នៅព្រឹកថ្ងៃទី២៦ ខែវិច្ឆិកា ឆ្នាំ២០២១ ឯកឧត្តម ជុំ កុសល រដ្ឋលេខាធិការក្រសួងព័ត៌មាន បានទទួលជួបពិភាក្សាការងារជាមួយ លោក ធុល វិសាល ប្រធានសមាគមសហគ្រិនខ្មែរចិន នៅកម្ពុជា ដោយក្នុងឱកាសនោះ លោកប្រធានសមាគម បានជម្រាបជូនពីសកម្មភាពការងារដែលបានបំពេញក្នុងពេលកន្លងមកនេះ លើកិច្ចការជួយបណ្តុះបណ្តាលយុវជន អោយចេះភាសាអង់គ្លេស និងភាសាចិន ហើយបានផ្តល់កន្លែងស្នាក់នៅ និងម្ហូបអាហារដល់និស្សិតក្រីក្រថែមទៀតផងដែរ។
លោក ធុល វិសាល បានជម្រាបជូនថា ក្នុងរយ:ពេលកន្លងមកនេះ សមាគមសហគ្រិនខ្មែរចិននៅកម្ពុជា បានជួយដល់យុវជនកម្ពុជា ប្រមាណជាង ១០០នាក់ ហើយសម្រាប់គោលដៅថ្មីដែលនឹងត្រូវជួយ គឺប្រមាណ ១ពាន់នាក់បន្ថែមទៀត តាមរយ:ការផ្តល់អាហារូបករណ៏រៀននៅមហាវិទ្យាល័យ ផ្តល់កន្លែងស្នាក់នៅ និងម្ហូបអាហារប្រចាំថ្ងៃ រួមទាំងបង្រៀនភាសាចិន និងអង់គ្លេស។
លោកប្រធានសមាគមបានជម្រាបជូនដែរថា ក្នុងកំឡុងសម័យកូវីដ-១៩ នេះ សមាគមបានជួយបង្រៀនភាសាចិន និងអង់គ្លេសដោយឥតគិតថ្លៃ ដល់សិស្សនិស្សិត បានចំនួន ប្រមាណជាង ២ម៉ឺននាក់ តាមប្រពន្ធ័អនឡាញ។
ព័ត៌មានជាតិ ថ្មីៗ
ឯកឧត្តម ជុំ កុសល បានសំដែងនូវការកោតសរសើរ និងគាំទ្រពេញទំហឹងចំពោះសមាគមសហគ្រិនខ្មែរចិននៅកម្ពុជា គឺ លោក ធុល វិសាល ដែលជាស្ថាបនិក និងជាប្រធានដែលបានទទួលយុវជនកូនចៅពលរដ្ឋខ្វះខាតជីវភាព ឲ្យបានចូលសិក្សាផ្នែកភាសាចិន អង់គ្លេស និងជំនាញផ្សេងៗ ដោយផ្គត់ផ្គង់ការហូបចុក ស្នាក់នៅ និងថែមទាំងឧបត្ថម្ភប្រាក់ថែមទៀត។ នេះគឺជាគំរូគួរឲ្យគោរព និងកោតសរសើរ ដែលប្អូនបានលះបង់ដើម្បីបណ្តុះបណ្តាលធនធានមនុស្សនៅកម្ពុជា ឆ្លើយតបនឹងការយកចិត្តទុកដាក់ខ្ពស់បំផុត របស់រាជរដ្ឋាភិបាល លើគោលនយោបាយបណ្តុះបណ្តាលធនធានមនុស្ស។
ជំនួសមុខ ឯកឧត្តម រដ្ឋមន្ត្រីក្រសួងព័ត៌មាន ក៏សូមអរគុណ ដែលលោក ធុល វិសាល បានផ្តល់អាហារូបករណ៍ចំនួន ១០០កន្លែងរៀងរាល់ឆ្នាំដល់ក្រសួងព័ត៌មាន ដើម្បីក្រសួងផ្តល់ជូនបន្តដល់យុវជនដែលខ្វះខាតលទ្ធភាពសិក្សា៕
ប្រភព: ទូរទស្សន៍ជាតិកម្ពុជា
