សមត្ថកិច្ចខេត្ដសៀមរាប នៅល្ងាចថ្ងៃទី២៦ ខែវិច្ឆិកា ឆ្នាំ២០២១ម្សិលមិញ បានបញ្ជូនខ្លួនជនសង្ស័យចំនួន ៣នាក់បន្ថែមទៅកាន់តុលាការ ដើម្បីចាត់វិធានការផ្លូវច្បាប់ ក្រោយសមត្ថកិច្ចឃាត់ខ្លួនបានជាបន្ដបន្ទាប់ ក្នុងករណីប្លន់ម៉ូតូប្រជាពលរដ្ឋ កាលពីថ្ងៃទី០៧ ខែវិច្ឆិកា ឆ្នាំ២០២១នេះ។
បើតាមលោកវរៈសេនីយ៍ទោ សុខ ម៉េងអ៊ាង ប្រធានការិយាល័យព្រហ្មទ័ណ្ឌកំរិទ្ធធ្ងន់ នៃស្នងការដ្ឋាននគរបាលខេត្ដសៀមរាប បានឱ្យដឹងថា ជនសង្ស័យទាំង ៣នាក់ ត្រូវបានកម្លាំងសមត្ថកិច្ចបើកការស៊ើបអង្កេតតាមឃាត់ខ្លួនបានជាបន្តបន្ទាប់ ក្នុងចំណោម ៨នាក់ ពាក់ព័ន្ធករណីអំពើលួចមានស្ថានមានស្ថានទម្ងន់ទោស ដោយក្រុមជនសង្ស័យមានគ្នាចំនួន ៨នាក់ បានប្រើកាំបិតប្លន់យកម៉ូតូ ០២គ្រឿង កាលពីថ្ងៃទី០៧ ខែវិច្ឆិកា ឆ្នាំ២០២១កន្លងទៅ នៅចំណុចរង្វង់មូលផ្លូវ៦០ម អង្គរឃ្យុងយូ ក្នុងសង្កាត់ស្លក្រាម ក្រុងសៀមរាប។
លោក សុខ ម៉េងអ៊ាង បានបន្ដថា ជនសង្ស័យទាំង៨នាក់ ក្នុងនោះ ០៥នាក់ត្រូវបានសមត្ថកិច្ចចាប់ខ្លួនបានភ្លាមៗ នឹងបានបញ្ជូនខ្លួនទៅកាន់តុលាការ នៅថ្ងៃទី១០ ខែវិច្ឆិកាកន្លងទៅ ចំនែក៣នាក់ទៀតបានរត់គេចខ្លួន ទៅចូលខេត្ដ៣ខេត្ត មានខេត្តកំពង់ធំ រាជធានីភ្នំពេញ និងខេត្តបាត់ដំបង ប៉ុន្ដែក្រោយពីមានការស៊ើបអង្កេតយ៉ាងយកចិត្ដទុកដាក់ ទើបសមត្ថកិច្ចតាមចាបន់ខ្លួនបាននៅថ្ងៃទី២៦ ខែវិច្ឆិកា ឆ្នាំ២០២១នេះ។ ក្នុងការឃាត់ខ្លួននេះ សមត្ថកិច្ចបានដកហូតវត្ថុតាងមានម៉ូតូជារបស់ជនរងគ្រោះចំនួន ០២គ្រឿង រួចប្រគល់ជូនជនរងគ្រោះវិញ និងវត្ថុតាង កាំបិតចំនួន១ ដែលធ្វើសកម្មភាពកាប់ជនរងគ្រោះសមត្ថកិច្ចរក្សាទុក៕
អត្ថបទ និង រូបភាព៖ លោក ឈិត សាវី
