ក្រុមការងារនាយកដ្ឋានរៀបចំដែនដី និងគ្រប់គ្រងលំនៅដ្ឋានក្នុងឧទ្យានអង្គរ របស់អាជ្ញាធរជាតិអប្សរា តែងតែចុះពិនិត្យ ពិគ្រោះយោបល់ និងជួយសម្រួលផ្នែកបច្ចេកទេសអំពីការសាងសង់លំនៅដ្ឋាន និងសំណង់ផ្សេងៗ ដោយក្នុងរយៈពេល៩ខែឆ្នាំ២០២១នេះ ស្ថាប័នមួយនេះ បានដំណើរការសាងសង់លំនៅដ្ឋានចំនួន៣៩២ ករណីក្នុងតំបន់រមណីយដ្ឋានអង្គរ។
ឯកឧត្ដម ឡុង កុសល អគ្គនាយករង និងជាអ្នកនាំពាក្យអាជ្ញាធរជាតិអប្សរា មានប្រសាសន៍នៅថ្ងៃទី២០ ខែតុលានេះថា ការផ្ដល់បញ្ចេកទេសនេះ ធ្វើឡើងចាប់ពីថ្ងៃទី០១ ខែមករា ដល់ថ្ងៃទី៣០ ខែកញ្ញា ឆ្នាំ២០២១ ដែលមានលិខិតអនុញ្ញាតសាងសង់ចំនួន៣៩២ ករណី ដោយមានភ្ជាប់នូវគំនូសប្លង់ស្ថាបត្យកម្មខ្មែរ ត្រូវបានចេញជូនប្រជាពលរដ្ឋសម្រាប់ធ្វើការសាងសង់។ ការអនុញ្ញាតរួមមាន នៅខែមករា អនុញ្ញាតចំនួន៦១ ករណី ខែកុម្ភៈ អនុញ្ញាតចំនួន៧៣ ករណី ខែមីនា អនុញ្ញាតបានចំនួន៣៩ ករណី ខែមេសាអនុញ្ញាតចំនួន៣៣ ករណី ខែឧសភាអនុញ្ញាតបានចំនួន៤៨ ករណី ខែមិថុនា អនុញ្ញាតបានចំនួន១៣ ករណី ខែកក្កដា អនុញ្ញាតបានចំនួន៤១ ករណី ខែសីហា អនុញ្ញាតបានចំនួន៥៥ ករណី និងខែកញ្ញា អនុញ្ញាតបានចំនួន២៩ ករណីផងដែរ។
ឯកឧត្ដមបញ្ជាក់ថា ការស្នើសុំសាងសង់ផ្ទះថ្មីជំនួសផ្ទះចាស់ តម្រូវឲ្យម្ចាស់ផ្ទះ ដាក់ពាក្យស្នើសុំដោយផ្ទាល់ នៅច្រកចេញចូលតែមួយក្រុងសៀមរាប ច្រកចេញតែមួយមណ្ឌល៣ ច្រកចេញតែមួយស្រុកអង្គរធំ ច្រកចេញតែមួយស្រុកបន្ទាយស្រី ច្រកចេញចូលតែមួយស្រុកពួក និងនៅមជ្ឈមណ្ឌលសេវាកម្ម នៃអាជ្ញាធរជាតិអប្សរា។ ករណីប្រជាពលរដ្ឋបានបំពេញគ្រប់លក្ខខណ្ឌទាំងអស់ អាជ្ញាធរជាតិអប្សរានឹងផ្តល់នូវលិខិតអនុញ្ញាតឱ្យសាងសង់ ព្រមទាំងគូសប្លង់បច្ចេកទេស និងជួយពិគ្រោះយោបល់សំដៅធ្វើយ៉ាងណាឲ្យការសាងសង់នោះចំគោលដៅ សន្សំសំចៃថវិកា ព្រមទាំងគោរពបានតាមរចនាបថផ្ទះខ្មែរបុរាណទៀតផង ក្នុងគោលបំណង ថែរក្សាវប្បធម៌ និងអត្តសញ្ញាណរបស់ខ្មែរឱ្យបានគង់វង្សយូរអង្វែង។ឯកឧត្តម មានប្រសាសន៍ទៀតថា រមណីយដ្ឋានអង្គរ គឺជាតំបន់វប្បធម៌នៃអត្តសញ្ញាណរបស់ជាតិខ្មែរ ដូច្នេះការដែលពលរដ្ឋរស់នៅក្នុងតំបន់រមណីយដ្ឋានអង្គរ សាង់សង់ ផ្ទះសម្បែងត្រូវយកតាមគំរូផ្ទះខ្មែរត្រឹមត្រូវ គឺជាការបង្ហាញឡើង នូវតម្លៃវប្បធម៌ឱ្យមានកាន់តែយូរអង្វែងផងដែរ។
សូមបញ្ជាក់ថា រាល់ការស្នើសុំច្បាប់ជួសជុល គឺពុំមានការបង់ប្រាក់ ដល់អាជ្ញាធរជាតិអប្សរានោះទេ។ ប្រជាពលរស់នៅក្នុងរមណីយដ្ឋានអង្គរ និងពេលសាងសង់ផ្ទះ គឺត្រូវនឹកឃើញដល់ផ្ទះខ្មែរ ពីព្រោះផ្ទះខ្មែរមិនត្រឹមតែជាអត្តសញ្ញាណ នៃវប្បធម៌ប៉ុណ្ណោះទេគឺវាមាន ទំនាក់ទំនងជិតស្និទ ជាមួយនិងអាកាសធាតុ មានទំនាក់ទំនងនិងជីវភាព មុខរបរប្រចាំថ្ងៃព្រមទាំងផ្សារភ្ជាប់ទៅនិងជំនឿផង។បើតាមនាយកដ្ឋានដែនដី បានបញ្ជាក់ថា ផ្ទះខ្មែរដែលមានការអនុញ្ញាតអោយសាងសង់នៅក្នុងរមណីយដ្ឋានអង្គរនេះ មាន៥របៀប រួមមាន ផ្ទះខ្មែរឬផ្ទះកឹង ផ្ទះរោងឬ ផ្ទះកន្ដាំង ផ្ទះរោងដោល ផ្ទះរោងឌឿង និងផ្ទះផ្ទះប៉ិត៕
អត្ថបទ៖ លោក ឈិត សាវី
