នៅព្រឹកថ្ងៃទី២២ ខែកុម្ភៈ ឆ្នាំ២០១៩ ព្រឹកម៉ិញនេះ រដ្ឋបាលខេត្តសៀមរាប បានរៀបចំទិវាជាតិបង្ការ ពន្លត់អគ្គិភ័យ ២២កុម្ភៈ ២០១៩ លើកទី៤ ក្រោមអធិបតីភាពឯកឧត្តម ប៉ុល លឹម ប្រធានក្រុមសមាជិកព្រឹទ្ធសភាប្រចាំភូមិភាគ៤ ដើម្បីបង្ហាញជូនប្រជាពលរដ្ឋទូទាំងប្រទេស ឲ្យឃើញអំពីការខិតខំប្រឹងប្រែងនិងយកចិត្តទុកដាក់បំផុត របស់រាជរដ្ឋាភិបាល បណ្តាស្ថាប័នពាក់ព័ន្ធ កងកម្លាំងនគរបាលបង្ការ និង ពន្លត់អគ្គិភ័យ ក្នុងការងារបង្ការគ្រោះមហន្តរាយ ដែលបង្កឡើងដោយគ្រោះអគ្គិភ័យ ជាមួយនឹងការការពារ សង្គ្រោះអាយុជីវិត ទ្រព្យសម្បត្តិនិងបរិសា្ថន រក្សាបាននូវសន្តិសុខសណ្តាប់ធ្នាប់ រួមចំណែកកាត់បន្ថយភាពក្រីក្ររបស់ប្រជាពលរដ្ឋ ។
ឯកឧត្តម ប៉ុល លឹម មានប្រសាសន៍ថា ឆ្នាំ២០១៩នេះ ប្រទេសកម្ពុជាត្រូវទទួលរងនូវឥទ្ធិពលនៃកំណើនកម្តៅជាងឆ្នាំកន្លងទៅ ដែលបង្កើតឲ្យមានការព្រួយបារម្ភចំពោះប្រភពដែលអាចបង្កឲ្យកើតមានឡើងគ្រោះអគ្គិភ័យ ដូច្នេះតាមរយៈនេះ អំពាវនាវដល់ប្រជាពលរដ្ឋ សូមឲ្យមានការប្រុងប្រយ័ត្នខ្ពស់បំផុត ក្នុងការបង្ការ ទប់ស្កាត់គ្រោះអគ្គិភ័យ ព្រោះវាជាប្រភពនៃសោកនាដកម្មនៃជនរងគ្រោះ និង បង្កផលវិបាកសម្រាប់សង្គមជាតិ ។
ឯកឧត្តម ប៉ុល លឹម មានប្រសាសន៍ទៀតថា ប្រការសំខាន់មួយទៀតនោះគឺ រាល់ការសាងសង់សំណង់ផ្សេងៗ ស្ថាប័ននិងសមត្ថកិច្ចពាក់ព័ន្ធទាំងអស់ ត្រូវពិនិត្យឲ្យបានច្បាស់លាស់ មុននឹងអនុញ្ញាតឲ្យមានការសាងសង់ ពិសេស ត្រូវតែទុកច្រកចេញចូលតាមការកំណត់ដែលមាននៅក្នុងប្បញ្ញតិច្បាប់ ឬ អនុក្រឹត្យ សម្រាប់រថយន្តពន្លត់អគ្គិភ័យ ឬ រថយន្តសង្គ្រោះ ចូលទៅធ្វើអន្តរាគមន៍ ដោយផ្លូវទាំងនោះ ត្រូវមានស្លាកសញ្ញាថា សង្គ្រោះអាសន្ន រួមទាំងការបំពាក់គ្រឿងបង្ការពន្លត់អគ្គិភ័យផងដែរ ៕
អត្ថបទ និង រូបថត : លោក ងិន គឹមឡេង
កែសម្រួលអត្ថបទ : លោក លីវ សាន្ត
