ប្រធានមន្ទីរព័ត៌មានខេត្តសៀមរាបលើកបង្ហាញថា បទពិសោធន៍ គឺជាគំនរការងារ ដែលបង្កប់ដោយឋាមពលគន្លឺះ នាំឆ្ពោះទៅការវិវត្តន៍ថ្មី ដើម្បីបំរើឲ្យការផ្សព្វផ្សាយទាន់ស្ថានភាពនៃការរីកចម្រើនរបស់សង្គម និងបច្ចេកវិទ្យាទំនើប !
ការពិភាក្សាការងារនៅក្នុងកិច្ចប្រជុំ ដើម្បីសិក្សាអំពីបទពិសោធន៍ការងារ គឺជាការស្វែងរកគន្លឺះធ្វើដំណោះស្រាយលើបញ្ហាប្រឈមនានា និងអាចនិយាយបានថា នេះគឺជារបបអាហារឋាមពលដែលមិនអាចខ្វះបាន សម្រាប់ពង្រឹងនិងបំប៉នប្រព័ន្ធការងារក្នុងអង្គភាព ឈានឆ្ពោះទៅរកគៅលដៅ ប្រកបដោយនិរន្តរភាព និងមាននវានុវត្តន៍បានល្អប្រសើរ។
លោក លីវ សុខុន ប្រធានមន្ទីរព័ត៌មានខេត្តសៀមរាប បានលើកឡើងយ៉ាងដូច្នេះ នាព្រឹកថ្ងៃទី២៨ ខែវិច្ឆិកា ឆ្នាំ២០២១ ជាមួយមន្រ្តីបុគ្គលិកជំនាញគ្រប់ផ្នែករបស់ខ្លួន រួមទាំងផ្នែករដ្ឋបាល-គ្រប់គ្រង ផ្នែកវិទ្យុផ្សាយសម្លេង និងផ្នែកសោតទស្សន៍ផងដែរ។
នៅក្នុងកិច្ចប្រជុំនោះ បានបង្ហាញឲ្យឃើញថា ឆ្លងកាត់ព្រឹត្តិការណ៍ជាសាកលនៃវិបត្តិកូវីដ-១៩ជិត២ឆ្នាំកន្លងមកនេះ មន្ទីរព៍ត៌មានខេត្តសៀមរាប បានចូលរួមយ៉ាងសកម្មនៅក្នុងប្រតិបត្តិការណ៍ចូលរួមប្រយុទ្ធប្រឆាំងជម្ងឺកូវីដ-១៩ គាំទ្ររាល់វិធានការនានារបស់រាជរដ្ឋាភិបាល ក្រសួងជំនាញពាក់ព័ន្ធ តាមរយៈនៃការបង្កើតកម្មវិធីផ្សព្វផ្សាយ-អប់រំ ដែលបានដាក់ចេញទាំងនៅថ្នាក់ជាតិ ថ្នាក់ក្រោមជាតិ និងថ្នាក់មូលដ្ឋានផងដែរ។
កិច្ចប្រជុំនេះ ក៏បានបង្ហាញនូវការគាំទ្រផងដែរ ចំពោះនយោបាយចាក់វ៉ាក់សាំងបង្ការជម្ងឺកូវីដ-១៩ គឺជាយុទ្ធសាស្រ្តគន្លឺះដ៏សំខាន់ និងជាខ្សែក្រវ៉ាត់ការពារទី១សំខាន់ជាងគេ ដើម្បីការពារអាយុជីវិតប្រជាជន។ ស្ថានភាពធូរស្រាលនៃវិបត្តិជម្ងឺកូវីដ-១៩ កំពុងបានធ្វើដំណើរនៅលើផ្លូវឆ្ពោះទៅរកការបោះឆ្នោតជ្រើសរើសក្រុមប្រឹក្សាឃុំ-សង្កាត់ នាពាក់កណ្តាលឆ្នាំ២០២២ខាងមុខ ដែលក្នុងដំណាក់កាលនេះ បានជម្រុញឲ្យកិច្ចប្រជុំលើកនេះ កាន់តែមានសារសំខាន់ថែមទៀត លើការពិភាក្សាយោបល់របស់មន្រ្តីជំនាញ ដើម្បីរៀបចំបង្កើតកម្មវិធីថ្មីៗបន្ថែមទៀត បំរើឲ្យការផ្សព្វផ្សាយដែលទាក់ទងទៅនឹងការបំពេញកាតព្វកិច្ចរបស់ប្រជាពលរដ្ឋ ក្នុងការប្រើប្រាស់សិទ្ធិជ្រើសរើសថ្នាក់ដឹកនាំនៅក្នុងមូលដ្ឋានរបស់ខ្លួន ដែលខ្លួនជឿទុកចិត្តបាន ដើម្បីការអភិវឌ្ឍន៍សហគមន៍នោះ។
ក៏ស្ថិតនៅក្នុងរង្វង់នៃការរៀបចំកម្មវីធីថ្មីផងដែរ ដោយបានលើកយកមកជជែកគ្នាជាគោលការណ៍ដែរនៅក្នុងកិច្ចប្រជុំនេះ គឺការត្រៀមបង្កើតវេទិកាក្រុមប្រឹក្សាឃុំ-សង្កាត់ ស្តីអំពីទស្សនៈនិងបទពិសោធន៍ ដែលកម្មវិធីនេះ គ្រោងនឹងដាក់បញ្ជូលក្នុងកម្មវិធីផ្សាយសម្លេងវិទ្យុជាតិនគរភ្នំ ១០៣មេកាហ៊ឺត និងផេកទូរទស្សន៍ជាតិកម្ពុជាខេត្តសៀមរាប។
យ៉ាងណាក៏ដោយ ក្រមសីលធម៌វិជ្ជាជីវៈអ្នកសារព័ត៌មាន ក៏ត្រូវបានលើកយកមករំលឹកនៅក្នុងកិច្ចប្រជុំនោះផងដែរ។ ប្រសាសន៍ដ៏មានតម្លៃខ្ពង់ខ្ពស់ នៃប្រមុខរាជរដ្ឋាភិបាលកម្ពុជា ( កុំបំពានអ្នកដទៃ កុំបំភ្លៃការពិត ) កឺជាយ័ន្តការពារកំហុសរបស់អ្នកសារព័ត៌មាន។ អ្វីជាគោលដៅរបស់ស្ថាប័នព័ត៌មាន គឺការលើកកម្ពស់គុណភាពសេវាផ្តល់ព័ត៌មាន និងការអប់រំសង្គម ជូនប្រជាពលរដ្ឋឲ្យកាន់តែប្រសើរឡើង៕
