នៅព្រឹកថ្ងៃទី២២ ខែតុលា ឆ្នាំ២០២១នេះ ឯកឧត្ដម ធឹម សំផូត ទីប្រឹក្សាក្រសួងព័ត៌មាន និងជាតំណាងក្រុមហ៊ុន T.S.P.R.S Development Co., LtD បាននាំយកឧបករណ៍តេស្តរហ័ស ពិនិត្យរកមេរោគកូវីដ-១៩ ចំនួន ៥០០ តេស្ត ជូនដល់មន្ទីរពេទ្យជ័យវរ្ម័នទី៧ សម្រាប់ប្រើប្រាស់តាមតម្រូវការរបស់មន្ទីរពេទ្យ និង ជាការចូលរួមទប់ស្កាត់ការឆ្លងរីករាលដាលនៃជំងឺកូវីដ-១៩ ក្នុងមន្ទីរពេទ្យ ។
មានប្រសាសន៍ក្នុងឱកាសនោះ ឯកឧត្ដម ធឹម សំផូត បានបញ្ជាក់ថា ការផ្ដល់ឧបករណ៍តេស្តរហ័ស ពិនិត្យរកមេរោគកូវីដ-១៩ ជូនដល់មន្ទីរពេទ្យជ័យវរ្ម័នទី៧នាពេលនេះ គឺជាការចូលរួមរបស់ក្រុមហ៊ុនជាមួយរាជរដ្ឋាភិបាលកម្ពុជា ពិសេសមន្ទីរពេទ្យជ័យវរ្ម័នទី៧ ក្នុងគោលបំណងបង្ការ និង ទប់ស្កាត់ការឆ្លងរាលដាលជំងឺកូវីដ-១៩ក្នុងសហគមន៍បានទាន់ពេលវេលា ហើយឧបករណ៍តេស្តរហ័សនេះ ក៏បានទទួលការអនុញ្ញាតពីក្រសួងសុខាភិបាលហើយដែរ ដើម្បីក្រុមហ៊ុនយកទៅប្រកបអាជីកម្មនៅក្នុងប្រទេសកម្ពុជា ដែលលទ្ធផលអាចទុកចិត្តបានរហូតដល់ជាង៩០ភាគរយ និងផ្ដល់ភាពងាយស្រួល ដល់អ្នកប្រើប្រាស់ផងដែរ។
ក្នុងនាមថ្នាក់ដឹកនាំនៃមន្ទីរពេទ្យជ័យវរ្ម័នទី៧ លោកសាស្ត្រាចារ្យ យ៉ៃ ចន្ទនា បានថ្លែងអំណរគុណដល់ក្រុមហ៊ុន និងវាយតម្លៃថាឧបករណ៍តេស្តរហ័សនេះ ពិតជាមានសារៈសំខាន់ណាស់ សម្រាប់មន្ទីរពេទ្យជ័យវរ្ម័នទី៧ នៅពេលដែលបងប្អូនប្រជាពលរដ្ឋយើងត្រូវការក្នុងខេត្តសៀមរាប ក៏ដូចជាតាមបណ្តាខេត្តនានា បានមកសម្រាក់ព្យាបាលជំងឺនៅក្នុងមន្ទីរពេទ្យនេះ ដើម្បីទប់ស្កាត់ការចម្លងជំងឺទៅកាន់សមាជិកគ្រួសារ និងមិត្តរួមការងារ ជាពិសេសនៅពេលពេលបុគ្គលណាម្នាក់បានធ្វើដំណើរទៅកន្លែងមានមនុស្សច្រើន ឬសង្ស័យថាមានប៉ះពាល់អ្នកផ្ទុកមេរោគកូវីដ-១៩ជាដើម។
លោក សាស្ត្រាចារ្យ បានបញ្ជាក់បន្ថែមទៀតថា បើទោះបីជាមានឧបករណ៍តេស្តរហ័សនេះក្ដី ប្រការចម្បងត្រូវអនុត្តន៍តាមការណែនាំរបស់រាជរដ្ឋាភិបាល គឺ៣ការពារ និង ៣កុំ ដែលជាការចូលរួមជាចាំបាច់ ក្នុងការទប់ស្កាត់ការឆ្លងរីករាលដាលនៃជំងឺកូវីដ១៩ នៅក្នុងភូមិសាស្ត្រខេត្តសៀមរាប និងប្រទេសកម្ពុជាទាំងមូលផងដែរ ៕
អត្ថបទ និងរូបភាព ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
