ក្នុងឱកាសដឹកនាំកិច្ចប្រជុំសាមញ្ញប្រចាំសប្តាហ៍ថ្នាក់ដឹកនាំក្រសួងព័ត៌មាន នៅព្រឹកថ្ងៃទី២៩ ខែវិច្ឆិកា ឆ្នាំ២០២១ ឯកឧត្តម ខៀវ កាញារីទ្ធ បានសំដែងនូវការកោតសរសើរ និងវាយតំលៃខ្ពស់ចំពោះ កិច្ចខិតខំប្រឹងប្រែងរបស់ក្រុមការងារគ្រប់ផ្នែកគ្រប់ជំនាញនៃក្រសួងព័ត៌មាន ក្នុងការចូលរួមរៀបចំ និងផ្សព្វផ្សាយបានយ៉ាងល្អ ទាំងសំលេង និងរូបភាពសម្រាប់កិច្ចប្រជុំកំពូល អាស៊ី អឺរ៉ុប ASEM លើកទី១៣ កាលពីពេលកន្លងមកនេះ ដែលកម្ពុជាធ្វើជាម្ចាស់ផ្ទះ ដោយទទួលបានភាពជោគជ័យជាប្រវត្តិសាស្រ្ត។
ឯកឧត្តមរដ្ឋមន្រ្តី ក៏បានវាយតំលៃខ្ពស់ ចំពោះក្រុមការងាររៀបចំបោះពុម្ពសៀវភៅ ស្តីពី កិច្ចខិតខំប្រឹងប្រែងរបស់ក្រសួងព័ត៌មាន ក្នុងពេលនៃការប្រយុទ្ធនឹងជំងឺកូវីដ-១៩ ហើយសៀវភៅនេះ បានបង្ហាញពីការប្រឹងប្រែងរបស់ថ្នាក់ដឹកនាំ មន្រ្តីរាជការក្រសួងព័ត៌មានទាំងអស់ ទាំងថ្នាក់ជាតិ និងថ្នាក់ក្រោមជាតិ ក៏ដូចជាបណ្តាអ្នកសារព័ត៌មាន ដែលបានរួមគ្នាផ្សព្វផ្សាយបានយ៉ាងទូលំទូលាយ ពីបញ្ហាជំងឺកូវីដ-១៩ អោយប្រជាពលរដ្ឋបានដឹង នឹងរួមគ្នាបង្ការទប់ស្កាត់ ការពារតាំងពីដើម រហូតមកដល់បច្ចុប្បន្ននេះ។ ដូច្នេះ សៀវភៅរបស់ក្រសួងព័ត៌មាន ស្តីពីការប្រយុទ្ធ នឹងជំងឺកូវីដកូវីដ-១៩ ឯកឧត្តម ខៀវ កាញារីទ្ធ បានចាត់ទុកថា រាប់ជាប្រវត្តិសាស្រ្ត ហើយក៏សម្រាប់ជាមោទនភាព សម្រាប់យើងទាំងអស់គ្នាក្នុងជំនាន់នេះ ដែលបានប្រឹងប្រែងចូលរួមជួយប្រទេសជាតិតាមសមត្ថភាព និងសមត្ថកិច្ចរៀងៗខ្លួន។ សម្រាប់សៀវភៅដែលទើបបោះពុម្ព ហើយរួចរាល់នាពេលនេះ ត្រូវបានឯកឧត្តម ខៀវ កាញារីទ្ធ ចែកជូនដល់បណ្តាអគ្គនាយកដ្ឋានទាំង៥ ចំណុះអោយក្រសួងព័ត៌មាន និងវិទ្យុជាតិ FM៩៦ ផេកក្រសួងព័ត៌មាន រួមជាមួយបណ្តាមន្ទីរព័ត៌មានរាជធានីខេត្តទាំង២៥ ដោយក្នុង១ អង្គភាព ទទួលបានសៀវភៅ ២០ក្បាល។
បើតាមឯកឧត្តម មាស សុភ័ណ្ឌ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានជម្រាបជូនពីលទ្ធផលនៃវឌ្ឍន៍ភាពការងារសំខាន់ៗ ដែលសម្រេចអនុវត្តន៍បាន ក្នុងរយះពេលកន្លងមក និងបង្ហាញពីទិសដៅផែនការ សកម្មភាពការងារដែលត្រូវបន្តបំពេញក្នុងសប្តាហ៍ បន្តបន្ទាប់ខាងមុខទៀង អោយទទួលបានលទ្ធផលល្អបន្តទៀត ដើម្បីបំរើអោយការផ្សព្វផ្សាយបានកាន់ តែទូលំទូលាយបន្ថែមទៀត។ ឯកឧត្តមរដ្ឋមន្រ្តី បានជម្រុញអោយប្រពន្ធ័ផ្សព្វផ្សាយរបស់ជាតិ ធ្វើយ៉ាងផ្សាយអោយបានទូលំទូលាយ ទាំងភាសា បារាំង វៀតណាម ចិន និងអង់គ្លេស នូវប្រសាសន៍របស់សម្តេចតេជោ នាយករដ្ឋមន្រ្តី នៅសន្និសីទកំពូលអាស៊ី- អឺរ៉ុប លើកទី១៣ កាលពីថ្ងៃទី២៦ ខែវិច្ឆិកា ឆ្នាំ២០២១ ដោយបានគួសបញ្ជាក់ថា ចេញពីបរិយាកាសដ៏ល្អនៃពេលប្រជុំចង្អៀតសន្និសីទកំពូលអាស៊ី-អឺរ៉ុប ទី១៣នេះ ខ្ញុំសង្ឃឹមយ៉ាងមុតមាំថា នៅពេលដែលកម្ពុជា ធ្វើជាប្រធានអាស៊ាន ឆ្នាំ២០២២នេះ ប្រទេសចិន និងប្រទេសជាសមាជិកអាស៊ាន ដែលពាក់ព័ន្ធនឹងអាចឈានទៅចុះហត្ថលេខា លើ COC ( Code of Conduct ) ស្តីពីសមុទ្ទចិនភាគខាងត្បូងបាន ដែលឆ្នាំ២០២២នេះ គឺជាខួបទី២០ នៃការផ្តួចផ្តើមគំនិតទីក្រុងភ្នំពេញ ស្តីពីការតាក់តែង COC ទាក់ទិនទៅនឹងប្រទេសទាំងអស់ ដែលមានជាប់ការពាក់ព័ន្ធទៅនឹងសមុទ្ទចិនខាងត្បូងនេះ។
ឯកឧត្តម រដ្ឋមន្រ្តី បានជម្រុញដល់ទូរទស្សន៏ជាតិកម្ពុជា ធ្វើយ៉ាងណាពង្រឹងកម្មវិធីផ្សាយកីឡាប្រដាល់ក្បាច់គុនបុរាណខ្មែរ ដើម្បីអោយប្រព្រឹត្តទៅដោយសុក្រឹត្យភាព ដែលជាកម្មវិធីជ្រើសរើសយកកីឡាករឆ្នើមៗ ធ្វើការប្រកួតក្នុង១ខែ ២ដង។ ក្រៅពីនេះ ក៏ត្រូវបន្តនាំយកនូវការផ្សាយពីកីឡាបាល់ទាល់ ក៏ដូចជាកីឡាផ្សេងៗទៀត រួមជាការផលិតកម្មវិធីចាប៉ីដងវែងផងដែរ។ សម្រាប់ការងារបច្ចេកទេស គ្រប់ផ្នែកពាក់ពន្ធ័របស់ក្រសួងព័ត៌មាន ត្រូវសហការអោយបានជិតស្និតជាមួយគណ:កម្មការរៀបចំ ពិធីសម្ពោធពហុកីឡដ្ឋានមរតកតេជោ ដើម្បីផ្សព្វផ្សាយពិធីសម្ពោធអោយបានល្អ និងទទួលបានជោគជ័យ។ ទាក់ទងទៅនឹងការលើកឡើងនៅមតិរបស់ អង្គការសង្គមស៊ីវិលមួយ ចំនួនអំពីបញ្ហានិទណ្ឌភាពឯកឧត្តម រដ្ឋមន្រ្តី ខៀវ កាញារីទ្ធ បញ្ជាក់ថា យើងអាចនិយាយនិទណ្ឌភាពបាន លុះត្រាតែជនដែលប្រព្រឹត្តបទល្មើសនោះ ត្រូវបានគេ រកឃើញហើយស្គាល់ ហើយមិនត្រូវបាននាំយកមកដាក់ទោសនោះ ទើបអាចចាត់ទុកថាជាបញ្ហានិទណ្ឌភាព។ នៅពេលដែលសមត្ថកិច្ចមិនទាន់បិទសំណុំ រឿងទៅលើករណីណាមួយនោះ គឺយើងពុំអាចចាត់ទុកថានោះ គឺជាបញ្ហានិទណ្ឌភាពបានទេ ការមិនទាន់បិទសំណុំរឿងរបស់អាជ្ញាធរមានសមត្ថកិច្ចនេះ គឺជាការផ្ដល់នូវពេលវេលា ក៏ដូចជាឱកាសទៅដល់អ្នកពាក់ព័ន្ធផ្សេងៗ ដើម្បីផ្ដល់នូវអ្វីដែលជាភស្តុតាងអ្វី ដែលជាការបញ្ជាក់បន្ថែមថ្មី ពាក់ព័ន្ធទៅនឹងករណីនេះ ដើម្បីធ្វើយ៉ាងណាឱ្យសមត្ថកិច្ចមានព័ត៌មានមាន នឹងមានតម្រុយកាន់តែប្រសើរឡើង ដើម្បីចាត់វិធានការទៅតាមច្បាប់ផងដែរ។
ជាមួយគ្នានេះដែរ ឯកឧត្តម ខៀវ កាញារីទ្ធ បានធ្វើការណែនាំសារជាថ្មីដល់អ្នកសារព័ត៌មាន ដែលចុះទៅយកព័ត៌មាននៅតំបន់ដែលប្រឈម ត្រូវចេះការពារខ្លួន ហើយពេលខ្លះក៏ត្រូវសហការជាមួយមន្ដ្រីពាក់ព័ន្ធ នឹងត្រូវចេះស្វែងយល់អំពី ថាតើចុះទៅយកព័ត៌មានត្រូវធ្វើយ៉ាងម៉េច ឱ្យមានសុវត្ថិភាពផងដែរ៕
ប្រភព៖ ទូរទស្សន៍ជាតិកម្ពុជា
