្ញាត ឱ្យធ្វើអាជីវកម្មដល់ម្ចាស់អាហារដ្ឋានចំនួន ៩កន្លែងរួចមក និងល្ងាចថ្ងៃទី១២ ខែតុលានេះ បានប្រគល់លិខិតបញ្ជាក់ការអនុញ្ញាត ឱ្យធ្វើអាជីវកម្មដល់ម្ចាស់អាហារដ្ឋានចំនួន ៣កន្លែងទៀត៕
អត្ថបទ និងរូបភាព៖ លោក ងិន គីមឡេង
កែសម្រួល៖ លោក លីវ សុខុន
