បច្ចុប្បន្នប្រជាពលរដ្ឋក្នុងប្រទេសនៅតែបន្តសកម្មភាពធ្វើដំណើរកម្សាន្តតាមកន្លែងរមណីយដ្ឋាននានា ក្នុងខេត្តសៀមរាប ក៏ដូចតាមបណ្តាស្រុកមួយចំនួន ហាក់មានកើនឡើងជាខ្លាំង បន្ទាប់ពីរាជរដ្ឋាភិបាលកម្ពុជាបានសម្រេចបើកប្រទេសឡើងវិញ។ ជាមួយគ្នានោះ ស្រុកស្រីស្នំ ក៏ស្ថិក្នុងចំណោមស្រុកគោលដៅទេសចរ នៃខេត្តប៉ែកពាយ័ព្យមួយ ដែលមានសក្ដានុពលទេសចរណ៍បែបធម្មជាតិកែច្នៃជាច្រើន ដើម្បីទាក់ទាញភ្ញៀវទេសចរណ៍ជាតិ និងអន្តរជាតិ ស្របពេលដែលរាជរដ្ឋាភិបាល បានសម្រេចទទួលយកភ្ញៀវទេសចរណ៍អន្តរជាតិដែលបានចាក់វ៉ាក់សាំងពេញលេញឲ្យចូលក្នុងប្រទេស។
បើតាមលោក ជា រតន ស្ថាបនិករមណីដ្ឋានស្រីស្នំភូមិខ្ញុំ បានលើកឡើងថា រមណីយដ្ឋានស្រីស្នំភូមិខ្ញុំ បានចាប់ផ្តើមបើកសាកល្បងអស់រយ:ពេលជិតមួយឆ្នាំកន្លងមកហើយ ដោយក្នុងនោះមានការគាំទ្រពីសំណាក់បងប្អូនប្រជាពលរដ្ឋជិតឆ្ងាយជាបន្តបន្ទាប់ ហើយក្នុងនោះដោយមានការសហការពីអាជ្ញាធរពាក់ព័ន្ធផងនោះ ទើបធ្វើឲ្យរមណីយដ្ឋានមួយនេះ អាចដំណើរការបានរហូតមកដល់ពេលនេះ ដែលជាចំណែកចូលរួមលើកកម្ពស់ជីវភាពការរស់នៅរបស់បងប្អូនប្រជាពលរដ្ឋចំណាកស្រុក ក៍ដូចជាជួយដល់សេដ្ឋកិច្ចប្រទេសជាតិយើងជាដើម។ លោកបន្តថា នៅទីនេះមានសេវាកម្មល្អប្រកបដោយផាសុខភាព តម្លៃសមរម្យអាចទទួលយកបាន មានកន្លែងបោះតង់ កន្លែងថតរូបអនុស្សាវរីយ៍ស្អាតៗ យើងគយគន់មើលទេសភាពដ៏ស្រស់ត្រកាល សាករស់ជាតិម្ហុបឆ្ងាញ់ៗ អ្វីជាពិសេសនោះ យើងមានគម្រោងបង្កើត សហគមន៏កសិទេសចរណ៍ ដែលមានផលប្រយោជន៍រួមទាំងអ្នកលក់ទាំងអ្នកទិញ ផ្នែកវិស័យកសិកម្ម មិនថាដំណាំហូបផ្លែ ឬបន្លែត្រីសាច់ ដែលប្រជាជនយើងអាចផលិតបានគ្រប់បែបយ៉ាង យើងជួយទិញពួកគាត់ផង និងជួយរកទីផ្សារឲ្យពួកគាត់ទៀត។
ជាមួយគ្នានោះ បើតាមភ្ញៀវដែលមកកំសាន្តនៅរមណីដ្ឋានខាងលើនេះ លោក ថា ប៊ុនធឿន បានបង្ហាញថា ចំពោះការដើរកំសាន្តលក្ខណៈគ្រួសារក្តី ជាក្រុមៗក្តីទៅកាន់តំបន់រមណីយដ្ឋានទេសចរណ៍ធម្មជាតិនានា នៅក្នុងស្រុកស្រីស្នំនោះ ពាក់ព័ន្ធសន្តិសុខសុវត្ថិភាព គឺមិនមានការព្រួយបារម្មណ័ឡើយ ដោយសារតែមានអាជ្ញាធរដែនដីពួកគាត់មានការទទួលខុសត្រូវខ្ពស់ ដូច្នេះការបោះតង់សម្រាកលំហែកាយ និងការជិះកង់កំសាន្តតាមតំបន់រមណីយដ្ឋាន មិនភ័យខ្លាចដូចអ្វីដែលគេគិតទេ យើងត្រូវចូលរួមបំផុសចលនាទេសចរណ៍ក្នុងប្រទេស និងក្រៅប្រទេស ជាពិសេសខេត្តសៀមរាបឱ្យកាន់តែរីកចំរើនបន្ថែមទៀត។
បើតាមលោក ហ៊ន់ ឫទ្ធិ អភិបាលស្រុកស្រីស្នំ បានបញ្ជាក់ថា ស្រុកស្រីស្នំ មានសក្ដានុពលទេសចរណ៍ធម្មជាតិជាច្រើន ដើម្បីទាក់ទាញភ្ញៀវទេសចរជាតិ ហើយក៏ស្របពេលដែលរាជរដ្ឋាភិបាលបានសម្រេចទទួលយកភ្ញៀវទេសចរអន្តរជាតិដែលបានចាក់វ៉ាក់សាំងពេញលេញចូលក្នុងប្រទេស។ ជាមួយគ្នានេះ អាជ្ញាធរស្រុក ក៏បានជម្រុញដល់ដៃគូរ និងស្ថាប័នពាក់ព័ន្ធ ក្រុមហ៊ុនវិស័យឯកជន អាចមកជួយ ឬក៏មកវិនិយោគ នៅក្នុងស្រុកមួយនេះបាន ដើម្បីឲ្យប្រែក្លាយទៅតំបន់អភិវឌ្ឍន៍ ដែលមានសក្តានុពលជាច្រើនកន្លែង ក្នុងគោលបំណងលើកកម្ពស់សេដ្ឋកិច្ចជាតិ និងប្រជាពលរដ្ឋនៅតាមមូលដ្ឋា ហើយក៏ជាផ្នែកមួយដ៏សំខាន់ ដើម្បីទាក់ទាញអ្នកទេសចរណ៍គ្រប់មជ្ឈដ្ឋាន ឲ្យមកសិក្សាស្វែងយល់ផងដែរ។
លោកអភិបាលស្រុក បញ្ជាក់ទៀតថា នៅយប់ថ្ងៃឆ្លងឆ្នាំសកល ឆ្នាំ២០២១ ឈានចូល ឆ្នាំ២០២២ ខាងមុខនេះ នៅរមណីយដ្ឋានស្រីស្នំភូមិខ្ញុំ គ្រោងនឹងរៀបចំព្រឹត្តិការណ៍កម្សាន្តសប្បាយៗ គឺក្រុមយុវជនបោះតង់ ក្រុមតន្ត្រីស្គរដៃ នឹងមានកម្មវិធីជាច្រើនថែមទៀត ជូនដល់ប្រជាពលរដ្ឋក្នុងមូលដ្ឋាន ព្រមទាំងភ្ញៀវទេសចរណ៍ជាតិ និងអន្តរជាតិផងដែរ៕
អត្ថបទ និង រូបភាព៖ លោក ស៊ាន សុផាត
កែសម្រួល៖ អ៊ុន ណារាជ្យ
