នៅព្រឹកថ្ងៃទី៣០ ខែវិច្ឆិកា ឆ្នាំ២០២១នេះ នៅមន្ទីរផែនការខេត្តសៀមរាប ឯកឧត្តម វង្ស សាម៉ុន រដ្ឋលេខាធិការក្រសួងផែនការ បានដឹកនាំបើកវគ្គបណ្តុះបណ្តាល ស្តីពីការពង្រឹងស្ថាប័ន និងកសាងសមត្ថភាពមន្ត្រីរាជការ រាជធានី-ខេត្ត សម្រាប់ឆ្នាំ២០២១ ក្នុងគោលបំណង ក្នុងការពង្រឹងស្ថាប័ន និង កសាងសមត្ថភាពដល់មន្ត្រីផែនការនៅ ថ្នាក់ក្រោមជាតិ ដោយមានការចូលរួមពីសំណាក់ឯកឧត្តម លោកជំទាវ លោកលោកស្រីជាអនុរដ្ឋលេខាធិការ អគ្គនាយកដ្ឋាន រួមទាំងថ្នាក់ដឹកនាំ និងមន្ត្រីរាជការមកពីតាមបណ្ដាខេត្តចំនួន៥ រួមមាន៖ ខេត្តសៀមរាប កំពង់ឆ្នាំង កំពង់ធំ ពោធិ៍សាត់ ព្រះវិហារ សរុបជាង ៥០នាក់។
មានប្រសាសន៍ក្នុងឱកាសនោះឯកឧត្តម វង្ស សាម៉ុន បានបញ្ជាក់ថា វគ្គបណ្តុះបណ្តាល ស្តីពីការពង្រឹងងស្ថាប័ន និងការកសាងសមត្ថភាពដល់មន្ត្រីរាជការ នៃមន្ទីរផែនការ រាជធានី-ខេត្តនេះ បានដំណើរការចំនួន ២លើករួចមកហើយ គឺនៅខេត្តស្ទឹងត្រែង និងខេត្តបាត់ដំបង ដោយមានខេត្តចំនួន៦ បានចូលរួម ហើយសម្រាបខេត្តសៀមរាប គឺជាគោលដៅទី៣ ដែលក្រសួងបានរៀបចំឡើង។ វគ្គបណ្ដុះបណ្ដាលនេះដែរ គឺដើម្បីជាការរួមចំណែក ជាមួយរាជរដ្ឋាភិបាលកម្ពុជា ក្នុងកម្មវិធីកែទម្រង់រដ្ឋបាលសាធារណៈ ដោយកែសម្រួលឡើងវិញ នៅកន្លែងខ្លះត្រួតគ្នាអំពីតួនាទី ភារកិច្ច របស់អង្គភាពនីមួយៗ។ ជាមួយគ្នានោះ ថ្នាក់ដឹកនាំក្រសួងផែនការ បានឯកភាព ប្ដូរឈ្មោះក្រសួង ពីក្រសួងផែនការ មកជាក្រសួងផែនការស្ថិតិ និងអភិវឌ្ឍន៍ ដើម្បីបង្កើនប្រសិទ្ធភាព និងស័ក្តសិទ្ធភាព ក្នុងវិស័យផែនការស្ថិតិ និងប្រជាជន និងអភិវឌ្ឍន៍ ព្រមទាំងការកែប្រែឈ្មោះតាមស្ថាប័នក្នុងក្រសួងផែនការទៀតផង។
ព័ត៌មានជាតិ ថ្មីៗ
ឯកឧត្តម បានបន្តទៀតថា កន្លងមករាជរដ្ឋាភិបាលបានដាក់ចេញនូវគោលនយោបាយធនធានមនុស្ស ក្នុងរដ្ឋបាលសាធារណៈ យុគ្គសម័យនៃសាកលភាវូបនីយកម្ម និងការប្រកួតប្រជែងលើឆាកអន្តរជាតិ ដោយគោលនយោបាយនេះ មានចែងយ៉ាងលំអិតពីការពង្រឹងងស្ថាប័ន និងការកសាងសមត្ថភាពមន្រ្តីរាជការ រហូតឈានដល់ការធ្វើកំណែទម្រង់ រដ្ឋបាលសាធារណៈ ជាការងារអាទិភាពមួយក្នុងចំណោម ការងារអាទិភាពនានារបស់រាជរដ្ឋាភិបាល ដែលតម្រូវឲ្យលើកកម្ពស់ប្រសិទ្ធភាពការងារ និងបង្កើនសមត្ថភាពរដ្ឋបាលសាធារណៈ ឲ្យកាន់តែមានសមត្ថភាពគ្រប់គ្រាន់ ដើម្បីឆ្លើយតបទៅនឹងប្រធានបទខាងលើបានទាន់ពេលវេលា។ ក្នុងន័យនេះ ការពង្រឹង និងការកែលំអដំណើរការគ្រប់គ្រង និងការអភិវឌ្ឍន៍ធនធានមនុស្ស ដើម្បីប្រែក្លាយធនធានមនុស្សនៅក្នុងវិស័យសាធារណៈ ឲ្យកាន់តែមានសមត្ថភាពមានវិជ្ជាជីវៈច្បាស់លាស់ និងមានប្រសិទ្ធភាពក្នុងការបំពេញការងារនេះ គឺជាការងារគន្លឹះ និងមានសារៈសំខាន់បំផុត។ ដើម្បីការងារមាននិរន្តរភាពមន្ទីរនីមួយៗ ត្រូវរៀបចំចាត់តាំងឲ្យមានមន្ត្រី ទទួលបន្ទុកការងារនៅតាមក្រុង/ស្រុក/ខ័ណ្ឌទាំងអស់ឡើងវិញ ដើម្បីពង្រឹងការងារ របស់ខ្លួនឲ្យទទួលបានជោគជ័យជូនក្រសួង ក៏ដូចជាជូនរាជរដ្ឋាភិបាលដូចពេលមុន។
ឯកឧត្តមក៏មានសង្ឃឹមជឿជាក់ថា វគ្គបណ្តុះបណ្តាលនេះជាស្មារតីជួយដល់មន្រ្តីរាជការ និងអ្នកដឹកនាំមន្ទីរ មានឱកាសសិក្សាបន្ថែម នូវចំណុចល្អៗ សំខាន់ៗ ដើម្បីឲ្យការអនុវត្តការងារទទួលបាន លទ្ធផលល្អ ស៊ីសង្វាក់គ្នា និងមានការអភិវឌ្ឍន៍ និងមាននិរន្តរភាព និងបានសូមសំណូមពរដល់គ្រប់មន្ទីរផែនការ រាជធានី-ខេត្ត ត្រូវមានមនសិកាក្នុងការបំពេញការងារ ភារកិច្ច សាមគ្គីភាព ឯកភាពផ្ទៃក្នុងឲ្យបានរឹងមាំ ជាពិសេសការរិតចំណងមេត្រភាព នៅគ្រប់មន្ទីរ អង្គភាព សា្ថប័ននានា ជុំវិញរាជធានី-ខេត្ត ឲ្យកាន់តែបានល្អប្រសើរថែមទៀត៕
អត្ថបទ និង រូបភាព៖ លោក ម៉ី សុខារិទ្ធ
កែសម្រួល៖ អ៊ុន ណារាជ្យ
