ព្រឹកថ្ងៃទី១៣ ខែតុលា ឆ្នាំ២០២១នេះ គ្រឿងឧបភោគបរិភោគមាន៖ អង្ករចំនួន ៥០០ គីឡូក្រាម, មី ២៥កេស, ត្រីខ ៥កេស, ទឹកសុទ្ឋ ៣៤យួរ, ថវិកាចំនួន ៨៧ម៉ឺនរៀល ជាអំណោយរបស់ក្រុមហ៊ុនហាយក្រូ និងគ្រឿងឧបភោគបរិភោគមួយចំនួនទៀត រួមមាន៖ អង្ករ ១តោន, មី ៤០កេស, ភេសជ្ជៈ ២០កេស, ទឹកស៊ីអ៊ីវ ១២កេស, អំបិល ១០០គីឡូក្រាម, ស្ករស ៥០គីឡូ និងនំបុ័ងជ្រុង ៣០ដើម ជាអំណោយរបស់អង្គការឡូទូសវើល នៃប្រទេសកូរ៉េខាងត្បូង ត្រូវបានក្រុមការងារនាំយកមកប្រគេនជូនដល់ព្រះសង្ឃ គង់នៅវត្តពោធិលង្កា ស្ថិតនៅភូមិទ្រាំង សង្កាត់ស្លក្រាម ក្រុង/ខេត្តសៀមរាប ដើម្បីផ្គត់ផ្គង់ព្រះសង្ឃដែលកំពុងជាប់ចត្តាឡីស័ក និងបិទខ្ទប់វត្តបណ្តោះអាសន្ន។
ក្នុងឱកាសនោះលោកស្រី ជីវ ណារ៉ា អគ្គនាយិកាក្រុមហ៊ុនអចលនទ្រព្យហាយក្រូ និង ភិក្ខុនី សាន់មូន ប្រធានអង្គការឡូទូសវើល មានប្រសាសន៍ថា ការនាំយកមកគ្រឿងឧបភោគបរិភោគមកប្រគេនព្រះសង្ឃនៅពេលនេះ គឺក្រោយពីទទួលបានដំណឹងដ៍គួរឱ្យបារម្ភ ថាព្រះសង្ឃនៅក្នុងវត្តពោធិលង្កាកំពុងបិទខ្ទប់ហាមការចេញ-ចូលជាបណ្តោះអាសន្ន និងជាប់ធ្វើចត្តាឡីស័ក ហាមមិនឱ្យចេញគោចរទៅកាន់ទីដទៃ និងតបតាមការអំពាវនាវរបស់ព្រះវិជ័យរង្សី បណ្ឌិត ឡាច លាង ព្រះរាជាគណៈថ្នាក់កិត្តិយស ព្រះធម្មធរគណខេត្ត ព្រះអនុគណក្រុងសៀមរាប និង ជាព្រះចៅអធិការវត្តទេពពោធិវង្ស និងព្រះសទ្ឋម្មប្បកាសនី តាត មហាទី ព្រះធម្មធរអនុគណក្រុងសៀមរាប និងជាព្រះចៅអធិការវត្តព្រះឥន្ទកោសា ស្ថិតក្នុងក្រុងសៀមរាបថា វត្តវត្តពោធិលង្កា កំពុងមានការខ្វះខាតចង្ហាន់ ហេតុនេះទើបគៀងគរសប្បុរសជនជិតឆ្ងាយរួមគ្នាបរិច្ចាកតាមសទ្ឋាយកមកប្រគេនព្រះសង្ឃ សម្រាប់ប្រើប្រាស់ក្នុងវត្ត និងទុកផ្គត់ផ្គង់ចែករំលែកទៅដល់ ព្រះសង្ឃដែលកំពុងហ៊ុព័ទ្ឋបិទការចេញចូលជាបណ្តោះអាសន្ន និងជាប់ធ្វើចត្តាឡីស័ក។
ក្នុងនាមថ្នាក់ដឹកនាំសាលាអនុគណ ក្រុងសៀមរាប ព្រះវិជ័យរង្សី បណ្ឌិត ឡាច លាង បានថ្លែងអំណរព្រះគុណ និងអរគុណ ចំពោះទឹកចិត្តសប្បុរសធម៌របស់ ថ្នាក់ដឹកនាំ សមាជិក សមាជិកា អង្គការឡូទូសវើល និងថ្នាក់ដឹកនាំ និងសហការីរបស់ក្រុមហ៊ុនអចលនទ្រព្យហាយក្រូ ដែលមានសទ្ឋាជ្រះថ្លា លះបង់ថវិកា និងធនធានយកមកប្រគេនដល់វត្តនេះ ដែលជាវត្តកំពុងខ្វះខាតដោយសារភិក្ខុសាមណេរមួយចំនួនមានវិជ្ជមានជំងឺកូវីដ-១៩ កំពុងសម្រាកព្យាបាលនិងបិទខ្ទប់វត្តជាបណ្តោះអាសន្នហាមការចេញចូលមួយរយៈ។ ព្រះអង្គបញ្ជាកថា វត្តពោធិលង្កាមាន ភិក្ខុ សាមណេរ ដូនជីតាជី និងក្មេងវត្តសរុប ៧១អង្គ/នាក់ បានឆ្លងមេរោគកូវីដ-១៩ កាលពីថ្ងៃទី២៧ ខែកញ្ញា ឆ្នាំ២០២១ ហើយបច្ចុប្បន្នកំពុងសម្រាកព្យាបាល នៅក្នុងវត្តដោយការឆាន់ ហូប ស្រង់ ងូតទឹក និងឆ្ពង់ទឹកក្តៅ និងអនុវត្តយ៉ាងខ្ជាប់ខ្ជួនតាមការណែនាំរបស់មន្ត្រីសុខាភិបាល ហើយពេលនេះសុខភាពទាំងអស់អង្គ ទាំងអស់គ្នាបានធូរស្រាលច្រើនហើយ តែមិនអាជ្ញាធរមិនទាន់អនុញ្ញាតមានបើកចេញចូលវត្តឡើងវិញទេ។
ប៉ុន្តែទោះមានស្ថានភាពល្អប្រសើរក្ដីតែ ព្រះវិជ័យរង្សីបណ្ឌិត ឡាច លាង ព្រះអង្គក៍បានជំរុញលើកទឹកចិត្តដល់ព្រះសង្ឃដែលកំពុងធ្វើចត្តាឡីស័កទាំងអស់ ត្រូវតស៊ូជំនះអត់ធ្មត់ ស្នាក់នៅដាច់ដោយឡែកឱ្យខាងតែបានរយៈពេល១៤ថ្ងៃ ឬលើសកាលកំណត់ ជាពិសេសត្រូវអនុវត្តឲ្យបានជាប់ជាប្រចាំតាមការណែនាំរបស់អាជ្ញាធរខេត្ត និងសេចក្តីណែនាំ របស់ក្រសួងសុខាភិបាល ក៍ដូចជាវិធានការ ៣ការពារ និង៣កុំ របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាឱ្យបានខ្ឃាប់ខ្ជួនផងដែរ។
សូមជម្រាបដែរថា កាលពីរសៀលថ្ងៃទី១២ ខែតុលា ឆ្នាំ២០២១ម្សិលមិញនេះដែរ ក្រុមការងារសាលាគណខេត្តសៀមរាប ដឹកនាំដោយព្រះវិជ័យរង្សី បណ្ឌិត ឡាច លាង ចូលរួមដោយព្រះរាជាគណៈជាព្រះចៅអធិការវត្តមួយចំនួនក្នុងក្រុងសៀមរាប ក៏បាននាំយកគ្រឿងឧបភោគបរិភោគមួយចំនួន ប្រគេនដល់ព្រះចៅអធិការវត្តពោធិលង្កាផងដែរ រួមមាន៖ ថវិកា ៧០ម៉ឺនរៀល, អង្ករ ៧០០គីឡូក្រាម, ទឹកត្រី ១០យួរ, ទឹកស៊ីអ៊ីវ ១០យួរ, ត្រីខ ៥យួរ, ទឹកសុទ្ធ ១៧យួរ, មីចំនួន ១២កេស និងភេសជ្ជៈចំនួន ២កេស៕
អត្ថបទ និង រូបភាព៖ លោក យូ វង្ស
