នាព្រឹកថ្ងៃទី០៨ ខែវិច្ឆិកា ឆ្នាំ២០២១នេះ ឯកឧត្ដម ឧត្ដមសេនីយ៍ឯក ពៅ ហេង មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤ បានអញ្ជើញជយបសំណេះសំណាល និងបំពាក់ឋានន្ដរស័ក្ដិ ជូននាយទាហាន នាយទាហានរង ចំនួន ១៤៦នាក់ ដែលចំណុះឱ្យទីបញ្ជាការយោធភូមិភាគទី៤ ដែលចូលសោធននិវត្ដន៍នៅឆ្នាំ២០២១ ដើម្បីលើកទឹកចិត្ដដល់ពួកគាត់ ដែលបានលះបង់បំពេញភារៈកិច្ចជូនជាតិមាតុភូមិបាលល្អប្រសើរនាពេលកន្លងមក។
មានប្រសាសន៍ក្នុងឱកាសនោះ លោកឧត្ដមសេនីយ៍ឯក ពៅ ហេង នាមបញ្ចាក់ថា យុទ្ធជនដែលត្រូវចូលសោធន៍និវត្តចំនួន ១៤៦នាក់ នៅពេលនេះ គឺជាអ្នកដែលបានចូលរួមធ្វើពលីកម្ម ដ៏ធំធេងក្នុងការរំដោះប្រទេសជាតិ បានផ្តួលរំលំទប់ស្កាត់ ការវិលត្រឡប់ឡើងវិញ នៅរបបប្រល័យពូជន៍ សាសន៍ ប៉ុល ពត និងបានចូលរួមយ៉ាងសកម្មក្នុងការចលនា បង្រួបបង្រួមជាតិតាមរយៈនយោបាយ ឈ្នះ ឈ្នះ ដែលនាំមកនូវសន្តិភាព និងការអភិវឌ្ឍន៍ប្រទេសជាតិ។ ជាមួយគ្នានោះ ការបំពាក់ឋានន្តរសក្តិជូនយោធិនចូលសោធននិវត្តន៍នាពេលនេះ គឺជាការបំពាក់ឋានន្តរសក្តិ គោលនយោបាយរបស់រាជរដ្ឋាភិបាល ដែលតែងតែយកចិត្តទុកដាក់ គិតគូរដល់បងប្អូន យោធិនចូលសោធន៍និវត្ត ត្រូវបានតម្លើងឋានន្តរសក្តិ នៅពេលនេះដោយ ឈរលើគោលការណ៍ រួមមាន ផ្តល់កិត្តិយសលើកទឹកចិត្ត តបស្នងសងគុណ នូវគុណណូបការៈ ចំពោះការ លៈបង់ដ៏ធំធេង មកលើមាតុភូមិ និងប្រជាជន និងដើម្បីលើកស្ទួយជីវភាព បងប្អូនឲ្យកាន់តែប្រសើរ ពេលវិលត្រឡប់ទៅរួមរស់នៅ ក្នុងជីវភាពស៊ីវិលវិញ។
លោកឧត្ដមសេនីយ៍ បន្ថែមថា នៅឆ្នាំ២០២២ខាងមុខនេះ យោធិនចំនួនជាង ១០០នាក់ទៀត ដែលចំណុះឱ្យយោធភូមិភាគទី៤នេះ នឹងត្រូវចូលសោធននិវត្ដន៍បន្ថែមទៀតផងដែរ។
លោកឧត្ដមសេនីយ៍ បានមានប្រសាសន៍ទៀតថា គោលនយោបាយរបស់រាជរដ្ឋាភិបាល តែងតែយកចិត្តទុកដាក់ គិតគូរពីសុខទុក្ខ យោធិនយើងគ្រប់ពេលវេលា តាមរយៈការតម្លើងប្រាក់បៀវត្ស និងប្រាក់អត្ថប្រយោជន៍ផ្សេងៗទៀត ទោះបីកំពុងបំពេញភារៈកិច្ច ពេលចូលនិវត្តន៍ ឬក្រោយចូលនិវត្តន៍ហើយក៍មិនអាច បំភ្លេចបានឡើយចំពោះ បងប្អូនយោធិនចូលនិវត្តន៍ដែលបានរួមចំណែក ធ្វើពលីកម្មយ៉ាងធំធេងក្នុងបុព្វហេតុជាតិមាតុភូមិ និងប្រជាជន នឹងបានចាត់ទុកជាតំរូវភាពមួយ សម្រាប់ប្រជាជនកម្ពុជា និងកងយោធពលខេមរភូមិន្ទ ចាំទុកមិនអាចបំភ្លេចបាន។ នាឱកាសនោះផងដែររ លោកឧត្ដមសេនីយ៍ក៍បាននាំយកថវិកាផ្ទាល់របស់ឯកឧត្ដម ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោកចំនួន ២៩លានរៀល និងថវិកាលោកឧត្ដមសេនីយ៍ចំនួន ៧លានរៀល ជូនដល់យោធិនដែលចូលសោធននិវត្ដន៍ផងដែរ។
ឯកឧត្ដមក៍បានបញ្ជាក់ផងដែរថា ទោះបីពួកគាត់បានចូលនិវត្ដន៍ហើយវិលទៅជួបជុំគ្នាសារវិញក្ដី ក៍ប៉ុន្ដែក្ដីស្រលាញ់និងរាប់អានគ្នា នៅតែមានក្នុងបេះដូង នៃកងកម្លាំងយោធាជាប់ជានិច្ច។ ឯកឧត្ដមក៍បានផ្ដាំផ្ញើដល់យោធិនទំាងអស់ត្រូវររៀនរស់តាមបែបគន្លងថ្មី ក្នុងការសម្របខ្លួន ជាមួយទៅនឹងជំងឺកូវីដ-១៩ ដើម្បីស្តារសេដ្ឋកិច្ចប្រទេសជាតិឡើងវិញ៕
អត្ថបទ និង រូបភាព៖ លោក ឈិត សាវី
