អាជ្ញាធរថៃ បានចាប់ផ្ដើមបើកទ្វារប្រទេសឡើងវិញ សម្រាប់ទទួលភ្ញៀវបរទេស ដែលបានទទួលការចាក់វ៉ាក់សាំងកូវីដ-១៩គ្រប់ដូសរួចរាល់ហើយ មកពីបណ្ដាប្រទេស ចំនួន៦០ ដែលមានហានិភ័យតិចពីជំងឺកូវីដ-១៩។
សារព័ត៌មាន BBC បានចេញផ្សាយ នៅល្ងាចថ្ងៃទី១ ខែវិច្ឆិកា ថា អ្នកទេសចរបរទេសរាប់ម៉ឺននាក់ មកពីបណ្ដាប្រទេសនានា ត្រូវគេរំពឹងថា នឹងមកដល់ប្រទេសថៃ នៅថ្ងៃទី២ ខែវិច្ឆិកា។ ថៃបានបើកឡើងវិញ សម្រាប់ទទួលអ្នកទេសចរបរទេស ក្រោយការរឹតបន្ដឹង ដើម្បីទប់ស្កាត់ជំងឺកូវីដ-១៩ រយៈពេល១៨ខែកន្លងមក។
អាជ្ញាធរថៃ បានអនុញ្ញាតដល់ភ្ញៀវបរទេស ដែលបានចាក់វ៉ាក់សាំងកូវីដ-១៩រួចរាល់ហើយ មកពីប្រទេស ចំនួន៦០ ដែលមាននិភ័យតិច ។ អ្នកបរទេសទាំងនោះ នឹងអនុញ្ញាតឲ្យមកប្រទេសថៃ ហើយគេចពីការធ្វើចត្ដាឡីស័ក នៅតាមសណ្ឋាគារ។
ចំនួនភ្ញៀវទេស ត្រូវបានគេព្យាករ នឹងកើតដល់ជាង១៥លាននាក់ នៅឆ្នាំ២០២២ ហើយនាំប្រាក់ចំណូលដល់ប្រទេសថៃ ជាង៣០ពាន់លានដុល្លារសហរដ្ឋអាមេរិក។
ទោះជាយ៉ាងណា រហូតមកដល់ពេលនេះ ប្រទេសជាច្រើនទៀត ដែលមានហានិភ័យខ្ពស់ពីជំងឺកូវីដ-១៩ ក៏នៅតែរឹតបន្ដឹង ដោយមានពលរដ្ឋប្រហែល៤២ភាគរយបានចាក់វ៉ាក់សាំងកូវីដ-១៩រួចរាល់ហើយ។ មុនពេលមានរោគរាតត្បាតនេះ នាឆ្នាំ២០១៩ ថៃទទួលបានភ្ញៀវទេសចិន ជាង១២លាននាក់ ហើយជនជាតិចិនក្លាយជាអ្នកទេសចរបរទេសច្រើនជាងគេបំផុតរបស់ប្រទេសថៃ៕
