សមាគមគ្រូពេទ្យសើរស្បែកកម្ពុជា បានរៀបចំកិច្ចប្រជុំប្រចាំឆ្នាំ ជាមួយក្រុមគ្រូពេទ្យជំនាញនៅក្រៅប្រទេស ដើម្បីបង្កើនគុណភាព និងប្រសិទ្ធិភាពក៍ដូចជាពង្រឹងចំណេះបន្ថែមទៀត ដល់សមាជិករបស់ខ្លួន ក្នុងការព្យាបាលជំងឺសើស្បែក ជូនដល់ប្រជាពលរដ្ឋនៅកម្ពុជា ដែលកិច្ចប្រជុំនេះ ធ្វើឡើងនៅខេត្ដសៀមរាប តាមប្រព័ន្ធហ៊្សូម មានរយៈពេលពីរថ្ងៃ ចាប់ពីថ្ងៃទី៣ ដល់ថ្ងៃទី៤ ខែធ្នូ ឆ្នាំ២០២១នេះ។
លោកវេជ្ជបណ្ឌិត ចាន់ វិចិត្រ ប្រធានសមាគមគ្រូពេទ្យសើរស្បែកកម្ពុជា និងជានាយករងមន្ទីរពេទ្យមិត្តភាពខ្មែរ-សូវៀត បានថ្លែងថា នេះជាលើកទី៦ ហើយ ដែលសមាគមគ្រូពេទ្យសើរស្បែកកម្ពុជា និងក្រុមគ្រូពេទ្យជំនាញ បានបើកកិច្ចប្រជុំពង្រឹងសាមគ្គីភាព ក៍ដូចជាសមត្ថភាពរបស់ខ្លួនបន្ថែមទៀត ដល់ក្រុមគ្រូពេទ្យជំនាញ ក្នុងការព្យាបាលជំងឺសើរស្បែកដល់ប្រជាពលរដ្ឋខ្មែរ ឱ្យមានប្រសិទ្ធិភាពស្របតាមស្ដង់ដាក្រសួងសុខាភិបាល។ ជំងឺសើស្បែកដែលលោកបានជួបប្រទះជាច្រើនមកហើយ និងបានលើកយកមកបង្ហាញក្នុងកិច្ចប្រជុំ និងឱ្យអ្នកជំនាញផ្លាស់ប្ដូរបទពិសោធន៍គ្នា ក្នុងនោះមានដូចជា ជំងឺតាអក ជំងឺតាអកនេះ ជាជំងឺមួយដែលកើតឡើង ដោយសារការប៉ះ ហើយរោល ឬហៅថា ( អាឡែកស៊ី ) ក្រៅពីនេះមានជំងឺ ផ្សឹតសើស្បែក ជំងឺដែលបណ្ដាលមកពីបាក់តេរីសើស្បែក មានដូចជារើម ជំងឺពងបែកជាដើម ជំងឺមុខកើតមុន ជំងឺជាំមុខ ជំងឺឃ្លង់ល្ពៅ និងជំងឺកន្ទាលត្រអាក។
លោកវេជ្ជបណ្ឌិត បញ្ជាក់ថា ការប្រើផលិតផលសើស្បែក ដែលមិនមានការអនុញ្ញាតិត្រឹមត្រូវតាមច្បាប់របស់ក្រសូងសុខាភិបាល បណ្ដាលឱ្យមានផលប៉ះពាល់ដល់សុខភាពអ្នកប្រើប្រាស់ ហើយផលិតផលទាំងនោះត្រូវបានផ្សព្វផ្សាយតាមបណ្ដាញសង្គម ដោយមិនមានការអនុញ្ញាត។
លោកវេជ្ជបណ្ឌិត ចាន់ វិចិត្រ បានបន្ថែមថា ទោះបីជំងឺប្រភេទសើស្បែកបែបណាក៏ដោយ សូមកុំទុកយូរ រហូតទៅដល់ការរាលដាលធ្ងន់ធ្ងរឲ្យសោះ នៅពេលដែលយើងដឹងថា សុខភាពមិនស្រួល ឬអាការៈស្បែក មានសភាពកន្ទួលខុសប្លែក គួរឲ្យសង្ស័យ គឺយើងត្រូវប្រញាប់ទៅរកគ្រូពេទ្យព្យាបាល ឲ្យបានទាន់ពេលវេលា ដើម្បីគ្រូពេទ្យពិនិត្យនិងព្យាបាលឆាប់ជាសះស្បើយផងដែរ។ លោកក៍បានអំពាវនាវដល់ពលរដ្ឋ អោយពិនិត្យទៅលើផលិតផលថែទាំស្បែក ឬឡេលាបស្បែក ដែលបានផ្សព្វផ្សាយតាមបណ្ដាញសង្គមអោយបានច្បាស់លាស់ មុននឹងទិញវាមកប្រើ។ ជាមួយគ្នានោះ សមាគមក៍បានជ្រើសរើសថ្នាក់ដឹកនាំថ្មី អោយបន្ដវេនក្នុងរយៈពេលពីរឆ្នាំម្ដងបន្ទាប់ពីបានបង្កើតឡើងអស់រយៈពេលជាឆ្នាំកន្លងមកហើយ ក្រោយពីមានការបង្កើតឡើង សមាគមគ្រូពេត្យសើរស្បែកកម្ពុជា ប្រជាពលរដ្ឋ និងក្រុមគ្រូពេទ្យ ហាក់មានការយកចិត្ដទុកដាក់ខ្លាំងក្នុងការព្យាបាលជំងឺ៕
អត្ថបទ និង រូបភាព៖ លោក ឈិត សាវី
កែសម្រួល៖ អ៊ុន ណារាជ្យ
