អំឡុងពេលវិបត្តិជំងឺកូវីដ-១៩នេះ អាជ្ញាធរជាតិអប្សរាមានឱកាសច្រើនក្នុងការកែលម្អបរិស្ថាន និងហេដ្ឋារចនាសម្ព័ន្ធ ក្នុងរមណីយដ្ឋានអង្គរ ខណៈដែលស្ងាត់ភ្ញៀវទៅទស្សនា។ ក្នុងនោះរមណីយដ្ឋានអង្គរនឹងផ្លាស់ប្ដូរការទទួលភ្ញៀវទេសចរ ក្រោយចប់វិបត្តិជំងឺកូវីដ-១៩ នាពេលអនាគតដ៍ខ្លីខាងមុខនេះ។
ឯកឧត្ដម ហង់ ពៅ អគ្គនាយកអាជ្ញាធរជាតិអប្សរា មានប្រសាសន៍កាលពីពេលថ្មីៗនេះថា កាលពីមុនមានជំងឺកូវីដ គឺនៅឆ្នាំ២០១៨ និងឆ្នាំ២០១៨ រមណីយដ្ឋានអង្គរ បានទទួលបានទេសចរច្រើនលើសលប់ ប្រមាណ៥ ទៅ៦លាននាក់ ទាំងទេសចរក្នុងស្រុក និងក្រៅប្រទេស ប៉ុន្ដែភ្ញៀវទេសចរភាគច្រើន សម្រុកចូលទស្សនាតែប្រាសាទធំៗ តែ២ ទៅ៣ប៉ុណ្ណោះ គឺមានអង្គរវត្ត បាយ័ន្ត និងតាព្រហ្ម។ ដោយឡែកប្រាសាទផ្សេងៗទៀត ត្រូវបានរំលង។ ជាមួយនោះបរិបទនៃជំងឺកូវីដ-១៩ បានក្លាយជាឱកាសល្អមួយ សម្រាប់ការសិក្សាពីលំហូរភ្ញៀវទេសចរ ក្នុងការរៀបចំពីរបៀប ចំលំហូរភ្ញៀវដើរតាមប្រាសាទសារជាថ្មី ដោយមិនឱ្យទេសចរទាំងនោះ ដើរស្រេចតែចិត្តចង់របស់ពួកគេនោះទេ។
ឯកឧត្ដម ហង់ ពៅ បានបញ្ជាក់ថា ការចូលទស្សនាតែប្រាសាទមួយៗ ធ្វើឱ្យបរិវេណប្រាសាទតូចចង្អៀត និងការទស្សនាមិនបានគ្រប់ជ្រុងជ្រោយ ព្រមទាំងមិនយល់ពីអត្ថន័យនៃសិល្បៈ និងវប្បធម៌ ក្នុងប្រាសាទនោះទេ។ បើភ្ញៀវទេសចរណ៍ដែលបានទស្សនា យកចិត្តទុកដាក់ ដោយមិនមានការរំខានពីអ្នកដទៃ ពួកគាត់អាចយល់ពីវប្បធម៌ពិតរបស់ខ្មែរ ហើយមានពេលវេលាឱ្យខ្លួនគាត់រីករាយជាមួយស្នាដៃទាំងនោះ មានន័យថា យើងបានផ្តល់គម្លាត និងភាពស្ងាត់ស្ងៀម ដែលយើងកំពុងរៀបចំឱ្យភ្ញៀវទស្សនាអង្គរច្រើនដូចឆ្នាំ២០១៨ ឬលើសជាងឆ្នាំនោះ។ ផែនការរបស់អាជ្ញាធរជាតិអប្សរា គឺភ្ញៀវទេសចរ មិនអនុញ្ញាតឱ្យគាត់ទៅមួយកន្លែងទេ ហើយក្រុមហ៊ុនឯកជន ឬមគ្គុទ្ទេសក៍ គាត់ត្រូវដឹងថា ផែនការភ្ញៀវគាត់ត្រូវយកទៅណា យើងអាចប្រាប់គាត់ថា ម៉ោងនេះ មិនគួរនាំភ្ញៀវមកអង្គរវត្ដទេ គួរតែទៅប្រាសាទនោះវិញ ដែលការរៀបចំនេះ នឹងត្រៀមខ្លួនក្នុងការស្វាគមន៍ភ្ញៀវទេសចរ ក្រោយចប់កូវីដ។ ផែនការគ្រប់គ្រងភ្ញៀវទេសចររបស់អាជ្ញាធរជាតិអប្សរា គឺបានគិតគូរតាំងពីឆ្នាំ ២០១០ មកហើយ។
បើតាមឯកឧត្ដម ហង់ ពៅ ការរៀបចំដំណើរទេសចររបៀបថ្មី គឺចង់ឱ្យភ្ញៀវទេសចរមានបទពិសោធន៍ ទៅនឹងជីវិតរស់នៅប្រចាំថ្ងៃ ដឹងពីវប្បធម៌ ប្រពៃណី និងទំនៀមទម្លាប់ផ្សេងៗ របស់អ្នកស្រុកអង្គរ និងបានយល់ពីបេតិកភណ្ឌមានជីវិត។ បេតិកភណ្ឌមានជីវិត គឺជាប្រពៃណី ទំនៀមទម្លាប់ និងវប្បធម៌របស់ប្រជាជនទាំងនោះហើយ ដែលធ្វើឱ្យអង្គរក្លាយជាបេតិកភណ្ឌមួយដែលមានជីវិត និងត្រូវការថែរក្សាជានិរន្តតទៅ៕
អត្ថបទ និងរូបភាព៖ លោក បូ សាវី
កែសម្រួល៖ លោក លីវ សុខុន
