កាលពីព្រឹកថ្ងៃទី០៣ ខែធ្នូ ឆ្នាំ២០២១នេះ លោកជំទាវ ទេព រង្ស៊ី ភរិយាឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន រួមទាំងសហការីជាពុទ្ធសាសនូបត្ថម្ភក៍ បាននាំយកទេយ្យទាន មានអង្ករ៥០០គីឡូក្រាម , សាដក ២ , ទឹកពិសាបរិសុទ្ធ១០កេះ , មី១០កេះ , ម៉ាស៣៦០ម៉ាស , កៅអៀក១២០បន្ទះ , ក្រូចថ្លុង១ការ៉ុង និងមានបច្ច័យមួយចំនួនទៀត ប្រគេនចំពោះព្រះសង្ឃ និងគណៈកម្មការអាចារ្យនៃវត្តរាជបូណ៌ នៃក្រុងសៀមរាប ខេត្តសៀមរាប ដើម្បីបានតំកល់សទ្ធាទាំងនេះ ទុកជាប្រយោជន៍សម្រាប់បំពេញតម្រូវការក្នុងទីអារាមតាមការគួរ រួមទាំងការផ្គត់ផ្គង់ដល់សមណសិស្ស ដែលកំពុងគង់អាស្រ័យរៀនសូត្រធម្មវិន័យ អក្សរបាលី-បិដក នៅក្នុងទីអារាមនេះ ។
ក្នុងឱកាសដ៏មានសទ្ធានោះ គឺប្រកបដោយមហាកិត្តិយសក្រៃលែង ដែលពិធីវេរប្រគេនទេយ្យទាននេះ ត្រូវបានស្ថិតក្រោមព្រះវត្តមានព្រះមហាវិមលធម្មសិរីសុវណ្ណោ ពិន សែម រាជាគណៈថ្នាក់ទោ គណៈមហានិកាយ ឧត្តមទីប្រឹក្សាគណៈសង្ឃនាយក សមាជិកថេរសភាព្រះពុទ្ធសាសនានៃព្រះរាជាណាចក្រកម្ពុជា និងជាព្រះគ្រូចៅអធិការវត្តរាជបូណ៌ នៃក្រុង-ខេត្តសៀមរាប ។
អនុមោទនា ទទួលយកសទ្ធាទាំងនោះ ព្រះតេជគុណ បានមានថេរដីកាថា៖ ទេយ្យទានទាំងនេះប្រាកដកើតចេញពីឆន្ទៈ គឺសេចក្តីពេញចិត្តជាឯកច័្ឆន្ធ រវាងភរិយា-ស្វាមី ព្រមទាំងកូនចៅ រួមទាំងសហការី មន្រ្តី រាជការ ក្រោមឱវាទផងដែរ ហើយមិនថាឡើយភិក្ខុសាមណេដែលស្ថិតនៅក្នុងឧត្តមភេទ ឬគ្រហស្ថនោះឡើយ ពុំមានអង្គណា ឬអ្នកណាម្នាក់ អាចរស់នៅបានឡើយ បើពុំមានបច័្ចយបួនជួយទ្រទ្រង់អាយុជីវិតទេនោះ រួមមាន ចង្ហាន់បិណ្ឌបាត ( ស្បៀងអាហារ ) , ចិវរបច្ច័យ ( ស្បង់ចីវរ ឬសម្លៀកបំពាក់ ) , សេនាសនៈបច្ច័យ ( កុដិ ផ្ទះសម្បែង ព្រមទាំងគ្រឿងស្នាក់អាស្រ័យផ្សេងៗទៀត ) និង គិលានភេសជ្ជៈបច្ច័យ មានឱសថព្យាបាលរោគ ជាដើម។
យ៉ាងណាក៏ដោយ ឱវាទរបស់ព្រះតេជគុណបានសម្តែងថា អ្នកកាន់ព្រះពុទ្ធសាសនា ត្រូវតែប្រកាន់យកជំជឿ៤យ៉ាងដែលត្រីមត្រូវ គឺទី១. ត្រូវជឿលើការងារ , ទី២. ត្រូវជឿលើផលការងារដែលបានធ្វើរួចមកហើយនោះ , ទី៣. ត្រូវជឿថា យើងទាំងអស់គ្នាត្រូវតែធ្វើការងារដែលត្រូវធ្វើ មិនធ្វើការងារមិនអាចរស់បានទេ និងទី៤. ត្រូវជឿលើបញ្ញាត្រាស់ដឹងនៃព្រះសម្មាសម្ពុទ្ធ ព្រះបរមគ្រូនៃយើង៕
អត្ថបទ និង រូបភាព ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
