នៅព្រឹកថ្ងៃទី២៩ ខែវិច្ឆិកា ឆ្នាំ២០២១ រដ្ឋបាលស្រុកអង្គរធំ ខេត្តសៀមរាប បានបើកវគ្គផ្សព្វផ្សាយមួយ ស្តីពីតួនាទី ភារកិច្ច និងសមត្ថកិច្ចរបស់ការិយាល័យប្រជាពលរដ្ឋ រាជធានី/ខេត្ត ជូនដល់ក្រុមប្រឹក្សាស្រុកឃុំមន្ត្រីរាជការជុំវិញស្រុក និងសិស្សានុសិស្ស ចំនួន៦៤នាក់ចូលរួម ក្រោមអធិបតីភាពលោក ប៊ុត គីរី ប្រធានក្រុមប្រឹក្សាស្រុកអង្គរធំ និងលោក ទីវ សារ៉ូន អនុប្រធានការិយាល័យប្រជាពលរដ្ឋខេត្តសៀមរាប។
មានប្រសាសន៍ក្នុងឱកាសនោះលោក ប៊ុត គីរី បានបញ្ជាក់ថា វគ្គផ្សព្វផ្សាយនាពេលនេះ ធ្វើឡើងក្នុងគោលបំណងលើកកម្ពស់អភិបាលកិច្ច ក្នុងការផ្តល់សេវា និងការអភិវឌ្ឍន៍សេដ្ឋកិច្ចនៅរដ្ឋបាលថ្នាក់ក្រោមជាតិ តាមរយៈការពង្រឹងតួនាទី ភាកិច្ច ក្នុងការទទួល និងសម្រុះសម្រួលដោះស្រាយបណ្តឹងនៅក្រៅប្រព័ន្ធតុលាការ ដែលពាក់ព័ន្ធនឹងការផ្តល់សេវាសាធារណៈ និងការគ្រប់គ្រងរដ្ឋបាលនៅរដ្ឋបាលថ្នាក់ក្រោមជាតិ ក្នុងគោលដៅកំណត់យន្តការ គោលការណ៍ បែបបទ និងនីតិវិធីនៃការសម្រុះសម្រួលដោះស្រាយបណ្តឹងនៅថ្នាក់ក្រោមជាតិ។
លោកប្រធានក្រុមប្រឹក្សាស្រុក បានបន្តទៀតថា នេះជាប្រវត្តិសាស្ត្រមួយ ដែលស្រុកយើងបានទទួលនូវវគ្គផ្សព្វផ្សាយ ក៏ដូចជាកិច្ចការថ្មីមួយទៀត ដែលនៅពេលខាងមុខនេះ រដ្ឋបាលស្រុក នឹងមានការិយាល័យច្រកចេញចូលតែមួយ ក្នុងទិសដៅបង្ខិតឲ្យកាន់តែនៅជិតប្រជាពលរដ្ឋលើសេវាសាធារណៈលើគ្រប់វិស័យ ដើមី្បពង្រឹងតួនាទី ភាកិច្ច ក្នុងការទទួលរាល់ពាក្យបណ្តឹងរបស់ប្រជាពលរដ្ឋ ដែលមកទទួលសេវានោះ គឺយើងត្រូវមានការិយាល័យប្រជាពលរដ្ឋ ក្នុងការពន្លឿននូវរាល់លិខិត បទដ្ឋានរដ្ឋបាល តាមរយៈសេវាច្រកចេញចូលតែមួយ ដើមី្បធ្វើការដោះស្រាយជូនបងប្អូន ក្នុងការធានាគុណភាពសេវាសាធារណៈ។
បើតាមការបញ្ជាក់ពី លោក ទីវ សារ៉ូន បានឲ្យដឹងថា ការិយាល័យប្រជាពលរដ្ឋ ជាយន្តការអព្យាក្រឹត្យមួយដែលត្រូវបង្កើតឡើងនៅរដ្ឋបាលខេត្ត សម្រាប់ទទួល និងសម្រុះសម្រួល ដោះស្រាយបណ្តឹងក្រៅប្រព័ន្ធតុលាការ ដែលពាក់ព័ន្ធនឹងការផ្តល់សេវាសាធារណៈ និងការគ្រប់គ្រងរដ្ឋបាលនៅថ្នាក់ខេត្ត។ ក្នុងនោះតួនាទី និងភារកិច្ចរបស់ការិយាល័យប្រជាពលរដ្ឋ គឺការទទួល និងប្រមូលពាក្យបណ្តឹងនានា ក្នុងដែនសមត្ថកិច្ចរបស់ខ្លួន និងធ្វើសម្រាំងវាយតម្លៃពាក្យបណ្តឹងដែលទទួលបាន ព្រមទាំងបញ្ជូនពាក្យបណ្តឹងទាំងឡាយណា ដែលស្ថិតក្នុងដែនសមត្ថកិច្ចខ្លួន ទៅស្ថាប័នមានសមត្ថកិច្ច និងតាមដានដោះស្រាយ ដើមី្បជូនព័ត៌មានត្រឡប់ទៅម្ចាស់បណ្តឹង។ ត្រូវធ្វើការស៊ើបអង្គេតបណ្តឹងលើកអនុសាសន៍ អំពីវិធានការដោះស្រាយបណ្តឹង និងតាមដានការអនុវត្តវិធានការដោះស្រាយបណ្តឹង ដែលស្ថិតក្នុងដែនសមត្ថកិច្ចរបស់ខ្លួន៕
អត្ថបទ និង រូបភាព៖ លោក ម៉ី សុខារិទ្ធ
កែសម្រួល៖ អ៊ុន ណារាជ្យ
