ដោយមើលឃើញពីការលំបាករបស់មគ្គុទេសក៍ ទេសចរណ៍តំបន់សៀមរាប-អង្គរ ជួបបញ្ហាលំបាកលើផ្នែកជីវភាពដោយសារតែវិបត្តិនៃជំងឺកូវីដ-១៩ អស់រយៈពេលជិត ២ឆ្នាំមកនេះ បណ្តាលឱ្យបងប្អូនបាត់បង់ការងារ គ្មានប្រាក់ចំណូលសម្រាប់ផ្គត់ផ្គង់ជីវភាពគ្រួសារ មើលឃើញពីការលំបាក និងដើម្បីរួមចំណែកសម្រាលបន្ទុកជាមួយបងប្អូន នៅក្នុងដំណាក់កាលនេះ អាជ្ញាធរខេត្តក្រោមការដឹកនាំរបស់ឯកឧត្តម ទៀ សីហា អភិបាលនៃគណៈអភិបាលខេត្ត បានសម្រេចលើកលែងមិនយកថ្លៃសេវាលើការបន្តអាជ្ញាប័ណ្ណ និងមិនមានការផាកពិន័យសម្រាប់ អាជ្ញាប័ណ្ណហួសសុពលភាពឡើយ សម្រាប់មគ្គុទេសក៍ទេសចរណ៍ក្នុងខេត្តសៀមរាបទាំងអស់។ នេះបើតាមការបញ្ជាក់របស់លោក ពិន ប្រាកដ អភិបាលរងខេត្តសៀមរាប ក្នុងពិធីសំណេះសំណាលចែកគ្រឿងឧបភោគបរិភោគដល់បងប្អូនមគ្គុទ្ទេសក៍ ទេសចរណ៍ចំនួន ១១១រូប ដែលជួបការលំបាកផ្នែកជីវភាពប្រចាំថ្ងៃ ដែលបានរៀបចំឡើងនៅវត្តទេពពោធិវង្ស សង្កាត់គោកចក ក្រុងសៀមរាប នាព្រឹកថ្ងៃ ទី១២ ខែតុលា ឆ្នាំ២០២១នេះ។
លោក ពិន ប្រាកដ មានប្រសាសន៍ទៀតថា ក្នុងដំណាក់កាលជំងឺកូវីដ-១៩ មិនទាន់ទៅណានៅឡើយ រាជរដ្ឋាភិបាលកម្ពុជា ក្រោមការដឹកនាំដ៍ឈ្លាសវៃ និងប៉ិនប្រសព្វ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី កំពុងរិះរកគ្រប់វិធីសាស្ត្រដើម្បីឱ្យចរន្តទេសចរណ៍មានសកម្មភាពឡើងវិញ ស្របពេលដែលក្រុងសៀមរាប ទទួលបានការអភិវឌ្ឍនូវហេដ្ឋារចនាសម្ព័ន្ឋផ្លូវ ៣៨ខ្សែ ពីរាជរដ្ឋាភិបាល កំពុងតែពន្ឡឿនការសាងសង់ ដើម្បីរួមចំណែកទទួលអ្នកទេសចរណ៍ និងផ្តល់ឱកាស និងសារៈប្រយោជន៍សម្រាប់អ្នកប្រកបអាជីវកម្មពាក់ព័ន្ឋទៅនឹងវិស័យទេសចរណ៍ និងវិស័យផ្សេងៗទៀតផងដែរ។ លោកក៏បានសម្តែងការកោតសរសើរ និងអរគុណនូវឆន្ទៈ សហការជួយគ្នាក្នុងគ្រាលំបាករបស់ម្ចាស់ជំនួយ សប្បុរសជននានា ដែលនេះបង្ហាញពីស្មារតីនិងកាយវិការសាមគ្គីគ្នាជួយទុក្ខធុរៈគ្នាទៅវិញទៅមកដែលកូនខ្មែរយើងអាចធ្វើបាន និងសង្ឃឹមថា ទឹកចិត្ត និងឆន្ទៈខ្មែរជួយខ្មែរនឹងមានជារៀងរហូតសម្រាប់ជួយគ្នាក្នុងគ្រាលំបាក ជាពិសេសការមគ្គុទេសក៍ទេសចរណ៍តំបន់សៀមរាបអង្គរទាំងអស់ សុទ្ឋតែបានចូលរួមអនុវត្តតាមគោលនយោបាយ និងការណែនាំរបស់រាជរដ្ឋាភិបាល នូវវិធានការ៣ការពារនិង៣កុំ ការពារទប់ស្កាត់ជំងឺកូវីដ-១៩ កុំឱ្យឆ្លងចូលក្នុងសហគមន៍។ លោកក៏បាននែនាំដល់មគ្គុទេសក៍ ទេសចរណ៍ក៍ដូចជាប្រជាពលរដ្ឋទូទៅទាំងអស់ ត្រូវបន្តរៀនរស់តាមបែបគន្លងថ្មីជាមួយនឹងកូវីដ-១៩ តាមរយៈការចូលរួមអនុវត្តវិធានការ ៣កុំ ៣ការពារ របស់រាជរដ្ឋាភិបាលកុំបីធ្វេសប្រហែសឡើយព្រោះនេះ ជាយ័ន្តសាកសិទ្ឋិជួយការពារសុខភាពអាយុជីវិតយើងក្រុមគ្រួសារយើង និងសហគមន៍យើងទាំងអស់គ្នា។
សូមជំរាបថា គ្រឿងឧបភោគបរិភោគដែលយកមកផ្តល់ជូននាពេលនេះ កើតឡើងពីគំនិតផ្តួចផ្តើមរបស់ ក្រុមហ៊ុន អៅដរ ដើម្បីចែករំលែកទុក្ខលំបាក របស់បងប្អូនដែលបានបាត់បង់ការងារព្រោះវិបត្តិកូវីដ-១៩ ដែលកន្លងមកក្រុមហ៊ុនធ្លាប់បានរៀបចំជាកញ្ចប់អំណោយ ចែកជូនដល់ បងប្អូនប្រជាពលរដ្ឋជួបការខ្វះខាតខ្លាំងចំនួន ៣ដង រួចមកហើយ ដែលសរុបទាំង ៣ដងមកហើយ។ នេះជាកម្មវិធីលើកទី៤ ដោយមើលឃើញអ្នកបម្រើការងារក្នុងវិស័យទេសចរណ៍ ដែលបានបាត់បង់ការងារជិត ២ឆ្នាំមកនេះ គឺមគ្គុទ្ទេសក៍ទេសចរណ៍ ចំនួន ១១១នាក់ ក្នុងចំណោមមគ្គុទ្ទេសក៍ប្រមាណ ៦.០០០នាក់ក្នុងខេត្តសៀមរាប។ ចំពោះមគ្គុទ្ទេសក៍ទេសចរណ៍ ចំនួន ១១១នាក់ ដែរទទួលបានអំណោយនៅពេលនេះ ក្នុងម្នាក់ៗទទួលបាន៖ អង្ករ ២០គីឡូក្រាម, មី ១កេស, ត្រីខ ១យួរ, ខ្ទឹមស ១គីឡូក្រាម, ស្ករស ១គីឡូក្រាម, ប្រេងឆារ ១ដប, ទឹកត្រី ១ដប, ទឹកស៊ីអ៊ីវ ១ដប និងថវិកា ១ម៉ឺនរៀល៕
អត្ថបទ និង រូបភាព៖ លោក យូ វង្ស
