កាលពីព្រឹកថ្ងៃទី០១ ខែធ្នូ ឆ្នាំ២០២១នេះ សាខាកាកបាទក្រហមកម្ពុជាខេត្តសៀមរាប បានប្រារព្ឋទិវាពិភពលោកប្រយុទ្ធនឹងជំងឺអេដស៍ ១ធ្នូ ក្រោមប្រធានបទ “បញ្ចប់វិសមភាព បញ្ចប់អេដស៍ បញ្ចប់ជំងឺរាតត្បាតជាសកល” នៅឃុំដំដែក ក្នុងស្រុកសូទ្រនិគម ក្រោមអធិបតីភាព លោកជំទាវ ទាង អេង ទៀសីហា អនុប្រធានគណៈកម្មាធិការសាខាកាកបាទក្រហមកម្ពុជាខេត្ត និងជាតំណាងដ៍ខ្ពង់ខ្ពស់ឯកឧត្តម ទៀ សីហា ប្រធានគណៈកម្មាធិការសាខា ដោយមានការចូលរួមពីសំណាក់លោក លោកស្រី ជាសមាជិក សមាជិកាគណៈកម្មាធិការសាខាខេត្ត គណៈកម្មាធិការអនុសាខាស្រុក អ្នកស្ម័គ្រចិត្ត ប្អូនៗយុវជនកាកបាទក្រហមកម្ពុជា និង ប្រជាពលរដ្ឋដែលជាជនរងគ្រោះដោយសារជំងឺអេដស៍ មកពីស្រុកចំនួន៣ គឺស្រុកសូទ្រនិគម ស្រុកជីក្រែង និងស្រុកស្វាយលើ ។
តាមរយៈសារលិខិតសម្តេចកិត្តិព្រឹទ្ឋបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិ នៃវេទិកាភាពជាអ្នកដឹកនាំប្រចាំតំបន់អាស៊ី-ប៉ាស៊ីហ្វិក ឆ្លើយតបមេរោគ-ជំងឺអេដស៍ និងការអភិវឌ្ឍនៅកម្ពុជា ដែលអានដោយលោកវេជ្ជបណ្ឌិត ក្រុស សារ៉ាត់ សមាជិកគណៈកម្មាធិការសាខាខេត្ត និងជាប្រធានមន្ទីរសុខាភិបាលនៃរដ្ឋបាលខេត្តសៀមរាប លោកបានបញ្ជាក់ និង រំលឹកដល់ប្រជាពលរដ្ឋកម្ពុជាគ្រប់រូបចូរចាំថា “យើងអាចភ្លេចអេដស៍ តែអេដស៍ពុំភ្លេចយើងឡើយ” បានន័យថាបើយើងធ្វេសប្រហែសតែបន្តិចដោយប្រការណាមួយនោះ ការរីករាលដាលមេរោគអេដស៍ និងអាចផ្ទុះឡើងជាមិនខាន ដូច្នេះសូមអំពាវនាវ ដល់ប្រជាពលរដ្ឋកម្ពុជាគ្រប់រូប ទន្ទឹមនឹងការយកចិត្តទុកដាក់ចំពោះមេរោគអេដស៍ និងជំងឺអេដស៍ ក៏សូមយកចិត្តទុកដាក់ចំពោះជំងឺរាតត្បាតសកលកូវីដ-១៩ហើយត្រូវការពារឱ្យបានខ្ជាប់ខ្ជួន រស់នៅតាមគន្លងប្រក្រតីភាពថ្មី ប្រកាន់ខ្ជាប់នូវវិធានការសុខាភិបាល ៣ការពារនិង៣កុំដើម្បីធានាសុខុមាលភាពគ្រួសារ សហគមន៍និងសង្គមជាតិយើង ។
មានមតិសំណេះសំណាលនាឱកាសនោះ លោកជំទាវ ទាង អេង ទៀសីហា មានបញ្ជាក់ថា៖កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានយកចិត្តទុកដាក់ខ្ពស់ចំពោះបងប្អូនប្រជាពលរដ្ឋរងគ្រោះដោយគ្រោះមហន្តរាយ និងឧបទ្ទវហេតុផ្សេងៗទូទាំងព្រះរាជាណាចក្រកម្ពុជា ជាមួយគ្នានេះដែរ សាខាកាកបាទក្រហមកម្ពុជាខេត្តសៀមរាប ជារៀងរាល់ឆ្នាំបានអនុវត្ត ឆ្លើយតប ទៅនឹងសកម្មភាពកិត្តិនាមសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងមានការយកចិត្តទុកដាក់ខ្ពស់ សម្រួលដល់ការលំបាករបស់បងប្អូនអ្នករស់នៅជាមួយមេរោគអេដស៍ ជំងឺអេដស៍ នៅតាមមូលដ្ឋានក្នុងខេត្តផងដែរ ។
ជាមួយគ្នានេះដែរលោកជំទាវ បានណែនាំដល់មន្ត្រីសុខាភិបាល និងអាជ្ញាធរមូលដ្ឋានគ្រប់លំដាប់ថ្នាក់ បន្តការយកចិត្តទុកដាក់ជាប្រចាំទៅលើការអប់រំ ការផ្សព្វផ្សាយ អំពីបញ្ហាអេដស៍ និងជំងឺកូវីដ-១៩ ដល់សហគមន៍ ជួយឧបត្ថម្ភគាំពារ ដល់អ្នកផ្ទុកមេរោគអេដស៍ អ្នកជំងឺអេដស៍ ព្រមទាំងសហការគ្នាលើកទឹកចិត្តដល់ប្រជាពលរដ្ឋដែលបានប្រព្រឹត្ត ឬសង្ស័យថា ខ្លួនបានប្រឈម នឹងការឆ្លងមេរោគអេដស៍ តាមរយៈការសេវាផ្តល់ប្រឹក្សា ជំរុញធ្វើតេស្តឈាមដោយស្ម័គ្រចិត្ត និងរក្សាការសម្ងាត់ រួមគ្នាចុះអប់រំតាមមូលដ្ឋានដើម្បីបញ្ឈប់ជាដាច់ខាតនូវ គ្រប់ទម្រង់រើសអើង ឬមាក់ងាយទៅលើអ្នកផ្ទុកមេរោគអេដស៍ និងជំងឺអេដស៍ ព្រោះជាអំពើផ្ទុយទៅនឹងច្បាប់ស្តីពីការបង្ការ និងទប់ស្កាត់ការរីករាលដាលមេរោគអេដស៍ និងជំងឺអេដស៍នៅកម្ពុជា និងជាទង្វើអមនុស្សធម៌ផង។
លោកជំទាវអនុប្រធានគណៈកម្មាធិការសាខាកាកបាទក្រហមកម្ពុជាខេត្ត ក៏បានណែនាំដល់អ្នកមានមុខរបរប្រឈមខ្ពស់នឹងការឆ្លងមេរោគអេដស៍ សូមប្រើប្រាស់ស្រោមអនាម័យឲ្យបាន១០០ភាគរយ នៅរៀងរាល់ពេលដែលមានទំនាក់ទំនងរួមភេទ និងបន្តការអប់រំពីជំងឺអេដស៍ និងអនុវត្តន៍ពីវិធានការបង្ការដែលណែនាំដោយក្រសួងសុខាភិបាលពីជំងឺកូវីដ-១៩ នេះដល់ក្រុមគ្រួសារ និងប្រជាពលរដ្ឋ ឲ្យបានកាន់តែយល់ច្បាស់ថែមទៀត ក្នុងសកម្មភាពរស់នៅប្រចាំថ្ងៃដើម្បីសុខភាព សុភមង្គលក្នុងគ្រួសារ ទាំងបច្ចុប្បន្ន និងអនាគតដ៏ល្អប្រសើរបស់សង្គមជាតិយើង។
គួររំលឹកថា ក្នុងឱកាសនោះដែរ ក៏មានការចែកអំណោយនិងថវិកាដល់បងប្អូនប្រជាពលរដ្ឋដែលជាជនរងគ្រោះដោយសារជំងឺអេដស៍និងមានជីវភាពខ្វះខាតចំនួន១៥០គ្រួសារ ដែលក្នុងមួយគ្រួសារបានរួមមាន៖មុង១ , ភួយ១ ,សារុង១ , ក្រមា១ , មី១កេស , ត្រីខ១យួរ , ទឹកត្រី១យួរ , អាវយឺត២ , សាប៊ូ២ដុំ , អង្ករ៣០គីឡូក្រាម និងថវិកា៥ម៉ឺនរៀល៕
អត្ថបទ និង រូបភាព ៖ លោក យូ វង្ស
កែសម្រួលអត្ថបទ ៖ លោក លីវ សាន្ត