នៅថ្ងៃទី១១ ខែតុលា ឆ្នាំ២០២១ ក្រុមហ៊ុន T.S.P.R.S ឌីវេលឡុបមិន ខូធិលធីឌី បាននាំយកឧបករណ៍តេស្តរហ័ស ពិនិត្យរកមេរោគកូវីដ-១៩ ចំនួន ១០០តេស្ត ជូនដល់មន្ទីរព័ត៌មានខេត្តសៀមរាប ដើម្បីចូលរួមទប់ស្កាត់ការឆ្លងរីករាលដាលនៃជំងឺកូវីដ-១៩ ដល់មន្ត្រីព័ត៌មាន និងប្រជាពលរដ្ឋក្នុងខេត្តសៀមរាប។
ក្នុងឱកាស ប្រគល់ឧបករណ៍តេស្តរហ័សនេះ លោក ធឹម សំផូត តំណាងក្រុមហ៊ុន T.S.P.R.S បានបង្ហាញពីរបៀបប្រើប្រាស់ឧបករណ៍ រួមជាមួយក្រដាសណែនាំជូនដល់មន្ត្រីនៃមន្ទីរ ដើម្បីប្រើប្រាស់ឱ្យបានត្រឹមត្រូវ និងមានប្រសិទ្ធភាពគួរទុកចិត្តបាន។ លោកបញ្ជាក់ថា ឧបករណ៍តេស្តរហ័សនេះ បានទទួលការអនុញ្ញាតពីក្រសួងសុខាភិបាល ដើម្បីប្រកបអាជីកម្មនៅក្នុងប្រទេសកម្ពុជា ចំពោះលទ្ធផលអាចទុកចិត្តបានរហូតដល់ជាង៩០ភាគរយ និងផ្ដល់ភាពងាយស្រួល ដល់អ្នកប្រើប្រាស់ផងដែរ។
លោក លីវ សាន្ត អនុប្រធានមន្ទីរព័ត៌មានខេត្តសៀមរាប បានថ្លែងអំណរគុណដល់ក្រុមហ៊ុន និងវាយតម្លៃថាឧបករណ៍តេស្តរហ័សនេះ ពិតជាមានសារសំខាន់ណាស់ សម្រាប់មន្ត្រីរបស់មន្ទីរព័ត៌មានខេត្ត នៅពេលចុះទៅយកព័ត៌មាននៅតាមមូលដ្ឋាននានា នៃខេត្តសៀមរាប និងត្រឡប់មកកន្លែងធ្វើការវិញ។ លោកអនុប្រធានមន្ទីរបន្ថែមថា នៅតាមបណ្ដាមន្ទីរអង្គភាព ក៏ដូចជាលំនៅឋានគួរមានឧបករណ៍នេះ ដើម្បីទប់ស្កាត់ការចម្លងជំងឺ ទៅកាន់សមាជិកគ្រួសារ និងមិត្តរួមការងារ ជាពិសេសនៅពេលពេលបុគ្គលខ្លួនឯង បានធ្វើដំណើរទៅកន្លែងមានមនុស្សច្រើន ឬសង្ស័យថាមានប៉ះពាល់អ្នកផ្ទុកមេរោគកូវីដ-១៩។
ព័ត៌មានជាតិ ថ្មីៗ
លោកអនុប្រធានមន្ទីរក៏បានបញ្ជាក់បន្ថែមថា ទោះបីមានឧបករណ៍តេស្តរហ័សនេះក្ដី ប្រការចម្បងត្រូវអនុត្តន៍តាមការណែនាំរបស់រាជរដ្ឋាភិបាល គឺ៣ការពារ និង ៣កុំ ដែលជាការចូលរួមជាចាំបាច់ ក្នុងការទប់ស្កាត់ការឆ្លងរីករាលដាលនៃជំងឺកូវីដ១៩ នៅក្នុងភូមិសាស្ត្រខេត្តសៀមរាប និងប្រទេសកម្ពុជាទាំងមូល។
អត្ថបទ៖ សេង ផល្លី
រូបភាព ៖ មន្ត្រីមន្ទីរព័ត៌មានខេត្ត
