ថ្លែងក្នុងឱកាសប្រគល់សម្លៀកបំពាក់ ក្រម៉ា និងសារ៉ុង ដល់ប្រជាការពារភូមិ និងប្រជាសហគមន៍ នៅសង្កាត់ជ្រាវ ក្រុងសៀមរាប នៅព្រឹកថ្ងៃទី០៨ ខែវិច្ឆិកា ឆ្នាំ២០២១នេះ លោក នួន ពុទ្ធារ៉ា អភិបាលក្រុងសៀមរាប បានមានប្រសាសន៍ថា បច្ចុប្បន្ននេះ ប្រជាការពារភូមិ និងប្រជាសហគមន៍ គឺចូលរួមចំណែកយ៉ាងច្រើនក្នុងការការពារសន្តិសុខ និងការពាធនធានធម្មជាតិ ដែលមាននៅក្នុងមូលដ្ឋាន ដោយពួកគាត់បានធ្វើការងារដោយស្ម័គ្រចិត្តមិនមានប្រាក់ខែនោះទេ។ ជាពិសេសក្នុងការចូលរួមប្រយុទ្ធប្រឆាំងកូវិដ-១៩ បងប្អូនប្រជាការពារបានចេញមកជួយយ៉ាងមមាញឹក បើទោះបីដឹងថា ប្រឈមនឹងការឆ្លងជំងឺដ៏កាចសាហាវក៏ដោយ។
លោកអភិបាលក្រុងសៀមរាបបន្តថា ការចូលរួមដ៏សកម្មរបស់កម្លាំងប្រជាការពារភូមិ និងប្រជាសហគមន៍នេះ គឺអាចចាត់ទុកថា ជាកម្លាំងស្នូលដ៏សំខាន់ នៅមូលដ្ឋានដោយផ្ទាល់ មិនថា ស្ថិតនៅក្នុងកាលៈទេសៈលំបាកយ៉ាងណាក៏ដោយ។ លោកបានលើកទឹកចិត្តបងប្អូនប្រជាការពារភូមិឱ្យបន្តចូលរួមឱ្យសកម្មបន្តទៀត ដើម្បី ភូមិ ឃុំ យើងមានសន្តិសុខសុវត្ថិភាពល្អ ធនធានធម្មជាតិរបស់បាននៅយូអង្វែង និងកន្លែងសម្រាប់បម្រើឱ្យទេសចរណ៍សហគមន៍យើង៕
អត្ថបទ និង រូបភាព៖ លោក ខេង ឧត្តម
