យ៉ាងហោចណាស់មនុស្សចំនួន ៣នាក់ត្រូវបានស្លាប់ និងម្នាក់ទៀតបានរងរបួសធ្ងន់ ក្នុងករណីអគ្គីភ័យឆេះក្លឹបកំសាន្ត អេលីត ជាក្រោមដីរបស់ផ្សារទំនើប អាស៊ីផ្លាហ្សា នៅវេលាម៉ោង ១៩ និង៣០នាទីយប់ថ្ងៃទី០១ ខែធ្នូ ឆ្នាំ២០២១នេះ ខណៈដែលបុគ្គលិកកំពុងហាត់សមត្រៀមបើកដំណើរការឡើងវិញ។
បើតាមសមត្ថកិច្ចបានឱ្យដឹងថា ជនរងគ្រោះដែលបានស្លាប់ទី១.ឈ្មោះ អ៊ឹង ស៊ីម ភេទប្រុស អាយុ ៤២ឆ្នាំ រស់នៅភូមិបន្ទាយឈើ សង្កាត់ទឹកវិល មុខរបរសន្តិសុខក្លឹបអេលីត បានស្លាប់ពេលដឹកមកដល់ពេទ្យខេត្ត ,ទី២.ឈ្មោះ ឈឿន សំណាង ភេទប្រុស អាយុ ២៦ឆ្នាំ រស់នៅភូមិខ្នារ សង្កាត់ជ្រាវ ក្រុងសៀមរាប មុខរបរអ្នកចំរៀងក្នុងក្លឹប បានស្លាប់នៅនឹងកន្លែង និងទី៣.ឈ្មោះ ធី មេសា ហៅ ចិត្ត ភេទប្រុស មុខរបរសន្តិសុខក្លឹបខាងលើ អាយុ ៣៦ឆ្នាំ រស់ភូមិកន្រ្តក់ សង្កាត់ស្វាយដង្គំ ក្រុងសៀមរាប បានស្លាប់នៅនឹងកន្លែងកើតហេតុ។ ចំនែកជនរងគ្រោះម្នាក់ទៀតដែលបានរងរបួសធ្ងន់ មានឈ្មោះ ប្រាក់ សុភ័ណ្ឌ ភេទប្រុស អាយុ៤១ឆ្នាំ រស់នៅភូមិតាភុល មុខរបរ DJ ក្លឹបអេលីត ត្រូវបានកំពុងជួយសង្គ្រោះនៅពេទ្យខេត្តសៀមរាប។
តាមសមត្ថកិច្ចបានឱ្យដឹងទៀតថា អគ្គីភ័យខាងលើនេះ កើតឡើងវេលាម៉ោង ១៩ និង៣០នាទិយប់ ខណៈដែលក្រុមបុគ្គលិកក្លឹបខាងលើនេះ បាននាំរៀបចំក្លឹបបើកដំណើរការឱ្យភ្ញៀវចូលលេងកំសាន្ដឡើងវិញ ប៉ុន្ដែជាអកុសលស្រាប់តែមានឆ្លងចរន្ដអគ្គីសនី បណ្ដាលឱ្យមានការឆាបឆេះតែម្ដង។ ហេតុការណ៍អគ្គីភ័យនេះដែរ ដោយមានការអន្តរាគមពីក្រុមរថយន្តពន្លត់អគ្គីភ័យ របស់ស្នងការនគរបាលខេត្ត កងរាជអាវុធហត្ថខេត្ត ក្រុមពន្លត់អគ្គីភ័យអាកាសយានដ្ឋានអន្តរជាតិសៀមរាប អាជ្ញាធរជាតិអប្សរា និងរថយន្តរបស់អធិការនគរបាលក្រុង បានសហការគ្នា នឹងបានគ្រប់គ្រងអគ្គីភ័យ និងជួយសង្គ្រោះមនុស្សបានជាស្ថាពរ នៅវេលាម៉ោង ២២ និង៥០នាទី ដោយប្រើប្រាស់រថយន្តពន្លតអគ្គីភ័យ អស់ចំនួន ១០គ្រឿង។
សូមជម្រាបជូនផងដែរថា នៅក្នុងប្រតិបត្តិការជួយសង្គ្រោះនេះដែរ ក៏មានការចុះពិនិត្យ និងដឹកនាំផ្ទាល់ពីសំណាក់ឯកឧត្តម ទៀ សីហា អភិបាលខេត្ត រួមនឹងលោក នួន ពុទ្ធារ៉ា អភិបាលក្រុងសៀមរាប រួមជាមួយនឹងថ្នាក់ដឹកនាំ និងមន្ត្រីពាក់ព័ន្អជាច្រើនរូបទៀតផងដែរ៕
អត្ថបទ និង រូបភាព៖ សហការី
កែសម្រួល៖ អ៊ុន ណារាជ្យ
