ដើមី្បអនុវត្តនូវបទបញ្ជារដ៍ខ្ពង់ខ្ពស់របស់ប្រមុខរាជរដ្ឋាភិបាលកម្ពុជា នៅថ្ងៃទី០១ ខែធ្នូ ឆ្នាំ២០២១ ឯកឧត្តម លាង មុនីរិទ្ធ រដ្ឋលេខាធិការក្រសួងរៀបចំដែនដីនគរូបនីយកម្ម និងសំណង់ និងឯកឧត្តម ទៀ សីហា អភិបាលខេត្តសៀមរាប បានដឹកនាំកម្លាំងចម្រុះចុះពិនិត្យមើលផែនទីទិន្នន័យ ផ្ទៃដីក្នុងតំបន់២ និងតំបន់៣ ក្នុងដែនសមត្ថកិច្ចរបស់រដ្ឋបាលស្រុកជីក្រែង ក្នុងការទប់ស្កាត់ ជនខិលខូចដែលលួចកាប់បំផ្លាញតំបន់ព្រៃលិចទឹកបឹងទន្លេសាប។ ប្រតិបត្តិកានេះ មានការចូលរួមពីសំណាក់អស់ លោកជាអភិបាលរងខេត្ត, មេបញ្ជាការកងកម្លាំងប្រដាប់អាវុធទាំងបី, មន្ទីររៀបចំដែនដីនគរូបនីយកម្មសំណង់ និង សុរិយោដី, មន្ទីរធនធានទឹក និងឧតុនិយម, មន្ទីរកសិកម្មរុក្ខាប្រមាញ់និងនេសាទ, មន្ទីរបរិស្ថាន, ខ័ណ្ឌរដ្ឋបាលជលផល, អភិបាលស្រុក និងមេឃុំជាប់បឹងទន្លេសាបទាំងអស់ ក្នុងភូមិសាស្ត្រស្រុកជីក្រែង ដោយមានការចូលរួមប្រមាណ ១០០នាក់។
តាមសេចក្តីរាយការណ៍របស់លោក ពៅ ប៊ុនធឿន អភិបាលនៃគណៈអភិបាលស្រុកជីក្រែង បានឲ្យដឹងថា អំពីទិន្នន័យការកាត់ឆ្វៀលផ្ទៃដី ស្ថិតនៅក្នុងដែនព្រៃលិចទឹកតំបន់៣ នៃបឹងទន្លេសាប ឆ្នាំ២០១២ នៅក្នុងភូមិសាស្ត្រស្រុកជីក្រែង ហើយផ្ទៃដីព្រៃលិចទឹកដែលបានឆ្វៀលកន្លងមកក្នុងតំបន់៣ មានទំហំ ៣ពាន់៩៧៩ហិចតា ដោយគ្រប់ដណ្តប់ លើឃុំចំនួន៧របស់ស្រុក ព្រមទាំងបានបោះបង្គោលកំណត់ព្រំប្រទល់តំបន់៣ និង មានការកំណត់និយមការកាត់ឆ្វៀល ដីស្រែ ៣៥៦ចំណុច និង បានប្រគល់ឲ្យឃុំថែរក្សាបង្គោលតម្រុយ ក្នុងការទប់ស្កាត់ការកាប់រុករានដីព្រៃលិចទឹក ក្នុងតំបន់៣ ។
ក្នុងនោះតាមរបាយការណ៍របស់នាយខ័ណ្ឌរដ្ឋបាលជលផលនៃមន្ទីរកសិកម្មរុក្ខាប្រមាញ់និងនេសាទ បានឲ្យដឹងផងដែរថា ក្នុងឆ្នាំ២០១៦ ដល់២០២១នេះ ការបង្រ្កាបបទល្មើសចូលរុករានព្រៃលិចទឹកក្នុងតំបន់៣ មាន៨៦ករណី ក្នុងឃុំជាប់ភូមិសាស្ត្របឹងទន្លេសាបទាំង៧ឃុំរបស់ស្រុកជីក្រែង ស្មើនឹងផ្ទៃដី ៧៤៥,៨៨ហិចតា ព្រមទាំងបានកំណត់មុខ សញ្ញាបទល្មើសនិងជនល្មើសដាក់ទៅតុលាការផងដែរ ។
ព័ត៌មានជាតិ ថ្មីៗ
ឯកឧត្តម ទៀ សីហា ក៏បានលើកផងដែរថា គ្រប់ដែនសមត្ថកិច្ចក្នុងស្រុកជីក្រែង ដែលពាក់ព័ន្ធ ជុំវិញបឹងទន្លេសាបនេះ ត្រូវទទួលខុសត្រូវក្នុងការអនុវត្ត និងត្រូវប្រគល់ជូនរដ្ឋវិញ បើមិនដូច្នេះទេនឹងត្រូវប្រឈមមុខ ចំពោះច្បាប់។ ក្នុងនោះឯកឧត្តមក៏បានលើកនូវខ្លឹមសារក្នុងសាររបស់សម្ដេចតេជោ ហ៊ុន សែន នាយករដ្ឋមន្ត្រី បាន បញ្ជាក់ថា ដើម្បីការពារបឹងទន្លេសាបដែលកំពុងតែរងគ្រោះដោយគោករាក់ និងបាត់បង់ព្រៃលិចទឹកដោយ ការបំផ្លិច បំផ្លាញពីក្រុមជនអនាធិបតេយ្យនោះ ចាំបាច់ត្រូវតែមានវិធានការណ៍ ដែលសម្ដេចបានដាក់ បទបញ្ជារឲ្យអាជ្ញាធរខេត្ត ជុំវិញបឹង ទន្លេសាបទាំងអស់ ទទួលខុសត្រូវទៅលើបញ្ហាពិនិត្យមើលនិងទប់ស្កាត់ជាបន្ទាន់ នូវ ការកាប់រានដីព្រៃលិច ទឹកដែល ឈានទៅដល់ការកើតឡើងវិញបន្ទាប់ពីទឹកសម្រក។
ឯកឧត្តមបានបន្តទៀតថា ព្រៃលិចទឹកនេះមានសារៈសំខាន់សម្រាប់ទីជម្រកត្រីពងកូន និងជីវៈចម្រុះ នៅក្នុងបឹងទន្លេសាប តែបើសិនព្រៃលិចទឹកបាត់បង់ជារៀងរាល់ឆ្នាំ នោះ វា នឹងធ្វើឲ្យប៉ះពាល់យ៉ាងច្រើនដល់ជីវៈចម្រុះ ជាពិសេសទិន្នផលត្រី និង មានការថយចុះជារៀងរាល់ឆ្នាំ ព្រមទាំងសត្វស្លាបទៀតផង។ ឯកឧត្ដមបានបញ្ជាក់ថា ការចុះពិនិត្យលើព្រៃលិចទឹកនាពេលនេះ មានការលំបាក ក្នុងការ កំណត់ តំបន់បន្ដិច ដោយសារទឹកមិនទាន់ស្រក មើលមិនឃើញច្បាស់ពីតំបន់ព្រៃលិចទឹកដែលបានបាត់ ង់នោះ។ ឯកឧត្តម ក៏បានថ្លែងអំណរគុណដល់សម្តេចតេជោ ដែលបានផ្តល់ឱកាសឲ្យអាជ្ញាធរ បញ្ចប់នៃការកាប់ទន្រ្តានព្រៃលិចទឹកបន្តទៀត នៅក្នុងភូមិសាស្ត្រខេត្តសៀមរាប។ ឯកឧត្តមបានបន្តទៀតថា ព្រៃលិចទឺកក៏ជា សក្តានុពលត្រីប៉ុណ្ណោះនោះទេ នៅខេត្តសៀមរាប ក្រៅពីដំណើរដើរទស្សនាកម្សាន្ត នៅតាមប្រាង្គប្រាសាទនានា និង រមណីយដ្ឋានធម្មជាតិក្នុង ខេត្ត ភ្ញៀវបានបន្តមកទស្សនាកម្សាន្តនៅតំបន់បឹងទន្លេសាប នូវព្រៃលិចទឹក និង សត្វស្លាប ទៀតផងដែរ ។
ឯកឧត្តម លាង មុនីរិទ្ធ បានបញ្ជាក់ថា ឯកឧត្តមក្នុងនាមជាអ្នកសម្របសម្រួល លើការងារពិនិត្យផែនទីទិន្នន័យ ផ្ទៃដីក្នុងតំបន់៣ ក្នុងដែនសមត្ថកិច្ច របស់រដ្ឋបាលស្រុកជីក្រែង ក៏ដូចខេត្តសៀមរាប ក្នុងការទប់ស្កាត់ ជនខិលខូចដែល លួចកាប់បំផ្លាញតំបន់ព្រៃលិចទឹកបឹងទន្លេសាប ។ ក្នុងនោះដែរឯកឧត្តម ក៏បានលើកនូវចំណុចមួយចំនួន ដែលជាមូល ដ្ឋានគ្រឹះ សម្រាប់ក្រុមការងារក្នុងការចុះពិនិត្យ នូវរាល់បទល្មើស ការរុករានកាត់ទន្រ្ទានព្រៃលិចទឹក ក្នុងភូមិសាស្ត្រខេត្ត សៀមរាប ក៏ដូចក្នុងស្រុកជីក្រែងផងដែរ។ ក្នុងការចុះពិនិត្យក្នុងពេលដែលទឹកមិនទាន់ស្រកនោះ គឺការពិនិត្យរបស់ក្រុម ការងារយើងនៅមិនទាន់ជាក់ឡាក់នៅឡើយ។
ឯកឧត្តមបន្តទៀតថា ក្រោយពេលដកហូនដីដែលជនខិលខូច ធ្វើការកាប់ឈួសឆាយ នៅក្នុងតំបន់៣នេះហើយនោះ មន្ទីរជំនាញពាក់ព័ន្ធ និងអាជ្ញាធរមូលដ្ឋានដែលមានភូមិសាស្ត្រ ជាប់បឹងទន្លេសាប ត្រូវរួមសហការគ្នាធ្វើការដាំដុះកូនឈើឡើងវិញ នៅក្នុងផ្ទៃដីទាំងនោះ ព្រមទាំងធ្វើការថែរក្សា តាមដានរាល់សកម្មភាពរបស់ជនខិលខូច នៅតែបន្តធ្វើការរុករាននៅក្នុងដីតំបន់៣នេះ និងត្រូវធ្វើការឃាត់ខ្លួនជាបន្ទាន់ បញ្ជូនទៅកាន់តុលាការ ។ ម៉្យាងទៀដំណាក់ការនេះយើងត្រូវការពារតំបន់ដែលបានកាត់ឆ្វៀល និង ពិនិត្យទៅលើតំបន់ ដែលបានកាប់រានថ្មី នៅក្នុងតំបន់៣នោះ ដើមី្បធ្វើសេចក្តីរាយការដាក់ជូនទៅឯកឧត្តម ឧបនាយករដ្ឋមន្ត្រីផងដែរ ៕
អត្ថបទ ៖ លោក ម៉ី សុខារិទ្ធ
រូបភាព ៖ សហការី
កែសម្រួល៖ អ៊ុន ណារាជ្យ
