ស្របពេលដែលការពិនិត្យឈ្មោះ និងចុះឈ្មោះបោះឆ្នោតនឹងត្រូវបិទបញ្ចប់នៅថ្ងៃទី៣០ ខែវិច្ឆិកា ឆ្នាំ២០២១នេះ ប្រជាពលរដ្ឋរស់នៅស្រុកអង្គរធំ ខេត្ដសៀមរាប បានបន្ដទៅពិនិត្យឈ្មោះ និងចុះឈ្មោះបោះឆ្នោត ដើម្បីចូលរួមបោះឆ្នោតក្រុមប្រឹក្សាឃុំសង្កាត់អាណត្ដិទី៥ នៅឆ្នាំ២០២២ខាងមុខ។
លោក ស្វាយ សាវង្ស ពលរដ្ឋនៅឃុំពាក់ស្នែង ស្រុកអង្គរធំ បានលើកឡើងថា ការចុះឈ្មោះបោះឆ្នោត និងពិនិត្យឈ្មោះបោះឆ្នោតនេះ មានសារៈសំខាន់ណាស់ ដើម្បីមានឈ្មោះចូលរួមបោះឆ្នោតក្រុមប្រឹក្សាឃុំសង្កាត់ ដែលមានរយៈពេល ៥ឆ្នាំម្ដង ដូចនេះក្នុងនាមប្រជាពលរដ្ឋម្នាក់ត្រូវបំពេញតួនាទីរបស់ខ្លួន ដើម្បីជ្រើសរើសថ្នាក់ដឹកនាំដែលពួកគាត់ស្រលាញ់។ កន្លងមកលោកមានឈ្មោះបោះឆ្នោត នៅការិយាល័យបោះឆ្នោតក្នុងក្រុងសៀមរាប ប៉ុន្ដែដោយសារលោកប្ដូរទីលំនៅថ្មីនៅឃុំពាក់ស្នែង ទើបលោកត្រូវចុះឈ្មោះថ្មីនៅការិយាល័យឃុំពាក់ស្នែងស្រុកអង្គរធំវិញ។ លោកបានលើកឡើងទៀតថា ក្នុងនាមជាពលរដ្ឋម្នាក់ត្រូវមានឈ្មោះបោះឆ្នោតមិនថា ការបោះឆ្នោតក្រុមប្រឹក្សាឃុំសង្កាត់ឬបោះជ្រើសរើសតំណាងរាស្ដ្រនោះទេ។
ព័ត៌មានជាតិ ថ្មីៗ
ជាពលរដ្ឋមួយរូបទៀតនៅឃុំពាក់ស្នែងដូចគ្នា លោក វ៉ាង វណ្ណរ៉េត បានលើកឡើងដែរថា ការពិនិត្យឈ្មោះបោះឆ្នោតនេះ ដោយបារម្ភខ្លាចបាត់ឈ្មោះរបស់លោក នៅក្នុងបញ្ជីបោះឆ្នោត ដែលធ្លាប់បានចុះឈ្មោះកន្លងមក ព្រោះការបោះឆ្នោតក្រុមប្រឹក្សាឃុំសង្កាត់អាណត្ដិទី៥នេះ នឹងចាប់ផ្ដើមនាពេលឆាប់ៗខាងមុខនេះ ដើម្បីបំពេញតួនាទីរបស់ខ្លួន ក្នុងការជ្រើសរើសថ្នាក់ដឹកនាំនៅមូលដ្ឋានប្រកបដោយភាពត្រឹមត្រូវ។
លោកបន្ដថា លោកមិនអាចបាត់ឈ្មោះ ឬអាក់ខានក្នុងការចូលរួមបោះឆ្នោតក្រុមប្រឹក្សាឃុំសង្កាត់ អាណត្ដិទី៥នេះបានទេ ព្រោះការបោះឆ្នោតនេះ មានរយៈពេល៥ឆ្នាំម្ដង។ លោកក៏បានអំពាវដល់ប្រជាពលរដ្ឋត្រូវទៅចុះឈ្មោះនិងពិនិត្យឈ្មោះបោះឆ្នោត ខណៈដែល គ.ជ.ប នឹងបិទបញ្ជីឈ្មោះបោះឆ្នោតនេះ នៅថ្ងៃទី៣០ខែវិច្ឆិកា ពោលនៅសល់តែមួយថ្ងៃទៀតប៉ុណ្ណោះ។
សូមជម្រាបថា បើតាម លោក នឹម វ៉ាន់សំ ប្រធានលេខាធិការដ្ឋានរៀបចំការបោះឆ្នោតខេត្ដសៀមរាប បានឲ្យដឹងថា ចាប់តាំងពីថ្ងៃទី១២ ខែតុលា ដល់ថ្ងៃទី២៨ ខែវិច្ឆិកា ឆ្នាំ២០២១កន្លងទៅនេះ មានប្រជាពលរដ្ឋនៅខេត្ដនេះ បានទៅពិនិត្យឈ្មោះ និងចុះឈ្មោះបោះឆ្នោតនេះ មានប្រមាណជាង៨០ភាគរយ ក្នុងនោះអ្នកចុះថ្មី មានចំនួន៣១,៥៣៨នាក់។ ជាមួយគ្នានោះ មានពលរដ្ឋផ្ទេរពីចូលពីក្រៅឃុំមានចំនួន៨,២៤៨នាក់ ប្ដូររការិយាល័យក្នុងឃុំ មានចំនួន៤,០៧៦នាក់ និងប្រជាពលរដ្ឋដែលមានឈ្មោះក្នុងបញ្ជីឈ្មោះបោះឆ្នោតចាប់ពីថ្ងៃទី១២ខែតុលា ដល់ថ្ងៃទី២៨ខែវិច្ឆិកានេះ មានចំនួនសរុប៥៨៧,៦៨៥នាក់។ សម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្ដិទី៥ នឹងធ្វើឡើងនៅថ្ងៃអាទិត្យទី៥ខែមិថុនាឆ្នាំ២០២២ខាងមុខ៕
អត្ថបទ និង រូបភាព៖ លោក ឈិត សាវី
កែសម្រួល៖ អ៊ុន ណារាជ្យ
