ថ្លែងក្នុងពិធីដាំកូនឈើនៅវត្តឥន្ទបត្តបុរីហៅវត្តអង្គរខាងជើង ស្ថិតក្នុងសង្កាត់នគរធំក្រុងសៀមរាប ខេត្តសៀមរាប កាលពីថ្ងៃទី២១ ខែតុលា ឆ្នាំ២០២១ ឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ និងជានាយកសាលាភូមិន្ទរដ្ឋបាល មានប្រសាសន៍ថា ការជួបជុំដាំកូនឈើនាពេលនេះមានគោលបំណង ២សំខាន់ គឺ៖
ទី១.ការដាំកូនឈើជាការរួមចំណែកនៃការរៀបចំសួនទេសភាព វប្បធម៌នៅក្នុងវត្តឥន្ទបត្តបុរីហៅអង្គរខាងជើង ដែលជាការរួមចំណែកយ៉ាងសំខាន់ក្នុងការអភិរក្ស និងអភិវឌ្ឍន៍ក្នុងតំបន់រមណីយដ្ឋានអង្គរ និងជាចំណែកមួយជួយបំពេញបន្ថែម នូវកិច្ចប្រឹងប្រែងរបស់អាជ្ញាធរមូលដ្ឋាននិងអាជ្ញាធរជាតិអប្សរា នៅក្នុងក្របខណ្ឌនៃការកែលំអ នូវបរិស្ថាននៅក្នុងតំបន់អង្គរក៍ដូចជាក្នុងខេត្តសៀមរាបបន្ថែមទៀត។ ការដាំដើមឈើមានអត្ថន័យនិងប្រយោជន៍ច្រើនយ៉ាងសម្រាប់យើងទាំងអស់គ្នា ឈើបានផ្តល់ជាម្លប់ ផ្តល់នូវខ្យល់ដកដង្ហើមដែលមានគុណភាព ផ្តល់នូវឧកស៊ីហ្សែន ផ្តល់នូវអត្ថប្រយោជន៍សម្រាប់ការប្រើប្រាស់ក្នុងជីវភាពប្រចាំថ្ងៃ។ ការរួមគ្នាដាំដើមឈើនាពេលនេះជាការចូលរួមរំលឹកនិងតបស្នងសងគុណ ចំពោះធម្មជាតិដែលមានចំពោះយើង។
ទី២.អាស្រ័យដោយទីតាំងភូមិសាស្ត្រតំបន់អង្គរជាតំបន់វប្បធម៌ ប្រវត្តិសាស្ត្រយូរអង្វែងនៃការកកើតព្រះពុទ្ឋសាសនានៅខេត្តសៀមរាប ក៍ដូចជានៅក្នុងព្រះរាជាណាចក្រកម្ពុជា ដំបូងគេហេតុនេះក្នុងនាមគណៈគ្រប់គ្រងសាលាភូមិន្ទរដ្ឋបាល បានសម្រេចយក ទីតាំងវត្តឥន្ទបត្តបុរី ជាចំណុចចាប់ផ្តើមនៃគម្រោងសាកល្បងការរៀបចំសួនទេសភាព វប្បធម៌ ស្របគ្នាជាមួយនឹងការគិតគូរនិងពិចារណា លើគម្រោងសាកល្បងនេះ ដោយគ្រោងនឹងជ្រើសរើសទីតាំងនៃទីអារាមណាមួយក្នុងក្របខ័ណ្ឌទូទាំងប្រទេស ដើម្បីរៀបចំសួនទេសភាពវប្បធម៌ជាបន្តទៅទៀត ដោយកន្លងមកគណៈគ្រប់គ្រងសាលា បានពិនិត្យនិងពិចារណាទៅលើវត្តមួយចំនួននៅខេត្តព្រៃវែង បាត់ដំបង ក្រចេះផងដែរ។
ឯកឧត្តម យក់ ប៊ុនណា មានប្រសាសន៍បន្ថែមថា គម្រោងសាកល្បងនៃការរៀបចំសួន ទេសភាពវប្បធម៌តាមវត្តអារាមជាគម្រោងមួយមានតម្លៃផ្សារភ្ជាប់ព្រះពុទ្ឋសាសនា វប្បធម៌ ប្រវត្តិសាស្ត្រ របស់កម្ពុជា ជាមួយនឹង សាសនាដទៃៗទៀត ដែលមានតាំងពីយូរលង់ណាស់មកហើយ រួមរស់ជាមួយគ្នាដោយសុខដុមរមនា ហើយយើងទាំងអស់គ្នា នៅតែបន្តការរក្សាតម្លៃក្នុងការលើកកម្ពស់ ព្រះពុទ្ឋសាសនា លើកកម្ពស់ វប្បធម៌ជាតិ ក៍ដូចជាការលើកកម្ពស់នូវភាពសុខដុមរមនានៅក្នុងសង្គមជាតិទាំងអស់គ្នា។ កាត្វកិច្ចរបស់យើងទាំងអស់គ្នា គឺបន្តថែរក្សាសន្តិភាពដើម្បីបន្តការអភិវឌ្ឍប្រកបដោយចេរភាព។ ការចូលរួមដាំកូនឈើ គឺជាការចូលរួមតបស្នងសងគុណដល់បុព្វការីជន ដែលបានប្រឹងប្រែងក្នុងការកសាងប្រទេសជាតិឱ្យមានការរីកចម្រើនរហូតមកដល់សព្វថ្ងៃ និងក៍ជាគំរូសម្រាប់យុវជនជំនាន់ក្រោយ នៅក្នុងការប្រឹងប្រែងកសាងសង្គមជាតិរបស់យើងជាបន្តទៅទៀត។
សូមជំរាបថា៖កូនឈើចម្រុះប្រភេទចំនួន ២ពាន់ដើម ត្រូវបានរួមគ្នាដាំនៅចំណុចព្រៃរិចរិលក្បែរវត្តឥន្ទបត្តបុរីហៅវត្តអង្គរខាងជើង ក្រោមការរៀបចំរបស់គណៈគ្រប់គ្រងវត្ត ដឹកនាំដោយ ព្រះចរណសោភ័ណ បណ្ឌិត គង់ សុភាព ថិតប្បញ្ញោ ព្រះរាជាគណៈថ្នាក់កិត្តិយស ព្រះគ្រូចៅអធិការវត្តឥន្ទបត្តបុរីអង្គរខាងជើង សហការជាមួយអាជ្ញាធរជាតិអប្សរា។ ពិធីដាំប្រព្រឹត្តិទៅក្រោមព្រះវត្តមាន គណៈគ្រប់គ្រងវត្ត ភិក្ខុសាមណេរ និងវត្តមានរបស់ ឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ និងជានាយកសាលាភូមិន្ទរដ្ឋបាល ព្រមទាំង គណៈគ្រប់គ្រងសាលា និងលោកគ្រូអ្នកគ្រូកម្មសិក្សាការីមន្ត្រីជាន់ខ្ពស់ក្រុមទី១ វេនព្រឹក លោកស្រី យូ សុភា អភិបាលរងខេត្ត តំណាងឯកឧត្តម ទៀ សីហា អភិបាលនៃគណៈអភិបាលខេត្តសៀមរាប រួមជាមួយថ្នាក់ដឹកនាំអង្គភាពមន្ទីរមួយចំនួនក្នុងខេត្ត លោក ឡុង កុសល អគ្គនាយករង តំណាង ឯកឧត្តម ហង់ ពៅ អគ្គនាយកអាជ្ញាធរជាតិអប្សរា និងសហការី សរុបចំនួនប្រមាណជា២០០ អង្គ/នាក់៕
អត្ថបទ និងរូបភាព៖ លោក យូ វង្ស
កែសម្រួល៖ លោក លីវ សុខុន
