នៅព្រឹកថ្ងៃទី២៣ ខែវិច្ឆិកា ឆ្នាំ២០២១នេះ រដ្ឋបាលខេត្តសៀមរាប បានរៀបចំទិវាអនាម័យបរិស្ថានជាតិ២៣វិច្ឆិកា ក្រោមប្រធានបទ ភូមិឋានស្អាត សុខភាពល្អ ជីវិតរីករាយ ក្រោមអធិបតីភាពលោក ពិន ប្រាកដ អភិបាលរងខេត្តសៀមរាប ដោយមានការចូលរួមពីសំណាក់លោក លោកស្រី ជាថ្នាក់ដឹកនាំ និងមន្ត្រីនៃមន្ទីរ អង្គភាពនានាក្នុងខេត្ត កងកម្លាំងប្រដាប់អាវុធទាំងបីប្រភេទ រដ្ឋបាលក្រុងសៀមរាប និង សិស្សានុសិស្ស សរុបជាង២០០នាក់។
លោក ពិន ប្រាកដ អភិបាលរងខេត្តសៀមរាប មានប្រសាសន៍ថា៖ទិវាអនាម័យបរិស្ថានជាតិ២៣វិច្ឆិកា ត្រូវបានរាជរដ្ឋាភិបាលកម្ពុជា បានចេញអនុក្រឹត្យលេខ ៤៧ អនក្រ ចុះថ្ងៃទី១២ ខែមិថុនា ឆ្នាំ១៩៩៥ ស្តីពីកាបង្កើតទិវាអនាម័យបរិស្ថានជាតិ ដែលត្រូវប្រារព្ធជារៀងរាល់ឆ្នាំ ដើម្បីបំផុសចលនាប្រជាពលរដ្ឋ ព្រះសង្ឃ កងយោពលខេមរភូមិន្ទ នគរបាល រាជការគ្រប់ថ្នាក់ និង សិស្ស និស្សិតគ្រប់ភូមិសិក្សា ឲ្យចូលរួមទាំងស្មារតី និងសម្ភារៈ ក្នុងការធ្វើអនាម័យ និងការកែលំអរសោភណ័ភាពទីក្រុង ទីប្រជុំជន ជនបទ ភូមិស្ថាន វត្តអារាម សាលារៀន មន្ទីរពេទ្យ រោងចក្រ ទីផ្សារ និង មជ្ឈមណ្ឌលសេដ្ឋកិច្ច ។ល។ សំដៅបំបាត់ឲ្យខាងតែបាន នូវភាពកខ្វក់ដោយសំរាម និងកាកសំណល់ផ្សេងៗ ដើម្បីកែលំអរគុណភាពបរិស្ថាន ប្រែកា្លយព្រះរាជាណាចក្រកម្ពុជា ជាប្រទេសគ្រប់ដណ្តប់ដោយរុក្ខជាតិខៀវស្រង៉ាត់ផ្កាចម្រុះពណ៌ លើកស្ទួយជីវភាពរស់នៅ របស់ប្រជាសហគមន៍ និងប្រជាពលរដ្ឋដោយមានអនាម័យបរិស្ថានល្អ។
លោក ពិន ប្រាកដ មានប្រសាសន៍បន្តថា៖ ដើម្បីចូលរួមចំណែកបន្ថែម និង ដើម្បីអនុវត្តតាមអនុក្រឹត្យនេះ ឲ្យមានប្រសិទ្ធិភាព និងប្រសិទ្ទិផលក្នុងការគ្រប់គ្រងសំរាម និងអនាម័យទីប្រជុំជន សូមឲ្យគ្រប់ភាគីពាក់ព័ន្ធ និងដៃគូអភិវឌ្ឍនានាក្នុងខេត្ត ត្រូវចូលរួមអនុវត្តនិងផ្សព្វផ្សាយអនុក្រឹត្យឲ្យបានផុសផុល ដើម្បីធ្វើឲ្យទីក្រុង និងភូមិដ្ឋានរបស់យើងស្អាត និងគ្មានសំរាម ពិសេស ដើម្បីបញ្ចៀសពីការគំរាមគំហែងធ្ងន់ធ្ងរដល់អាយុជីវិត និងបរិស្ថានរបស់យើងនោះ ការផ្លាស់ប្តូរឥរិយាបទ និងអាកប្បកិរិយាមនុស្សក្នុងការប្រើប្រាស់ផលិតផលធ្វើពីប្លាស្ទិក គឺជារឿងសំខាន់ និងចាំបាច់បំផុត ព្រោះថា ការបំពុលដោយប្លាស្ទិក នឹងធ្វើឲ្យប៉ះពាល់ដល់អាយុជីវិត មនុស្ស សត្វ ក្នុងនោះសំណល់ប្លាស្ទិកទាំងនេះកំពុងគំរាមគំហែងយ៉ាងធ្ងន់ធ្ងរដល់ភពផែនដីរបស់យើង។
លោកអភិបាលរងខេត្ត មានប្រសាសន៍បន្តទៀតថា ខេត្តសៀមរាប ជាខេត្តទេសចរណ៍ដ៏ធំមួយនៃព្រះរាជាណាចក្រកម្ពុជា ដោយមានប្រាសាទបុរាណរាប់ពាន់ និងមានរមណីយដ្ឋានទាំងធម្មជាតិ និងកែច្នៃរាប់សិបកន្លែង ដែលសុទ្ធសឹងជាកន្លែងមានភាពទាក់ទាញ ចំពោះភ្ញៀវទេចរជាតិនិងអន្តរជាតិ ដូច្នេះការរៀបចំ ទិវាអនាម័យបរិស្ថានជាតិ ២៣វិច្ឆិកា ក្រោមប្រធានបទ ភូមិឋានស្អាត សុខភាពល្អ ជីវិតរីករាយ នាពេលនេះ គឺមានអត្ថន័យសំខាន់ខ្លាំងណាស់ សម្រាប់ខេត្តសៀមរាបរបស់យើង ហេតុនេះទាំងនៅទីក្រុងរហូតដល់ជនបទ ត្រូវតែមានភាពស្រស់ស្អាតដោយធម្មជាតិ និយាយរួមទូទាំងខេត្ត ត្រូវតែមានអនាម័យបរិស្ថានល្អ ព្រោះវាក៏ជាមុខមាត់របស់ប្រទេសជាតិយើងផងដែរ។
គួររំលឹកថា ក្នុងឱកាសទិវាអនាម័យបរិស្ថានជាតិ២៣វិច្ឆិកា ឆ្នាំ២០២១ នេះ បានរៀបចំការដើរសំអាត អនាម័យបរិស្ថាន តាមសងខាងដងស្ទឹងសៀមរាប ពីចំណុចស្ពានថ្ម ខាងជើងព្រះរាជដំណាក់រហូតដល់ស្ពានថ្មវត្តរាជបូណ៌ ដែលជាសារមួយបញ្រ្ជាបការយល់ដឹងដល់ប្រជាពលរដ្ឋអំពីកិច្ចកិច្ចគាំពារបរិស្ថាន ការគ្រប់គ្រង និងទុកដាក់សំណល់ដោយការទទួលខុសត្រូវ និងជួយពញ្ញាក់ស្មារតី ឲ្យមានការចូលរួមពីកម្លាំងពីគ្រប់ស្រទាប់វណ្ណៈ ក្នុងការចូលរួមអនាម័យតាមលំនៅដ្ឋាន និងតាមទីសាធារណៈ ដោយចេះទុកដាក់សំណល់ក្នុងធុងសំរាមបានត្រឹមត្រូវ និងការដាំដើមឈើ ដើម្បីឲ្យមានភាពបៃតងស្រស់ជាពិសេសចូលរួមកាត់បន្ថយប្លាស្ទិក ដើម្បីរួមគ្នាលើកស្ទួយសោភណ័ភាពទីក្រុង ទីប្រជុំជនឲ្យមានបរិស្ថានល្អខ្យល់អាកាសបរិសុទ្ធ ទេសភាពស្រស់ត្រកាល៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
