តាមរបាយការណ៍របស់លេខាធិការដ្ឋាន នៃគណៈកម្មាធិការត្រួតពិនិត្យគ្រឿងញៀនខេត្ត រយៈពេល៩ខែ ឆ្នាំ២០២១នេះ កម្លាំងសមត្ថកិច្ចខេត្តសៀមរាប បានចុះបង្រ្កាបករណីជួញដូរ ប្រើប្រាស់ និងរក្សាទុកគ្រឿងញៀនខុសច្បាប់ បានចំនួន២៥៣ករណី ដោយឃាត់ខ្លួនមនុស្សចំនួន៩០៧នាក់ ក្នុងនោះស្រីចំនួន ៣១នាក់ ព្រមទាំងបានដកហូតវត្ថុតាងបានមួយចំនួនថែមទៀត រួមមាន ៖ គ្រឿងញៀនប្រភេទមេតំហ្វេតាមីន (Ice)ចំនួន៥.៦៣៧,៣២ក្រាម ,ម៉ូតូចំនួន ០៤គ្រឿង , កាំភ្លើងខ្យល់ចំនួន ០១ដើម , ទូរស័ព្ទចំនួន២៣៣គ្រឿង , ដាវចំនួន ០២ដើម , កាំបិតចំនួន ០១ដើម និង ជញ្ជីងចំនួន ១៦គ្រឿង ។
របាយការណ៍បានបញ្ជាក់បន្ថែមថា ក្នុងចំណោម២៥៣ករណីដែលសមត្ថកិច្ចចុះបង្ក្រាបបាននេះ ក្នុងនោះមាន៖ ករណីជួញដូរ និងរក្សាទុកចំនួន៨៩ករណី ឃាត់ខ្លួនមនុស្ស២៣៦នាក់ ស្រី១៥នាក់ , ករណីប្រើប្រាស់ចំនួន១៥១ករណី ឃាត់ខ្លួនមនុស្ស៦៧២នាក់ ក្នុងនោះស្រីចំនួន១៦នាក់ ហើយបានបញ្ជូនទៅមជ្ឈមណ្ឌលស្តារនីតិសម្បទាអ្នកញៀនគ្រឿងញៀនខេត្ត និង ករណីអនុវត្តតាមដីការចំនួន ១៣ករណី ឃាត់ខ្លួនចំនួន ១៣នាក់ផងដែរ។
ពាក់ព័ន្ធនឹងករណីគ្រឿងញៀននេះ លោក អ៊ុ សាអាត នាយការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តសៀមរាប មានប្រសាសន៍ថា ការិយាល័យប្រឆាំងគ្រឿងញៀនតែងតែចាត់វិធានការណ៍បង្ការនិងទប់ស្កាត់នូវបទល្មើសគ្រឿងញៀន ទោះស្ថិតក្នុងបរិបទនៃជំងឺកូវីដ-១៩ យ៉ាងណាក្ដី ជាពិសេស ក៏បានជំរុញឲ្យគ្រប់បណ្ដាអធិការដ្ឋានក្រុង-ស្រុក ក្រៅពីវិធានការបង្រ្កាប ការផ្សព្វផ្សាយដល់ប្រជាពលរដ្ឋពាក់ព័ន្ធបញ្ហាគ្រឿងញៀន ក៏នៅតែបន្ដធ្វើជាប្រចាំផងដែរ និងតែងតែជំរុញលើកទឹកចិត្តឲ្យប្រជាពលរដ្ឋ ចូលរួមរាយការណ៍ចំពោះករណីសង្ស័យ លើបទល្មើសគ្រឿងញៀន ទៅកាន់អាជ្ញាធរមូលដ្ឋាន ឬ អាជ្ញាធរមានសមត្ថកិច្ច។
ព័ត៌មានជាតិ ថ្មីៗ
គួររំឮកថា ក្នុងរយៈពេល ០៩ខែឆ្នាំ២០២០កន្លងទៅនេះ កម្លាំងសមត្ថកិច្ចខេត្តសៀមរាប បានចុះបង្រ្កាបករណីករណីជួញដូរ ប្រើប្រាស់ និងរក្សាទុកគ្រឿងញៀនខុសច្បាប់ មានចំនួន៣៩០ករណី, ឃាត់ខ្លួនបានចំនួន ១.៣០០នាក់ មានស្ត្រីចំនួន៩៣នាក់ ក្នុងនោះមានជនបរទេសម្នាក់ ព្រមទាំងបានដកហូតវត្ថុតាងបានមួយចំនួនថែមទៀត រួមមាន ៖ ម្សៅមេតំហ្វីតាមីន ( ICE ) ចំនួន ១០.១៩៦,៥១ក្រាម , ថ្នាំគ្រវី ចំនួន០១គ្រាប់ , ថ្នាំម៉ាក់WYចំនួន ១០គ្រាប់ និង ០.៧០ក្រាម , យ៉ាម៉ាចំនួន០,៦ក្រាម , កញ្ឆាចំនួន ៣៥,៥ក្រាម , ថ្នាំគ្រាប់ប្រភេទអ៊ិចស្ដាស៊ី ចំនួន៧,៥ក្រាម , កេតាមីនចំនួន ៣៦,៥ក្រាម , ទូរស័ព្ទដៃចំនួន ៧១៧គ្រឿង , កាំភ្លើងច្នៃចំនួន ០២ដើម , ម៉ូតូចំនួន០៥គ្រឿង , ដាវចំនួន ០១ដើម និងជញ្ជីងថ្លឹងចំនួន ៤៤គ្រឿង ៕
អត្ថបទ ៖ លោកស្រី ហែម បូរ៉ាន្នី
កែសម្រួលអត្ថបទ ៖ លោក លីវ សាន្ត
