នៅថ្ងៃទី០១ ខែវិច្ឆិកា ឆ្នាំ២០២១ នេះ អាជ្ញាធរជាតិអប្សរា ព្រះសង្ឃ និងវិស័យឯកជន បានរួមគ្នាដាំកូនឈើចំនួន ២,៥០០ដើម នៅបរិវេណវត្តព្រះវិហារប្រាំពីរល្វែងក្នុងរមណីយដ្ឋានអង្គរ ដើម្បីលើកកំពស់និងសោភណ្ឌភាពប្រាង្គប្រាសាទបុរាណ។
ឯកឧត្តម ហង់ ពៅ អគ្គនាយកអាជ្ញាធរជាតិអប្សរាមានប្រសាសន៍ថា អាជ្ញាធរបានចាប់ផ្តើមការងារដាំកូនឈើឡើងវិញក្នុងរមណីយដ្ឋានអង្គរនេះ ដោយចាប់ពីឆ្នាំ២០០៤ ដែលរហូតមកដល់ពេលនេះ មានរយៈពេល១៧ឆ្នាំ មានកូនឈើប្រមាណ២លានដើមហើយ ដែលបានដាំនៅរមណីយដ្ឋានមួយនេះ ដើម្បីបង្កើនសោភណ្ឌភាពប្រាង្គប្រាសាទបុរាណ។
ឯកឧត្តមបន្ថែមថា ចំនួនប្រមាណ២លានដើមនេះមិនរាប់ដើមឈើដែលអាជ្ញាធរជាតិអប្សរា បានចែកចាយដល់សាធារណជនយកទៅដាំទាំងក្នុង និងក្រៅខេត្តសៀមរាបនោះទេ។ឯកឧត្តមអគ្គនាយក ក៏បានរំលឹកពីអត្ថប្រយោជន៍ជាច្រើនរបស់ដើមឈើ ទាំងផ្នែកបរិស្ថាន និងការអភិរក្ស។ ឯកឧត្តមពន្យល់ថា ដើមឈើតែងទទួលបាននូវភាពសំណើមខ្ពស់ ដែលវាជួយកាត់បន្ថយកម្ដៅនៅលើថ្មប្រាសាទ និងទប់ខ្យល់ មិនឱ្យប៉ះពាល់ផ្ទាល់ទៅលើថ្មប្រាសាទជាដើម ដែលជួយលើការអភិរក្សមួយផ្នែកធំ។ បន្ថែមពីនេះ ដើមឈើ ក៏មានតួនាទីជួយស្រូបយកខ្យល់កាបូនអុកស៊ីត មិនឱ្យសាយភាយក្នុងបរិយាកាសជាដើម ដែលកាបូននោះវានឹងក្លាយជាភ្លៀងអាស៊ីត ពេលចូលទៅក្នុងបរិយាកាស។
ជាមួយគ្នានោះដែរ ឯកឧត្តម ហង់ ពៅ ក៏បានថ្លែងអំណរគុណដល់លោកជំទាវឧកញ៉ាកិត្តិបណ្ឌិត សៀង ចាន់ហេង អគ្គនាយិកាក្រុមហ៊ុន ហេង អភិវឌ្ឍន៍ ដែលបានសហការជួយរៀបចំដាំដើមឈើ និងកែលម្អបរិវេណវត្តព្រះវិហារវត្តប្រាំពីរល្វែងឡើងវិញ ដោយឯកឧត្តមអគ្គនាយកពន្យល់ថា គោលការណ៍របស់អាជ្ញាធរជាតិអប្សរា គឺចង់ឱ្យវត្តទាំងអស់ក្នុងរមណីយដ្ឋានអង្គរមានសណ្ដាប់ធ្នាប់ និងបរិស្ថានល្អ ស័ក្ដិសមជាទីសក្ការបូជារបស់ប្រជាជនខ្មែរយើងទាំងមូល និងចង់ឱ្យវត្តទាំងអស់ ក្លាយជាគំរូដល់វត្តនៅតាមតំបន់ដទៃទៀត ជាពិសេសការដាំដើមឈើធានាបាននូវហានីភ័យទៅលើប្រាង្គប្រាសាទបុរាណ៕
អត្ថបទ និង រូបភាព៖ លោក ឈិត សាវី
