នៅព្រឹកថ្ងៃទី០២ ខែវិច្ឆិកា ឆ្នាំ២០២១នេះ លេខាធិការដ្ឋានក្រុមការងារវាយតម្លៃទីក្រុងស្អាតខេត្ត បានរៀបចំកិច្ចប្រជុំពិភាក្សាស្តីពី ការចងក្រងឯកសារសម្រាប់ចូលរួមការប្រឡងប្រណាំងទីក្រុងស្អាតលើកទី៣ នៅសាលប្រជុំនៃមន្ទីរទេសចរណ៍ខេត្តសៀមរាប ដើម្បីពិភាក្សាផ្លាស់ប្តូរយោបល់លើ សូចនាករ និតិវិធី ការដាក់ពាក្យស្នើសុំការចូលរួម ជាបេក្ខភាពនៃការប្រឡងប្រណាំងទីក្រុងស្អាតលើកទី៣ ដោយមានការអញ្ជើញចូលរួមពីសំណាក់លោក លោកស្រី ជាប្រធាន អនុប្រធាន និងសមាជិកសមាជិកាក្រុមការងារវាយតម្លៃទីក្រុងស្អាតខេត្តសៀមរាបចំនួនប្រមាណជាង៣០រូប ។
លោក ង៉ូវ សេងកាក់ ប្រធានមន្ទីរទេសចរណ៍និងជាប្រធានលេខាធិការដ្ឋានក្រុមការងារវាយតម្លៃទីក្រុងស្អាតខេត្តសៀមរាប មានប្រសាសន៍ថា៖ ចលនាប្រឡងប្រណាំងទីក្រុងស្អាត រៀបចំឡើងក្នុងគោលបំណងលើកកម្ពស់សោភ័ណភាពបរិស្ថានអនាម័យ និងសណ្តាប់ធ្នាប់ទីក្រុង-ខណ្ឌ ទាំង៤១ នៃព្រះរាជាណាចក្រកម្ពុជា ជាពិសេសចូលរួមក្នុងកម្មវិធីនយោបាយ និងយុទ្ធសាស្រ្តអភិវឌ្ឍនានារបស់រាជរដ្ឋាភិបាល និងដើម្បីជាការលើកទឹកចិត្ត រាជរដ្ឋាភិបាលនឹងផ្តល់រង្វាន់ដល់ទីក្រុង-ខណ្ឌ ដែលបានខិតខំប្រឹងប្រែងក្នុងការរៀបចំ និងអភិវឌ្ឍន៍ទីក្រុងខ្លួន ពិសេសថែរក្សាការពារបរិស្ថាន និងបានជំរុញឲ្យតួអង្គសំខាន់ៗក្នុងវិស័យ ទេសចរណ៍ បងប្អូនប្រជាពលរដ្ឋេ និងគ្រប់ភាគីពាក់ព័ន្ធបានចូលរួមចំណែក យ៉ាងសកម្មក្នុងការគ្រប់គ្រងបរិស្ថាននៅតាមបណ្តាទីក្រុង។
លោក ង៉ូវ សេងកាក់ មានប្រសាសន៍បន្ថែមថា៖សូចនាករនិងលក្ខណៈវិនិច្ឆ័យរបស់គណៈកម្មាធិការជាតិវាយតម្លៃទីក្រុងស្អាត នឹងធ្វើការវាយតម្លៃលើសូចនាករសំខាន់ៗ ចំនួន៧ រួមមាន ៖ ១. សូចនាករគោលនៃការរៀបចំ និងគ្រប់គ្រងបរិស្ថាន , ២. សូចនាករគោលនៃភាពស្អាត , ៣. សូចនាករគោលនៃការគ្រប់គ្រងសំណល់ , ៤. សូចនាករគោល នៃការបញ្រ្ជាបការយល់ដឹង , ៥. សូចនាករគោលនៃតំបន់បៃតង , ៦. សូចនាករគោលនៃសុវត្ថិភាព សុខាភិបាល សន្តិសុខ និងសណ្តាប់ធ្នាប់ទីក្រុង និង ៧. សូចនាករគោលនៃហេដ្ឋារចនាសម្ព័ន្ធ និងសម្បទាទេសចរណ៍។
លោកប្រធានលេខាធិការដ្ឋានក្រុមការងារវាយតម្លៃទីក្រុងស្អាតខេត្តសៀមរាប មានប្រសាសន៍ទៀតថា៖ ការរៀបចំបង្កើតនូវការប្រឡងប្រណាំងទីក្រុងស្អាត បានជួយលើកកម្ពស់ជីវភាព និងមជ្ឈដ្ឋានរស់នៅរបស់ប្រជាពលរដ្ឋនៅតាមទីក្រុង ពិសេសការកាត់បន្ថយភាពក្រីក្រតាមរយៈវិស័យទេសចរណ៍ ដោយជំរុញ និងពង្រីកលំហូរភ្ញៀវទេសចរណ៍ទៅគ្រប់តំបន់នៃព្រះរាជាណាចក្រកម្ពុជា ដូច្នេះសម្រាប់ការប្រឡងប្រណាំងទីក្រុងស្អាតលើកទី៣នេះ មានសុពលភាព៣ឆ្នាំ ដោយគិតពីឆ្នាំ២០២២ដល់ឆ្នាំ២០២៥ ហើយគណៈកម្មាធិការជាតិវាយតម្លៃទីក្រុងស្អាត បានកំណត់យកការបរិច្ឆេទនៃការដាក់ពាក្យតាមប្រព័ន្ឋអនឡាញ ចាប់ពីពេលនេះរហូតដល់ថ្ងៃទី១៥ ខែវិច្ឆិកា ឆ្នាំ២០២១ និងចុះពិនិត្យផ្ទៀងផ្ទាត់វាយតម្លៃទីតាំងជាក់ស្តែងរបស់ក្រុង ខណ្ឌបេក្ខភាព ចន្លោះពីថ្ងៃទី១៦ ខែវិច្ឆិកា ឆ្នាំ២០២១ ដល់ថ្ងៃទី១៥ ខែមករា ឆ្នាំ២០២២។
គួររម្លឹកថា៖នៅឆ្នាំ២០១៨ខេត្តសៀមរាប ទទួលបានពានរង្វាន់ផ្ការំដួល៣ទងនៃការប្រឡងប្រណាំងទីក្រុងស្អាត ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត