នៅរសៀល ថ្ងៃទី២៩ ខែវិច្ឆិកា ឆ្នាំ២០២១ ឯកឧត្តម រដ្ឋមន្រ្តី ខៀវ កាញារីទ្ធ ក្រសួងព័ត៌មាន បានដឹកនាំប្រតិភូក្រសួងព័ត៌មាន អញ្ជើញទៅធ្វើការគោរពវិញ្ញាណក្ខន្ធសព លោក ប៉ិល សំអុន ទីប្រឹក្សាក្រសួង និងជាអតីតតន្ត្រីករ នៅវង់តន្ត្រីវិទ្យុជាតិកម្ពុជា នាឆ្នាំ១៩៧៩ ដែលបានទទួលមរណភាព កាលពីថ្ងៃទី២៨ ខែវិច្ឆិកាកន្លងទៅនេះ ក្នុងជន្មាយុ៧៤ ឆ្នាំដោយរោគាពាធ ហើយសពត្រូវបានក្រុមគ្រួសារតម្កល់ធ្វើបុណ្យនៅ វត្តសន្តវ័ន ហៅវត្តទួល សង្កាត់គីឡូម៉ែត្រលេខ៦ ខណ្ឌឬស្សីកែវ រាជធានីភ្នំពេញ។
នៅក្នុងឱកាសនោះ ឯកឧត្តម រដ្ឋមន្រ្តី ខៀវ កាញារីទ្ធ ក្នុងនាមថ្នាក់ដឹកនាំ និងមន្ត្រីរាជការនៃក្រសួងព័ត៌មាន និងក្នុងនាមឯកឧត្តមផ្ទាល់ មានសេចក្តីក្រៀមក្រំ ក្នុងចិត្តឥតឧបមា ចមពោះការទទួលមរណភាពរបស់ លោក ប៉ិល សំអុន។ មរណភាពលោក ប៉ិល សំអុន គឺជាការបាត់បង់នូវធនធានមនុស្ស ដែល ប្រកបដោយសមត្ថភាពដ៏ឆ្នើម ដែលត្រូវជាស្វាមី ជាបិតា បិតាក្មេក និងជាជីតា ជាទីគោរពស្រឡាញ់បំផុត របស់ក្រុមគ្រួសារទាំងអស់នៃសព ដែលជានិច្ចកាល តែងបានលះបង់ខ្ពស់ ទាំងកម្លាំងកាយចិត្ត និងបញ្ញាស្មារតី ក្នុងការបីបាច់ថែរក្សា កូនៗជាទីស្រឡាញ់ និងបានចូលរួមចំណែកយ៉ាងធំធេងនៅក្នុងវិស័យសិល្បៈ ចម្រៀងសម័យចាប់តាំងពីក្រោយថ្ងៃរំដោះ ៧មករា ឆ្នាំ១៩៧៩មកបង្កប់ទៅដោយ ការឃោសនាអប់រំ ការថែរក្សាប្រពៃណី វប្បធម៌ខ្មែរ ដែលជាទីពេញនិយមរបស់ ប្រជាពលរដ្ឋខ្មែរទូទៅ ជាពិសេសនាំមកនូវភាពសប្បាយរីករាយ តាមរយៈបទ ចម្រៀងសម័យជាច្រើនជូនប្រជាពលរដ្ឋ តាមយៈកម្មវិធីសិល្បៈរបស់ វិទ្យុជាតិ កម្ពុជា ក្រោយថ្ងៃរំដោះ ៧មករា ឆ្នាំ១៩៧៩ ។
ការបាត់បង់នេះ គឺជាការសោកស្តាយជាអនេក ចំពោះការបាត់បង់វីរ សិល្បៈករដ៍ឆ្នើម និងជាទីគោរព ដែលពេញមួយជីវិតរបស់លោកបាន បូជាក្នុង ការរួមចំណែកលើកកម្ពស់វិស័យសិល្បៈសម័យ របស់ខ្មែរឲ្យបានរីកចម្រើន រហូតមកដល់បច្ចុប្បន្ន៕
ប្រភព៖ ទូរទស្សន៍ជាតិកម្ពុជា
