ព្រឹកថ្ងៃទី២៥ ខែតុលា ឆ្នាំ២០២១ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានអញ្ជើញជាធអិបតី ដឺកនាំកិច្ចប្រជុំ ស្តីពី កិច្ចសហប្រតិបត្តិការជាមួយប្រព័ន្ធផ្សព្វផ្សាយ អាស៊ី-ប៉ាស៊ីហ្វិក ASIA-PACIFIC BROADCASTING UNION (ABU) ដោយមានការចូលរួមពីសំណាក់ ឯកឧត្តមលោកជំទាវជារដ្ឋលេខាធិការ អនុរដ្ឋលេខាធិការ និងថ្នាក់ដឹកនាំនៃអគ្គនាយកដ្ឋានទាំង៥ ក្រោមឱវាទក្រសួងព័ត៌មាន។
នៅក្នុងឱកាសនៃកិច្ចប្រជុំនេះដែរ ឯកឧត្តម ប៉ាង ណាត ទីប្រឹក្សាក្រសួងព័ត៌មាន និងជាអគ្គនាយករងទូរទស្សន៏ជាតិកម្ពុជា បានជម្រាបជូនអំពីកិច្ចសហប្រតិបត្តិការរវាងទូរទស្សន៏ជាតិកម្ពុជា ជាមួយ ABU ដែលបានអនុវត្តកន្លងមក និងទិសដៅបន្តអនុវត្តន៏ជាមួយគ្នា។
ឯកឧត្តម ហាស់ សំអាត អនុរដ្ឋលេខាធិការក្រសួងព័ត៌មាន បានធ្វើរបាយការណ៏ជម្រាបជូន អំពីកិច្ចសហប្រតិបត្តិការទូទៅរវាងក្រសួងព័ត៌មាន និង ABU ហើយជាមួយគ្នានេះ ផ្តោតជាសំខាន់អំពីការចូលជាសមាជិកភាព និងរចនាសម្ព័ន្ធសំខាន់ៗ របស់ ABU ជាពិសេសទាក់ទងនឹង ASIAN VISION និង Legal Department។ ទន្ទឹមនឹងនេះ ឯកឧត្តម ក៏បានស្នើសុំឱ្យការបង្កើតក្រុមការងារដែល ABU បានស្នើសុំដើម្បីពង្រឹងកិច្ចសហការឱ្យកាន់តែប្រសើរថែមទៀត។ ជាមួយគ្នានេះ ដែរ ឯកឧត្តម ឃឹម វុទ្ធី អគ្គនាយកទូរទស្សន៏ជាតិកម្ពុជា ក៏បានជម្រាបជូនពីសកម្មភាព និងការងារសំខាន់ៗមួយចំនួន ដែលត្រៀមធ្វើជាមួយ ABU ដើម្បីធ្វើយ៉ាងណាអោយរាល់កិច្ចសហការបានកាន់តែស៊ីជម្រៅ និងប្រសិទ្ធិភាពការងារបន្ថែមទៀត។
មានប្រាសាសន៍ក្នុងោកាសនោះ ឯកឧត្តមរដ្ឋមន្ត្រី ខៀវ កាញារីទ្ធ បានបញ្ជាក់ថា ការដែលក្រសួងព័ត៌មានធ្វើកិច្ចសហប្រតិបត្តិការជាមួយ ABU ដោយសារកន្លងមកគេអោយតំលៃលើកិច្ចការងារដែលក្រសួង ក៏ដូចជាទូរទស្សន៏ជាតិកម្ពុជាបានធ្វើកន្លងមកនេះ ហើយជាជំហ៊ានបន្ទាប់ក៏ចង់អោយទូរទស្សន៏ជាតិកម្ពុជា ពិនិត្យលទ្ធភាពក្នុងការផ្សាយដំណឹងនានា របស់ ABU ។ ដូច្នេះគ្រប់ផ្នែកពាក់ពន្ធ័ នៃក្រសួងព័ត៌មាន ត្រូវពិនិត្យ និងពិភាក្សាឡើងវិញ លើកិច្ចសហប្រតិបត្តិការរគ្នាជាមួយ ABU ដើម្បីពង្រឹង និងពង្រីកកិច្ចសហប្រតិបត្តិការឱ្យកាន់តែស៊ីជម្រៅ ដែលនឹងផ្តល់អត្ថប្រយោជន៍យ៉ាងច្រើន ក្នុងការជួយដល់ការអភិវឌ្ឍន៍វិស័យសារព័ត៌មាន និងប្រព័ន្ធផ្សព្វផ្សាយនៅកម្ពុជា ឱ្យកាន់តែប្រសើរឡើងថែមទៀត។ ឆ្លៀតក្នុងឱកាសនៃកិច្ចប្រជុំដែលពាក់ពន្ធ័ការងារផ្សព្វផ្សាយដំណឹង និងព័ត៌មាននានានេះដែរ ឯកឧត្តម រដ្ឋមន្រ្តី ខៀវ កាញារីទ្ធ បានបញ្ជាក់ឡើងវិញថា កាលពីមុនព័ត៌មាន គឺជាអំណាច តែឥឡូវនេះសំខាន់គឺការបែងចែង ព័ត៌មានបានរហ័សទើបរក្សាអំណាចបានរឹង។
គួររំលឹកថា ABU ត្រូវបានបង្កើតឡើងតាំងពីឆ្នាំ១៩៤៦មកម្ល៉េះ ក្នុងនាមជាសមាគមវិជ្ជាជីវៈមិនរកប្រាក់ចំណេញ និងមិនមែនរដ្ឋាភិបាលដោយមិនប្រកាន់ និន្នាការនយោបាយ និងមានអាណត្តិ ដើម្បីជួយដល់ការអភិវឌ្ឍន៍ការផ្សព្វផ្សាយនៅក្នុងតំបន់៕
អត្តបទនិងរូបភាព៖ទូរទស្សន៏ជាតិកម្ពុជា
