នៅព្រឹកថ្ងៃទី០៨ ខែធ្នូ ឆ្នាំ២០២១ ឯកឧត្តម ទៀ សីហា អភិបាលខេត្តសៀមរាប បានអញ្ជើញជួបប្រជុំ និងចុះហត្ថលេខាលើកំណត់ត្រានៃកិច្ចពិភាក្សា នៃការអនុវត្តគម្រោងកិច្ចសហប្រតិបត្តិការបច្ចេកទេស សម្រាប់គម្រោងទីក្រុងឆ្លាតវៃ ជាមួយលោកស្រី Kamei Haruko (កាមេយ ហារូកុ) ប្រធានទីភ្នាក់ងារសហប្រតិបត្តិការអន្តរជាតិជប៉ុន (JICA) ប្រចាំប្រទេសកម្ពុជា ដោយមានការចូលរួមពីសំណាក់លោក លី សំរិទ្ធ អភិបាលរងខេត្ត រួមជាមួយលោកនាយករដ្ឋបាលសាលាខេត្ត អភិបាលក្រុង នាយកទីចាត់ការ អង្គភាពចំណុះសាលាខេត្ត និងប្រធានមន្ទីរអង្គភាពពាក់ព័ន្ធមួយចំនួនទៀត។
ឯកឧត្តម ទៀ សីហា បានបញ្ជាក់ថា បន្ទាប់ពីក្រុងសៀមរាប ត្រូវបានដាក់បញ្ចូលទៅក្នុងសមាជិកនៃបណ្តាញទីក្រុងឆ្លាតវៃអាស៊ាន កាលពីឆ្នាំ២០១៨កន្លងមកនេះ រដ្ឋបាលខេត្តសៀមរាប ក៏ដូចជារដ្ឋបាលក្រុងសៀមរាប បានធ្វើការរៀបចំផែនការក្នុងការបង្កើនការចំណាយសាធារណៈ និងការវិនិយោគទៅលើ ហេដ្ឋារចនាសម្ព័ន្ធក្នុងក្រុងសៀមរាប ដើម្បីបង្កលក្ខណៈងាយស្រួល សម្រាប់ការធ្វើដំណើររបស់ប្រជាពលរដ្ឋក្នុងក្រុង ការបង្កើនសោភ័ណ្ឌភាពក្នុងក្រុង ក៏ដូចជាចូលរួមក្នុងការអនុវត្តនូវផែនការអភិវឌ្ឍទីក្រុងឆ្លាតវៃអាស៊ាន សម្រាប់ក្រុងសៀមរាប នៃខេត្តសៀមរាប។
ឯកឧត្តម បានបញ្ជាក់ទៀតថា ដើម្បីសម្រេចបាននូវការកសាងទីក្រុងឆ្លាតវៃក្នុងក្រុងសៀមរាប ឲ្យស្របតាមផែនការទីក្រុងឆ្លាតវៃរបស់សមាគមបណ្តាញទីក្រុងឆ្លាតវៃអាស៊ាន រដ្ឋបាលខេត្តសៀមរាប បានដាក់ស្នើសុំជូនទៅទីភ្នាក់ងារសហប្រតិបត្តិការអន្តរជាតិជប៉ុន (JICA) ក្នុងការស្នើសុំគម្រោងកិច្ចសហប្រតិបត្តិការបច្ចេកទេស សម្រាប់រៀបចំទីក្រុងឆ្លាតវៃក្នុងក្រុងសៀមរាប នៃខេត្តសៀមរាប ឲ្យក្លាយជាទីក្រុងឆ្លាតវៃ កាលពីឆ្នាំ២០១៩កន្លងទៅ។ ការស្នើសុំគម្រោងកិច្ចសហប្រតិបត្តិការបច្ចេកទេសនេះ ទីភ្នាក់ងារសហប្រតិបត្តិការអន្តរជាតិជប៉ុន (JICA) ក៏បានទទួលយក នឹងបានបញ្ជូននូវក្រុមការងារសិក្សាស្រាវជ្រាវរបស់ខ្លួន មកធ្វើការសិក្សានៅក្នុងក្រុងសៀមរាបនៃខេត្តសៀមរាប ចាប់តាំងពីខែឧសភា ឆ្នាំ២០២០ កន្លងទៅ។ ក្នុងរយៈពេលមួយឆ្នាំជាង នៃការសិក្សាទិន្នន័យបឋមអំពីគម្រោងទីក្រុងឆ្លាតវៃក្នុងក្រុងសៀមរាបនេះ ក្រុមការងារសិក្សា ក៏បានរៀបចំជាសេចក្តីព្រាងផែនការមេចង្អុលផ្លូវ សម្រាប់ការរៀបចំក្រុងសៀមរាប នៃខេត្តសៀមរាបជាទីក្រុងឆ្លាតវៃ ដោយនៅក្នុងសេចក្តីព្រាងផែនការមេចង្អុលផ្លូវនេះ គឺផ្តោតលើផ្នែកសំខាន់ៗចំនួន០៤ គឺ ការរៀបចំទេសចរណ៍ឆ្លាតវៃ ,ការរៀបចំប្រព័ន្ធសន្តិសុខឆ្លាតវៃ ,ការរៀបចំប្រព័ន្ធចល័តឆ្លាតវៃ និងការរៀបចំប្រព័ន្ធគ្រប់គ្រង កាកសំណល់ឆ្លាតវៃ។
ឯកឧត្តមអភិបាលខេត្ត ជឿរជាក់ថា តាមរយៈកិច្ចខិតខំប្រឹងប្រែងរបស់ក្រុមការងារសិក្សាស្រាវជ្រាវ នៃទីភ្នាក់ងារសហប្រតិបត្តិការអន្តរជាតិជប៉ុនកន្លងមក ឯកឧត្តមសូមធ្វើការវាយតម្លៃខ្ពស់ និងអំណរគុណ ចំពោះក្រុមការងារទីភ្នាក់ងារសហប្រតិបត្តិការអន្តរជាតិជប៉ុន (JICA) បើទោះបីជាស្ថិតនៅក្នុងដំណាក់កាល នៃការរីករាលដាលនៃជំងឺកូវីដ-១៩ យ៉ាងណាក៏ JICA បានបញ្ជូនអ្នកជំនាញរបស់ខ្លួន មកធ្វើការសិក្សាស្រាវជ្រាវ ដើម្បីរៀបចំជាផែនការមេចង្អុលផ្លូវសម្រាប់ការកសាងទីក្រុងឆ្លាតវៃ ក្នុងក្រុងសៀមរាប រហូតបានចេញជាសេចក្តីព្រាងនាពេលនេះ។ តាមរយៈគម្រោងនេះ នឹងធ្វើឲ្យសមត្ថភាពមន្រ្តីរបស់រដ្ឋបាលខេត្ត និងរដ្ឋបាលក្រុងសៀមរាប បានពង្រីកឲ្យបានកាន់តែបានស៊ីជម្រៅថែមទៀត ពាក់ព័ន្ធទៅនឹងបច្ចេកវិទ្យា ទីក្រុងឆ្លាតវៃ រួមជាមួយនឹងប្រព័ន្ធបច្ចេកវិទ្យា និងការគ្រប់គ្រងបែបឆ្លាតវៃ នឹងពិតជាចូលរួមចំណែកអភិវឌ្ឍន៍ខេត្តសៀមរាបឲ្យបានកាន់តែល្អប្រសើរឡើងថែមទៀតផង។
មានប្រសាសន៍ក្នុងឱកាសនោះដែរលោកស្រី Kamei Haruko បានវាយតម្លៃខ្ពស់ និងអរគុណ ចំពោះអាជ្ញាធរខេត្ត និងក្រុងសៀមរាប ដែលកន្លងមកបានចូលរួមសហការបានយ៉ាងល្អ ក្នុងការពិភាក្សា និងស្វែងរកដំណោះស្រាយផ្សេងៗ ដើម្បីឲ្យយើងសម្រេចបាននូវការងារដ៏សំខាន់មួយនេះ។ បន្ទាប់ពីការចុះហត្ថលេខានេះរួច យើងនឹងចាប់ផ្ដើមនូវគម្រោងការងារនេះតែម្ដង ហើយចំពោះការងារទាំងអស់ យើងនឹងបន្តពិភាក្សាបន្ថែមទៀត ចំពោះចំនុចបញ្ហាដែលយើងជួបប្រទះនៅពេលអនុវត្ត ដើម្បីឲ្យការងារទាំងនោះអនុវត្តទៅប្រកបដោយប្រសិទ្ធភាព និងទទួលបានជោគជ័យដូចអ្វីដែលយើងរំពឹងទុក។ ជាមួយគ្នានោះលោកស្រី ជឿរជាក់ថា ខេត្តសៀមរាបនឹងក្លាយជាខេត្ត ក៏ដូចជាទីក្រុងគំរូនៃទីក្រុងឆ្លាតវៃ ដែលអាចបង្ហាញទៅដល់បណ្ដាប្រទេសផ្សេងៗនៅក្នុងតំបន់អាស៊ាន អាចយកធ្វើជាគំរូផងដែរ៕
អត្ថបទ និង រូបភាព៖ លោក អ៊ុន ណារាជ្យ
