អង្គការមូលនិធិថែទាំសុខភាពអេដស៍ ហៅកាត់ថា AHF បានផ្ដល់សម្ភារៈសិក្សាដល់សិស្សានុសិស្សក្រីក្រជាង ១០០នាក់ ដើម្បីអបអរទិវាជំងឺអេដស៍ពិភពលោក ឆ្នាំ២០២១ ការចែកសម្ភារៈនេះ ធ្វើឡើងនៅសាលាបឋមសិក្សា ហ៊ុន សែន គោកតាចាន់ ក្នុងសង្កាត់គោកចក ក្រុងសៀមរប នាព្រឹកថ្ងៃទី០២ ខែធ្នូ ឆ្នាំ២០២១នេះ។
លោកវេជ្ជបណ្ឌិត ឈឹម សារ៉ាត់ នាយកការិយាល័យប្រចាំតំបន់អាស៉ីនៃអង្គការ AHF បានថ្លែងថា អង្គការ AHF បានរៀបចំព្រឹត្តិការណ៍ចម្រុះផ្សេងៗ ទាំងនៅតាមកន្លែងផ្ទាល់ និងតាមប្រព័ន្ធអនឡាញ នៅក្នុងបណ្តាប្រទេសជាសមាជិកចំនួន៤៥ប្រទេស។ ព្រឹត្តិការណ៍ទាំងនោះ មានគោលបំណង បង្វែរចំណាប់អារម្មណ៍របស់ជាតិ និងអន្តរជាតិ ឱ្យងាកទៅរកវិបត្តិជំងឺអេដស៍ ក៏ដូចជាអ្នកផ្ទុក និងអ្នករងការប៉ះពាល់ដោយសារតែជំងឺនេះនៅទូទាំងសកលលោក។ ជាក់ស្ដែងការចែកសម្ភារៈសិក្សាដល់សិស្សានុសិស្សនាពេលនេះ ក៍ជាសារផ្ញើដល់ពួកគាត់ ដើម្បីឱ្យបានយល់ដឹងពីខ្លះៗពីបញ្ហាជំងឺអេដស៍ និងមេរោគអេដស៍ផងដែរ។ ជាមួយគ្នានោះ ក៍ធ្វើឡើងដើម្បីក្រើនរំលឹក អំពីសារសំខាន់នៃឱកាសទទួលបានការធ្វើតេស្ត ការបង្ការ និងការព្យាបាលជំងឺអេដស៍។
លោកបានបន្ដថា សម្ភារៈសិក្សាទាំងនោះមានកាបូបដាក់សម្ភារៈសិក្សាម្នាក់មួយ សៀវភៅ ខ្មៅដៃ ប៊ិចនិងសម្ភារៈសម្រាប់រៀនជាច្រើនទៀតផងដែរ។ ការចែកសម្ភារៈនេះ ក្នុងគោលបំណងអបអរទិវាពិភពលោកប្រយុទ្ធប្រឆាំងជំងឺអេដស៍ និងជំងឺឆ្លងដដៃទៀតផងដែរ។ អង្គការមូលនិធិថែទាំសុខភាពអ្នកជំងឺអេដស៍ (AHF) ជាអង្គការប្រយុទ្ធនឹងជំងឺអេដស៍ធំជាងគេ ដែលមាននៅទូទាំងប្រទេសចំនួន៤៥។ជាពិសេសនៅប្រទេសកម្ពុជា ដោយមានកិច្ចសហការជាដៃគូជាមួយរាជរដ្ឋាភិបាល ក្នុងការផ្តល់សេវាព្យាបាល ថែទាំដល់អ្នករស់នៅជាមួយមេរោគអេដស៍ចំនួន៣៨ទីតាំង ដែលកំពុងផ្តល់ឱសថប្រឆាំងមេរោគអេដស៍ដល់អតិថិជនចំនួនជាងបួនម៉ឺននាក់ និងមានគម្រោងបង្ការមេរោគអេដស៍ តេស្តឈាមចល័តនៅតាមខេត្តក្រុងនៅក្នុងប្រទេសកម្ពុជាផងដែរ។
លោកវេជ្ជបណ្ឌិត ឈឹម សារ៉ាត់ បានលើកឡើងថា នៅពេលដែលប្រទេសកម្ពុជា កំពុងប្រឈមនឹងជំងឺកូវីដ-១៩នេះ អ្នករស់នៅជាមួយមេរោគអេដស៍ និងក្រុមគ្រួសារ ដែលកំពុងរងផលប៉ះពាល់ដោយមេរោគអេដស៍ និងការរាតត្បាតដោយមេរោគកូវីដ-១៩នេះ បានធ្វើឲ្យពួកគាត់មានការលំបាកកាន់តែខ្លាំង ហើយអង្គការមូលនិធិថែទាំសុខភាពអ្នកជំងឺអេដស៍ (AHF)តែងតែយកចិត្ដទុកដាក់យ៉ាងខ្លាំង ក្នុងអំឡុងពេលជីវភាពជួបការខ្វះខាត ដូចជាសិស្សានុសិស្សជាង១០០នាក់នៅសាលាបឋមសិក្សាហ៊ុន សែន គោកតាចាន់នេះ។បន្ថែមលើសពីនោះ រាជរដ្ឋាភិបាល ក្រសួងសុខាភិបាលមជ្ឈមណ្ឌលជាតិប្រយុទ្ធនឹងជំងឺអេដស៍សើសើស្បែក និងកាមរោគ (NCHADS) ក៍បានយកចិត្តទុកដាក់ និងប្រឹងប្រែង ធ្វើយ៉ាងណាឲ្យពួកគាត់ទទួលបានការព្យាបាល និងជំនួយឧបត្ថម្ភជួយដោះស្រាយក្នុងខណៈដ៏តានតឹងនេះផងដែរ។បើតាមស្ថិតិថ្មីៗចុងក្រោយគេរបស់អង្គការ UNAIDS បានប៉ាន់ប្រមាណថា មានមនុស្សប្រមាណជា៣៨លាននាក់ជុំវិញពិភពលោក បាននឹងកំពុងរស់នៅជាមួយជំងឺអេដស៍ ខណៈនៅឆ្នាំ២០២០កន្លងមកនេះ មានមនុស្សតែជាង១.៥លាននាក់តែប៉ុណ្ណោះ បានឆ្លងជំងឺនេះ៕
អត្ថបទ និង រូបភាព៖ លោក ឈិត សាវី
