កាលពីរសៀលថ្ងៃទី៦ ខែធ្នូ ឆ្នាំ២០២១នៅសាលប្រជុំសាលាខេត្តសៀមរាប មានរៀបចំបើកកិច្ចប្រជុំពិភាក្សាការងារបច្ចេកទេសជំហានទី២ ស្ដីពីគម្រោងរៀបចំព្រឹត្តិការណ៍មហោស្រព សិល្បៈអន្តរជាតិអង្គរ ក្នុងក្រុងសៀមរាប ដែលគ្រោងនឹងប្រព្រឹត្តទៅរយៈពេល៣ថ្ងៃ គឺនៅថ្ងៃទី១០-១១-១២ ខែធ្នូ ឆ្នាំ២០២១ខាងមុខនេះ ដើម្បីអបអរសាទរក្រុងសៀមរាប ជាទីក្រុងវប្បធម៌អាស៊ានសម្រាប់ឆ្នាំ២០២០-២០២២។ កិច្ចប្រជុំនេះធ្វើឡើងក្រោមវត្តមានឯកឧត្តម ស៊ីយ៉ុន សុភារិទ្ឋ អគ្គនាយកបច្ចេកទេស នៃក្រសួងវប្បធម៌ និងវិចិត្រសិល្បៈ និងលោកស្រី យូ សុភា អភិបាលរងខេត្ត តំណាងដ៏ខ្ពង់ខ្ពស់ឯកឧត្ដម ទៀ សីហា អភិបាលខេត្តសៀមរាប ដោយមានការចូលរួមពីសំណាក់លោកលោកស្រីជាថ្នាក់ដឹកនាំមន្ទីរអង្គភាពពាក់ព័ន្ធក្នុងខេត្ត រួមនឹងមន្ត្រីពាក់ព័ន្ធសំខាន់ៗ ទាំងផ្នែករដ្ឋ និងឯកជនទៀតផង។
ក្នុងនាមអាជ្ញាធរខេត្តលោកស្រី យូ សុភា បានសម្ដែងនូវការគាំទ្រ និងសហការពេញទំហឹង ចំពោះគម្រោងរៀបចំនូវព្រឹត្តិការណ៍ថ្មីនេះ នៅក្នុងទឹកដីនៃទីក្រុងវប្បធម៌ ប្រវត្តិសាស្ត្រខេត្តសៀមរាប ដែលជាសារមួយយ៉ាងសំខាន់ ដើម្បីផ្សព្វផ្សាយប្រាប់ទៅពិភពលោកថា កម្ពុជា ជាពិសេសខេត្តសៀមរាប បានបើកឡើងវិញហើយ នឹងបានត្រៀមខ្លួនរួចជាស្រេច ក្នុងការចែករំលែកនូវមរតកវប្បធម៌ដ៍សម្បូរបែប ទាំងបុរាណទាំងសម័យ ដូចជាសិល្បះ វប្បធម៌ អរិយធម៌ សាសនា និងព្រមទាំងប្រាង្គប្រាសាទជាច្រើនដែលដូនតាខ្មែរបានកសាងមក សម្រាប់អ្នកទេសចរគ្រប់ជាតិសាសន៍មកទស្សនា និងដកស្រង់បទពិសោធនៅលើទឹកដីដ៍អច្ឆរិយៈមួយនេះ។
លោកស្រី យូ សុភា មានប្រសាសន៍ថា ពីមុនៗមកខេត្តសៀមរាប ធ្លាប់ទទួលរៀបចំព្រឹត្តិការណ៍កម្មវិធីធំៗទាំងជាតិ និងអន្តរជាតិជាច្រើនដង ដែលតែងតែទទួលបានជោគជ័យជាបន្តបន្ទាប់ ដោយក្នុងនោះអាជ្ញាធរខេត្ត រួមនឹងមន្ទីរអង្គភាពពាក់ព័ន្ធ បានយកចិត្តទុកដាក់ដោយភាពទទួលខុសត្រូវខ្ពស់ នូវសន្តិសុខសុវត្ថិភាពសាធារណ: សណ្តាប់ធ្នាប់របៀបរៀបរយ ដើម្បីគាំពារភ្ញៀវទេសចរជាតិ និងអន្តរជាតិដែលមកទស្សនា ក៏ដូចជាទស្សនកិច្ចជាដើមប្រកបដោយភាពកក់ក្តៅ។ លោកស្រីក៏បានជំរុញដល់គ្រប់ភាគីពាក់ព័ន្ឋ ត្រូវបន្តចូលរួមអនុវត្តឱ្យបានខ្ជាប់ខ្ជួន ប្រតិបត្តិតាមគន្លងប្រក្រតីភាពថ្មីសម្រាប់ប្រជាពលរដ្ឋ ក៏ដូចជាភ្ញៀវជាតិ-អន្តរជាតិ ក្នុងការប្រែក្លាយពីការគំរាមកំហែងពីជំងឺកូវីដ-១៩ ឲ្យទៅជាឱកាសសម្រាប់ការលើកកម្ពស់សេវាកម្មទេសចរណ៍ក្នុងខេត្តសៀមរាបយើង ធ្វើយ៉ាងណារក្សាបាននូវស្ថេរភាពអាជីវកម្មនានាឲ្យប្រសើរឡើង និងធានាបាននូវសុវត្ថិភាពចំពោះភ្ញៀវទេសចរណ៍។
បើតាមឯកឧត្តម ស៊ីយ៉ុន សុភារិទ្ឋ បានបញ្ជាក់ថា កិច្ចប្រជុំនេះ គឺជជែកពិភាក្សា និងបែងចែកការងារទៅតាមតារាងដល់ដៃគូពាក់ព័ន្ឋ ដែលបានកំណត់ក្នុងពេលកន្លងមក ហើយអ្វីដែលគួរជាទីមោទនៈថែមទៀតនោះ គឺព្រឹត្តិការណ៍នេះទទួលបានការគាំទ្រពេញទំហឹងពីអាជ្ញាធរខេត្តសៀមរាប ដែលបានលើកទឹកចិត្ត និងជំរុញដល់អង្គភាព មន្ទីរស្ថាប័នពាក់ព័ន្ឋ និងដៃគូផ្នែកឯកជនបានចូលរួមជាបន្តបន្ទាប់។ ព្រឹត្តិការទាក់ទងទៅនឹងវប្បធម៌នេះ កម្ពុជាយើងមានច្រើនណាស់ តែសម្រាប់ព្រឹត្តិការណ៍អបអរសាទរក្រុងសៀមរាប ជាទីក្រុងវប្បធម៌អាស៊ាន ជាលើកដំបូងហើយដែលក្រសួងវប្បធម៌ និងវិចិត្រសិល្បៈបានរៀបចំឡើង ដែលវាមានសារៈសំខាន់ណាស់ក្រៅពីអបអរសាទរក្រុងសៀមរាប ជាទីក្រុងវប្បធម៌អាស៊ាន ព្រឹត្តិការណ៍នេះ ក៍បានរួមចំណែកក្នុងការទាក់ទាញភ្ញៀវទេសចរបន្ថែមទៀត ពិសេសកន្លងមកការរៀបចំព្រឹត្តិការណ៍តូចធំផ្សេងៗ នៅខេត្តសៀមរាប តែងតែទទួលបានការគាំទ្រជាបន្តបន្ទាប់ ហេតុនេះទើបក្រសួងវប្បធម៌ និងវិចិត្រសិល្បៈ និងក្រុមហ៊ុន កាហ្វេ សម្រេចជ្រើសរើសយកខេត្តសៀមរាប ដើម្បីរៀបចំព្រឹត្តិការណ៍ដ៏អស្ចារ្យនេះឡើង។
ឯកឧត្តម ស៊ីយ៉ុន សុភារិទ្ឋ បានបញ្ជាក់ទៀតថា ទោះស្ថានភាពជំងឺកូវីដ-១៩ នៅកម្ពុជានៅមិនទាន់ទៅណាឆ្ងាយនៅឡើយ ក៏ប្រមុខថ្នាក់ដឹកនាំរាជរដ្ឋាភិបាល និងក្រសួងសុខាភិបាល បានដាក់ចេញនូវវិធានការសុវត្ថិភាពដោយឱ្យយើងទាំងអស់គ្នា ឲ្យរៀនរស់នៅតាមបែបគន្លងថ្មី ពោលគឺអ្នកចូលរួមក្នុងកម្មវិធីត្រូវតែអនុវត្តឱ្យបានត្រឹមត្រូវ និងខ្ជាប់ខ្ជួនតាមវិធានការ ៣ការពារ និង៣កុំ របស់សម្តេចតេជោសែន នាយករដ្ឋមន្ត្រីនិងវិធានការផ្សេងៗទៀត ដូចជាអ្នកចូលរួមត្រូវបង្ហាញប័ណ្ណចាក់វ៉ាក់សាំងការពារកូវីដ-១៩ និងបើនរណាម្នាក់មានកំដៅខុសប្រក្រតី ឬមានសុខភាពមិនល្អគឺត្រូវនាំគាត់ទៅមន្ទីរសុខាភិបាលដើម្បីពិនិត្យ។
សូមបញ្ជាក់ថា ព្រឹត្តិការណ៍មហោស្រពសិល្បៈអន្តរជាតិអង្គរ ដើម្បីអបអរសាទរក្រុងសៀមរាប ជាទីក្រុងវប្បធម៌អាស៊ានសម្រាប់ឆ្នាំ២០២០-២០២២ នៅខេត្តសៀមរាបនេះ មានកម្មវិធីជាច្រើន ដូចជា៖ មានពិធីសូត្រមន្តសម្ភោធនៅប្រាសាទចៅសាយទេវតា ,កម្មវិធីបង្ហោះខ្លែងឯកនៅមុខប្រាសាទអង្គរវត្ត ,ការតាំងពិព័រណ៍សិល្បៈទស្សនីយភាពនៅ FCC ,ការគូរគំនូរផ្ទាល់តាមដងផ្លូវនៅមាត់ស្ទឹង ,ការធ្វើបទបង្ហាញនៅសាលសន្និសីទនៅវត្តដំណាក់ ,សិប្បកម្មតម្បាញសូត្រនៅសារមន្ទីរវាយនភណ្ឌអាស៊ី , ការប្រកួតប្រជែងរបស់សហគមន៍ នឹងពិព័រណ៍ម្ហូបអាហារ ,ទិវាបេតិកភណ្ឌវប្បធម៌អរូបី ជាមួយអង្គការយូណេស្កូនៅប្រាសាទចៅសាយទេវតា ,ការបើកមជ្ឈមណ្ឌលសិល្បៈទស្សនីយភាពនៅ FCC ,ការបើកមជ្ឈមណ្ឌល writers-Readers នៅកន្លែងផ្សេងៗ នៅលើផ្លូវលេខ២៦ និង FCC MOCFAផងដែរ៕
អត្ថបទ និង រូបភាព៖ លោក យូ វង្ស
កែសម្រួល៖ អ៊ុន ណារាជ្យ
