រដ្ឋបាលខេត្តសៀមរាប នៅថ្ងៃទី០៣ ខែវិច្ឆិកាកន្លងទៅនេះ បានចេញសេចក្ដីជូនដំណឹងមួយ ដោយបានស្នើរឱ្យពលរដ្ឋដែលមានសំណង់នៅលើដីចំណីស្ទឹងសៀមរាប ដែលនៅសេសសល់ឲ្យឆាប់រុះរើជាបន្ទាន់ ដើម្បីអនុវត្តគម្រោងស្ដារស្ទឹងសៀមរាបជំហាន២ (KHM-18) ដែលមានប្រវែង៥គីឡូម៉ែត្រ។
សេចក្ដីជូនដំណឹង បានឱ្យដឹងថា ដោយមានកិច្ចសហការរវាងរដ្ឋបាលខេត្តសៀមរាបជាមួយក្រសួងសាធារណការ និងជញ្ជូន នឹងអនុវត្តគម្រោងស្តារស្ទឹងសៀមរាបជំហាន២ ក្រោមឥណទានរបស់ធនាគារអារហ៍ នីហរណ៍សាធារណរដ្ឋកូរ៉េ ដើម្បីរៀបចំស្ដារស្ទឹងសៀមរាប បញ្ចៀសទឹកលិចក្រុងសៀមរាប នារដូវវស្សា ចាប់ពីចំណុចស្ពានវាងក្រុងទៅប៉ែកខាងក្រោមរហូតដល់ ភូមិអារញ្ញ ដែលមានប្រវែង ៥គីឡូម៉ែត្រ ស្ថិតនៅក្នុងសង្កាត់សៀមរាប ខេត្តសៀមរាប។ ដូចនេះសូមឲ្យបងប្អូនប្រជាពលរដ្ឋដែលមិនទាន់រុះរើសំណង់ដែលនៅសល់នេះ សូមឆាប់រុះរើសចេញ ដើម្បីឱ្យការអនុវត្តគម្រោងប្រព្រឹត្តតាមផែនការដែលបានគ្រោងទុក។
ជាមួយការណែនាំនេះ គឺបន្ទាបពីរដ្ឋបាលខេត្តសៀមរាប បានពិនិត្យឃើញថា នៅមានបងប្អូនប្រជាពលរដ្ឋ ចំនួន ០៥គ្រួសារ ដែលបានទទួលយក គោលនយោបាយរួចហើយ មិនទាន់បានរុះរើសំណង់របស់ខ្លួនចេញពីទីតាំង និងមានប្រជាពលរដ្ឋ ចំនួន២គ្រួសារផ្សេងទៀត បានមកសាងសង់លើដីចំណីស្ទឹង ដែលបានដោះស្រាយគោលនយោបាយរួចហើយ។ ហេតុនេះសូមបងប្អូនធ្វើការរុះរើដោយខ្លួនឯង ដោយទុកឱ្យរយៈពេល ៧(ប្រាំពីរ)ថ្ងៃ ចាប់ពីថ្ងៃជូនដំណឹងនេះ។ ក្នុងនោះអាជ្ញាធរខេត្តសង្ឃឹមថា បងប្អូនប្រជាពលរដ្ឋ និងសាធារណជន ដែលជាម្ចាស់សំណង់ដីចំណីស្ទឹងសៀមរាបខាងលើ ដែលទទួលយកការដោះស្រាយគោលនយោបាយរួចរាល់ និងម្ចាស់ សំណង់ ២គ្រួសារទៀត ត្រូវចូលរួមអនុវត្តរុះរើសំណង់របស់ខ្លួន តាមពេលវេលាកំណត់ ហើយប្រសិនបើបងប្អូនមិនអនុវត្តតាមសេចក្តីជូនដំណឹងនេះ អាជ្ញាធរនឹងដឹកនាំកម្លាំងចម្រុះចុះរុះរើ ដោយពុំទទួលខុសត្រូវលើការខូចខាតទ្រព្យសម្បត្តិរបស់បងប្អូនឡើយ៕
អត្ថបទ និង រូបភាព៖ លោក ឈិត សាវី
