យោងតាមរបាយការណ៍ស្តីអំពីវឌ្ឍនភាពការងារនៃការចុះពិនិត្យ និងស្រាវជ្រាវការទន្ទ្រានកាន់កាប់ដីរដ្ឋ ក្នុងដែនព្រៃលិចទឹកនៅតំបន់បឹងទន្លេសាប នៃខេត្តសៀមរាប ឯកឧត្តម ទៀ សីហា អភិបាលខេត្ត បានបញ្ជាក់ថា ខេត្តសៀមរាបបានរៀបចំកសាងផែនទីបឋមមួយ ដោយផ្អែកលើអនុក្រឹត្យលេខ ១៩៧ អនក្រ.បក ចុះថ្ងៃទី២៩ ខែសីហា ឆ្នាំ២០១១ ដើម្បីក្រុមការងារចុះពិនិត្យ និងស្រាវជ្រាវ ក្នុងនេះការកំណត់សំគាល់ផ្សេងៗ បានបង្ហាញថា ចាប់ពីឆ្នាំ២០១៤ ដល់ខែវិច្ឆិកា ឆ្នាំ២០២១នេះ សមត្ថកិច្ចបានបង្ក្រាបបទល្មើសទន្រ្ទានដីព្រៃលិចទឹកក្នុងតំបន់៣ នៃបឹងទន្លេសាបក្នុងបណ្តាក្រុង-ស្រុកទាំង៦ បានចំនួន ២០៤ករណី ស្មើនឹងផ្ទៃដីប្រមាណ ១.៩៧០ហិចតា។ តែយ៉ាងណាក៏ដោយ របាយការណ៍នេះបានបញ្ជាក់ថា តំបន់៣ នៃខេត្តសៀមរាប អាចនឹងគ្រប់គ្រងបានទាន់ពេលវេលា ក៏ប៉ុន្តែការរំលោភបំពានដែលមានពីមុន គឺមិនអាចឲ្យជនល្មើសរួចខ្លួនបានឡើយ ក្នុងនោះយោងតាមការចុះពិនិត្យជាក់ស្តែងប៉ុន្មានថ្ងៃមុននេះ ការទន្ទ្រានដីព្រៃលិចទឹកក្នុងតំបន់បឹងទន្លេសាបនៅខេត្តសៀមរាប ពុំទាន់បានរកឃើញមានករណីរំលោភថ្មីនៅឡើយនោះទេ ដោយសារតែនៅក្នុងតំបន់នោះ មានកម្រឹតជម្រៅទឹកនៅច្រើននៅឡើយ។
ឯកឧត្តម ទៀ សីហា បានបញ្ជាក់យ៉ាងដូច្នេះ ក្នុងកិច្ចប្រជុំអន្តរក្រសួងបន្ទាន់មួយ ដើម្បីត្រូតពិនិត្យរបាយការណ៍ការកាប់ទន្ទ្រាន់ដីព្រៃលិចទឹកនៃតំបន់បឹងទន្លេសាបនៅរដ្ឋបាលខេត្តសៀមរាប កាលពីល្ងាចថ្ងៃទី៦ ខែធ្នូ ឆ្នាំ២០២១នេះ ដោយកិច្ចប្រជុំនេះដឹកនាំដោយ ឯកឧត្តម ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងដែនដី នគរូបនីយកម្ម និងសំណង់ រួមនឹងឯកឧត្តមរដ្ឋមន្រ្តីពាក់ព័ន្ធ ថ្នាក់ដឹកនាំកម្លាំងប្រដាប់អាវុធ និងមន្រ្តីជាន់ខ្ពស់សំខាន់ៗជាច្រើនរូបទៀត បានចូលរួមផងដែរ។
មានប្រសាសន៍ក្នុងឱកាសនោះដែរ ឯកឧត្តមឧបនាយករដ្ឋមន្រ្តី ជា សុផារ៉ា បានបង្ហាញថា វាជាឱកាសដ៏ល្អសម្រាប់ខេត្តសៀមរាប ដោយសារតែកម្រឹតទឹកនៅមានកម្រឹកកម្ពស់ខ្ពស់ និងមិនទាន់មានករណីទន្ទ្រានរំលោភថ្មីកើតឡើងនៅឡើយ ដូចនេះអ្វីដែលសំខាន់ គឺការបែងចែកកម្លាំងគ្រប់គ្រង និងទទួលខុសត្រូវឲ្យបានល្អ មុនទឹកស្រកចុះទៅ ដែលជារដូវបង្កើតការរំលោភបំពាននោះ។ ជាការរំលឺក បទល្មើស ២០៤ករណី ស្មើនឹងផ្ទៃដី ១.៩៧០ហិចតា ដែលបានរកឃើញចាប់តាំងពីឆ្នាំ២០១៤ ដល់ខែវិច្ឆិកា ឆ្នាំ២០២១ ត្រូវតែលើកយកទៅដាក់ក្នុងកិច្ចប្រជុំ ធ្វើអង្កេតឡើងវិញ រកឲ្យឃើញ និងកំណត់ឲ្យបានច្បាស់លាស់អត្តសញ្ញាណនៃអ្នករំលោភកាន់កាប់ និងត្រូវរឹបអូសយកមកវិញ ព្រោះដីព្រៃលិចទឹកក្នុងតំបន់នោះ គឺជាសម្បត្តិរបស់រដ្ឋ។
សូមជម្រាបដែរថា ក្នុងកិច្ចប្រជុំនោះដែរ ក្នុងការចង្អុលបង្ហាញឲ្យអនុវត្ត គឺហាមដាច់ខាត អាជ្ញាធរគ្រប់លំដាប់ថ្នាក់ចេញលិខិតស្នាមទិញលក់ដីរដ្ឋនៅក្នុងតំបន់៣ ឬក្នុងតំបន់ដែលបានកាត់ឆ្វៀលឲ្យប្រជាពលរដ្ឋអាស្រ័យផលកន្លងមក ព្រោះអ្នកអាស្រ័យផលលើតំបន់កាត់ឆ្វៀលក្នុងតំបន់៣ នៃបឹងទន្លេសាបនោះ ពុំមានសិទ្ធិលក់ដូរឡើយ ហើយក៏ត្រូវបានបញ្ចប់ការអនុញ្ញាតិឲ្យអាស្រ័យផលបន្តទៀតផងដែរ ក្រោយការប្រមូលផលឆ្នាំនេះ។ នៅក្នុងការណែនាំឲ្យអនុវត្ត ១០ចំណុចសំខាន់ៗ នៃកិច្ចប្រជុំនោះ ការណែនាំឲ្យអាជ្ញាធរខេត្តធ្វើរបាយការណ៍តាមដានប្រចាំខែ ត្រីមាស ឆមាស និងប្រចាំឆ្នាំ ស្តីពីការគ្រប់គ្រងតំបន់៣នៃបឹងទន្លេសាប គឺជាការងារសំខាន់ចាំបាច់។ ចំណុចសំខាន់ចុងក្រោយនោះ គឺអំពាវ់នាវឲ្យជនខិលខូច និងជនឃុបឃិត ចេញសារភាពប្រគល់ដីជូនរដ្ឋវិញ ហើយដកខ្លួនឲ្យឆ្ងាយពីអំពើបំផ្លាញជាតិឲ្យបានឆាប់បំផុត៕
អត្ថបទ និង រូបភាព៖ លោក ងឹន គីមឡេង
កែសម្រួល៖ អ៊ុន ណារាជ្យ
