ក្នុងវិបត្ដិជំងឺកូវីដ-១៩ជាសកល ក៏ដូចជាប្រទេសកម្ពុជា ដែលជាមហន្តរាយធំធេង ដោយឡែកខេត្តសៀមរាប បានជួបប្រទះនូវបញ្ហារីករាលដាល នៃជំងឺកូវីដ-១៩ ឆ្លងចូលសហគមន៍ ក្នុងព្រឹត្តិការណ៍ ២០ កុម្ភ: បើគិតត្រឹមថ្ងៃទី៣១ ខែតុលា ឆ្នាំ២០២១នេះ មានអត្រាអ្នកឆ្លងជំងឺនេះ ក្នុងខេត្តសៀមរាបសរុបចំនួន ១៩,៩៥៤នាក់ ស្រី ១០,៥៨០នាក់ ព្យាបាលជាសះស្បើយ ចំនួន ១៩,១៥៧នាក់ កំពុងសម្រាកព្យាបាលចំនួន ៥៤២នាក់ និងមានករណីស្លាប់ដោយសារឆ្លងមេរោគកូវីដ-១៩ ចំនួន ២៨១នាក់។ នេះបើតាមប្រសាសន៍ឱ្យដឹងពីលោក ពិន ប្រាកដ អភិបាលរងខេត្តទទួលបន្ទុកវិស័យសុខាភិបាលខេត្តសៀមរាប។
ជាមួយគ្នានោះ ក្នុងរបាយការណ៍ដែលបង្ហាញដោយ លោក ង៉ាន់ ភិរុណ អភិបាលរងខេត្ត ក្នុងឱកាស នៃកិច្ចប្រជុំដើម្បីជំរុញការបង្កើតលេខាធិការដ្ឋានថ្នាក់ខេត្ត ក្រុង ស្រុក ក្នុងការបង្ហាញលទ្ឋផលសកម្មភាពការងារ និងតម្រង់ទិសលើទម្រង់របាយការណ៍ក្រុមការងាររាជរដ្ឋាភិបាលចុះមូលដ្ឋានរាជធានី ខេត្ត កាលពីថ្ងៃទី០៤ ខែវិច្ឆិកា ឆ្នាំ២០២១ បង្ហាញថា៖ ដើម្បីប្រយុទ្ធប្រឆាំងនឹងទប់ស្កាត់ការឆ្លងរីករាលដាល នៃជំងឺកូវីដ-១៩ ក្នុងសហគមន៍ កន្លងមករដ្ឋបាលខេត្ត បានរៀបចំមណ្ឌលចត្តាឡីស័ក ក្នុងភូមិសាស្រ្តក្រុង-ស្រុកទាំង១២ សរុបមានចំនួន ១៤៧កន្លែង និងបានបើកប៉ុស្តិ៍ពិនិត្យសុខភាពបឋម និងចុះឈ្មោះ ឬ ស្កែន QR Code Stop Covid-19 ទប់ស្កាត់ជំងឺកូវីដ-១៩ ចំនួន ០៣ទីតាំង នៅព្រំប្រទល់ស្រុកជីក្រែង ខេត្តសៀមរាប និងស្រុកស្ទោង ខេត្តកំពង់ ព្រំប្រទល់ស្រុក ក្រឡាញ់ ខេត្តសៀមរាប និងស្រុកព្រះនេត្រព្រះ ខេត្តបន្ទាយមានជ័យ និងព្រំប្រទល់ស្រុកស្រីស្នំ ខេត្តសៀមរាប និងខេត្តឧត្តរមានជ័យ។
ក្នុងនាមក្រុមប្រឹក្សានិងរដ្ឋបាលខេត្ត លោក អភិបាលរងខេត្ត បានសម្តែងនូវការអរគុណយ៉ាងជ្រាលជ្រៅចំពោះសម្តេចអគ្គមហា- សេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានផ្តល់វ៉ាក់សាំងចាក់ជូនប្រជាពលរដ្ឋក្នុងខេត្តនេះ និងថ្លែងអំណរគុណចំពោះសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តសៀមរាប ដែលបានបញ្ជូនកម្លាំងគ្រូពេទ្យ ដើម្បីចាក់ជូនប្រជាពលរដ្ឋឱ្យបានទាន់ពេលវេលា ដោយគិតត្រឹមថ្ងៃទី៣១ ខែតុលា ឆ្នាំ២០២១ ប្រជាពលរដ្ឋបានចាក់វ៉ាក់សាំងទាំង ២ដូស រួចរាល់សរុបចំនួន ៨៣៣,៤៩៩នាក់ ស្រី ៤១៧,៨៤៣នាក់។ ក្នុងនោះ អាយុ១៨ឆ្នាំឡើងចំនួន ៥៩៦,២៩៥នាក់ ស្រី ២៩៩,៧៣៣នាក់, អាយុ ចាប់ពី១២ ដល់ក្រោម ១៨ឆ្នាំចំនួន ១២៧,១៨៥នាក់ ស្រី ៦៣,៧៤២នាក់ និងកុមារអាយុចាប់ពី ៦ ដល់ក្រោម១២ឆ្នាំចំនួន ១១០,០១៩នាក់ ស្រី ៥៤,៣៦៨នាក់ និងដូសទី៣ ឬដូសជំរុញចាក់រួចសរុបចំនួន ២១,៨៨៧នាក់ ស្រី ១០ ០០៧នាក់។ ហើយបច្ចុប្បន្នកំពុងដំណើរការចាក់ជូនកុមារអាយុ ៥ឆ្នាំផងដែរ៕
ព័ត៌មានជាតិ ថ្មីៗ
អត្ថបទ និងរូបភាព៖ លោក យូ វង្ស
កែសម្រួល៖ លោក លីវ សុខុន
