ក្រសួងសាធារណការ និងដឹកជញ្ជូន បានបង្ហាញទិន្នន័យ និងរបាយការណ៍ថ្មី គិតត្រឹមពាក់កណ្តាលខែតុលា ឆ្នាំ២០២១ ស្តីពីវឌ្ឍនភាពការងារ នៃគម្រោងស្ថាបនាហេដ្ឋារចនាសម្ព័ន្ធផ្លូវ ៣៨ខ្សែនៅក្រុងសៀមរាប ដោយភ្ជាប់ជាមួយការរំពឹងទុកថា ជាសក្តានុពលរួមដំណើរជាមួយផែនការមេរយ:ពេល ១៥ឆ្នាំ អភិវឌ្ឍន៍ទេសចរណ៍ខេត្តសៀមរាប។
គម្រោងស្ថាបនាហេដ្ឋារចនាសម្ព័ន្ធផ្លូវ ៣៨ខ្សែនៅក្រុងសៀមរាប មានប្រវែងសរុបជាង ១០៦គីឡូម៉ែត្រ ប្រើប្រាស់កញ្ចប់ថវិកា របស់រាជរដ្ឋាភិបាលប្រមាណជាង ១៤៩លានដុល្លាអាមេរិក ដោយប្រើពេលវេលាប្រតិបត្តិការ ១៣ខែ គ្រោងនឹងបញ្ចប់ជាស្ថាពរនៅថ្ងៃទី៣០ ខែធ្នូ ឆ្នាំ២០២១ខាងមុខនេះ។ ទិន្នន័យ និងរបាយការណ៍វឌ្ឍនភាពការងារ ដែលក្រសួងសាធារណការ និងដឹកជញ្ជូន ទើបនឹងបានបញ្ចេញឲ្យដឹងនាចុងសប្តាហ៍ទី៣ ខែតុលា ឆ្នាំ២០២១នេះ ស្តីអំពីបច្ចុប្បន្នភាពការងារ គិតត្រឹមពាក់កណ្តាលខែតុលា លទ្ធផលការងារសម្រេចបានជារួមគឺបានជិត៨៤% នៃទំហំការងារសរុប កើនឡើង២.២៨% បើធៀបទៅនឹងវឌ្ឍនភាពការងារ ថ្ងៃទី២៥ ខែកញ្ញា ឆ្នាំ២០២១កន្លងទៅ។
របាយការណ៍បានបញ្ចាក់ថា នៅក្នុងប្រតិបត្តិការនេះ រួមមានក្រុមការងារត្រួតពិនិត្យបច្ចេកទេសអន្តរក្រសួងចំនួន ៩ក្រុម ហើយអង្គភាពវិស្វកម្មរបស់រដ្ឋ កំពុងអនុវត្តការងារស្ថាបនាហេដ្ឋារចនាសម្ព័ន្ធផ្លូវថ្នល់ ៣៨ខ្សែ មានចំនួន ៦អង្គភាព កងប្រតិបត្តិការនេះអនុវត្តបានលទ្ធផលគិតជារួមស្មើនឹង ៨៥.៦៨%។ ផ្សេងពីនេះ នៅមាននាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន អនុវត្តលើការងារសាងសង់ប្រព័ន្ធលូទឹកកខ្វក់ និងលូរំដោះទឹកភ្លៀង (ក្រៅពីសំណង់ផ្លូវ ៣៨ខ្សែ) ទទួលបានលទ្ធផលជិត៩៩% ដោយឡែកនាយកដ្ឋានសាធារណការ នៃក្រសួងសាធារណការ និងដឹកជញ្ជូន អនុវត្តការងារតម្លើងបរិក្ខាផ្លូវថ្នល់ ទទួលបានលទ្ធផល៥៥%។
បើយោងតាមការពិនិត្យមើលប្រសិទ្ធភាពការងារ ការទទួលខុសត្រូវខ្ពស់លើការអនុវត្តតាមលក្ខណ: បច្ចេកទេសក្នុងសៀវភៅបន្ទុក និងយោងតាមរយ:ពេល នៃការធានាសុពលភាព ដែលបានកំណត់នៅក្នុងកិច្ចសន្យាគម្រោង ក្រុមការងារត្រួតពិនិត្យបច្ចេកទេសអន្តរក្រសួង រំពឹងទុកបានថា គ្រប់ការដ្ឋានសំណង់នឹងមានគុណភាពរឹងមាំ ប្រើប្រាស់ជាប់បានយូរអង្វែង និង បញ្ចប់ការដ្ឋានតាមផែនការដែលបានគ្រោងទុក។ របាយការណ៍ដដែលនេះបានឲ្យដឹងដែរថា នៅក្នុងគម្រោងស្ថាបនាផ្លូវទាំង ៣៨ខ្សែនេះ ផ្លូវចាក់ក្រាលបេតុងបានដំណើរការជិតរួចរាល់ហើយ ហើយក៏កំពុងដំណើរការរៀបចំខឿនចិញ្ចើមផ្លូវ ក្រាលម៉ាតលើផ្លូវថ្មើរជើងផងដែរ នឹងចាក់អ៊ុតកៅស៊ូបេទីមAC បើទោះជាមានការរំខានខ្លះៗ ដោយបាតុភូតធម្មជាតិ នាចុងរដូវវស្សាភ្ញៀងធ្លាក់កន្លងមកនេះយ៉ាងណាក៏ដោយ ។
លទ្ធផលទាំងនេះឆ្លុះបង្ហាញថា បើទោះជាស្ថិតក្រោមវិបត្តិ នៃជម្ងឺកូវិដ-១៩ មិនទាន់បានបញ្ចប់នៅឡើយក៏ដោយ ក៏ប៉ុន្តែ ឱកាសដើម្បីអភិវឌ្ឍន៍នៅតែស្ថិតជាសក្តានុពល សម្រាប់ត្រៀមចូលទៅកាន់អនាគតមួយ រួមដំណើរជាមួយផែនការមេរយ:ពេល ១៥ឆ្នាំ អភិវឌ្ឍន៍ទេសចរណ៍ខេត្តសៀមរាប ដែលជាចក្ខុវិស័យរបស់រាជរដ្ឋាភិបាល ក្រោមកិច្ចដឹកនាំប្រកបដោយគតិបណ្ឌិត នៃសម្តេចតេជោ ហ៊ុន សែន ជានាយករដ្ឋមន្ត្រី ដើមី្បបម្រើផលប្រយោជន៍ជូនមាតុភូមិ និងប្រជាជាតិកម្ពុជា។ ហេដ្ឋារចនាសម្ព័ន្ធផ្លូវ ៣៨ខ្សែ កំពុងជូនដំណើរក្រុងទេសចរណ៍សៀមរាប ឆ្ពោះទៅរកការអភិវឌ្ឍន៍ នៃក្រុងទេសចរណ៍អង្គរ ទំនើប និងឆ្លាតវៃ ៕
អត្ថបទ និងរូបភាព៖ លោក ងិន គីមឡេង
កែសម្រួល៖ លោក លីវ សុខុន
