នៅថ្ងៃទី០៩ ខែធ្នូ ឆ្នាំ២០២១លោក ពៅ ពិសិដ្ឋ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប រួមជាមួយលោក ចឹក គឹមជុន នាយករងរដ្ឋបាលសាលាខេត្ត, លោក ង៉ូវ សេងកាក់ប្រធានមន្ទីរទេសចរណ៍ខេត្ត, លោកទិព្វ ពិសិទ្ឋ នាយកទីចាត់ការផែនការ និងវិនិយោគ, លោក អ៊ឹង សុភ័ណ្ឌ នាយកទីចាត់ការអន្តរវិស័យ និងមន្ត្រីពាក់ព័ន្ធក្នុងសាលាខេត្ត មួយចំនួនទៀត បានទទួលជួបសម្តែងការគួរសម និងពិភាក្សាការងារ ជាមួយ លោក ហ្គាវ៉ាហ្គុជិ ប្រធានការិយាល័យកុងស៊ុលជប៉ុនប្រចាំខេត្តសៀមរាប និងសហការី ដើម្បីពង្រឹងនិងពង្រីកកិច្ចសហប្រតិបត្តិកាលើគ្រប់វិស័យឱ្យកាន់តែមានសន្ទុះទៅមុខជាបន្តទៀត។ នៅក្នុងជំនួបនេះធ្វើឡើង ក្នុងគោលបំណងស្វែងយល់អំពីវិធានការ និងនីតិវិធីរបស់រាជរដ្ឋាភិបាលកម្ពុជាជាពិសេសរដ្ឋបាលខេត្តសៀមរាប ក្នុងពេលបើកដំណើរការប្រទេស ដើម្បីទទួលភ្ញៀវទេសចរអន្តរជាតិឡើងវិញខណ:ពេលដែលការឆ្លងរាលដាលនៃជំងឺកូវីដ-១៩ ថយចុះជាបន្តបន្ទាប់។
លោក ហ្គាវ៉ាហ្គុជិ មានប្រសាសន៍ថា៖ ក្នុងពេលកម្ពុជា ត្រៀមបើកប្រទេសទទួលអ្នកទេសចរឡើងវិញ សម្រាប់ភ្ញៀវទេសចរជនជាតិជប៉ុន តើត្រូវមានកាតព្វកិច្ចដូចម្តេចខ្លះ ដូចជាមុនចូល និងក្រោយបញ្ចប់ទស្សនកិច្ចតាមរមណីយដ្ឋាននានានៅកម្ពុជា ពួកគាត់អាចយកសំណាករកលទ្ឋផលកូវីដ-១៩នៅទីណា តើតម្លៃប៉ុន្មានសម្រាប់សេវាធ្វើវិភាគលើសំណាកនោះ។
ក្នុងនាមអាជ្ញាធរខេត្ត និងរដ្ឋបាលខេត្ត លោក ពៅ ពិសិដ្ឋ បានពន្យល់តបនឹងសំណួរដ៏មានសារ:សំខាន់នេះ យ៉ាងពិស្តារតែតម្លៃប៉ុន្មានសម្រាប់សេវាធ្វើវិភាគលើសំណាកនោះនឹងជូនដំណឹងជាក់លាក់នៅពេលក្រោយ។ លោកអភិបាលរងខេត្ត មានប្រសសន៍ទៀតថា៖ ដើម្បីជាឱកាសសម្រាប់ត្រៀមលក្ខណ:ទទួលភ្ញៀវទេសចរជាតិ-អន្តរជាតិ រយ:ពេលវែង ក្រោមការដឹកនាំដ៏ត្រឹមត្រូវរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានផ្តល់គម្រោងស្ថាបនាហេដ្ឋារចនាសម្ព័ន្ធផ្លូវ ចំនួន ៣៨ខ្សែ ក្នុងក្រុងសៀមរាប ដែលការសាងសង់គ្រោងនឹងបញ្ចប់ចុងឆ្នាំនេះ។
ជាមួយគ្នានេះដែរ ដោយមានគោលការណ៍ណែនាំពីរាជរដ្ឋាភិបាល ក្រសួង ស្ថាប័នជំនាញ និងមានការយកចិតទុកដាក់របស់រដ្ឋបាលខេត្ត គណ:បញ្ជាការឯកភាពរដ្ឋបាលខេត្ត គណ:កម្មការប្រយុទ្ធនឹងជំងឺកូវីដ-១៩ មន្ទីរ-អង្គភាព រដ្ឋបាលក្រុង ស្រុក រដ្ឋបាលឃុំ-សង្កាត់ កងកម្លាំងសមត្ថកិច្ច និងអ្នកពាក់ព័ន្ធ រហូតមកដល់បច្ចុប្បន្ននេះ ការឆ្លងរាលដាលនៃជំងឺកូវីដ-១៩ នៅក្នុងខេត្តសៀមរាប ស្ថិតនៅក្រោមការគ្រប់គ្រងបានល្អប្រសើរ ដោយអត្រានៃការឆ្លង និងអត្រានៃការស្លាប់ស្ថិតនៅកម្រិតទាបបំផុត។ ជាមួយនោះអត្រានៃប្រជាពលរដ្ឋនៅក្នុងខេត្ត និងអ្នកបម្រើការនៅតាមអាជីវកម្មទេសចរណ៍ និងជាពិសេស ប្រជាពលរដ្ឋក្នុងខេត្ត បានទទួលការចាក់វ៉ាក់សាំងសម្រេចបានរហូតដល់ប្រមាណ៩៦% នៃប្រជាជនសរុប។
លោក ពៅ ពិសិដ្ឋ ក៏បានលើកឡើង ពីទំនាក់ទំនងសហប្រតិបត្តិការដ៏ល្អរវាងខេត្តមួយចំនួន នៃប្រទេសជប៉ុន ជាមួយនឹងខេត្តសៀមរាប ដែលបានចុះអនុស្សរណ:ជាមួយគ្នា នាពេលកន្លងមកផងដែរ។ ជាមួយនោះជប៉ុនធ្លាប់បានផ្តល់ម៉ាស៊ីនពន្លត់អគ្គីភ័យចំនួន ២គ្រឿងតាមរយ:សាកលវិទ្យាល័យ WASEDA ដើម្បីគ្រប់គ្រងគ្រោះអគ្គីភ័យនៅតំបន់ផ្សារចាស់។ ជំនួយពីរាជរដ្ឋាភិបាលជប៉ុន ដើម្បីកសាងហេដ្ឋារចនាសម្ព័ន្ធផ្លូវជាតិលេខ៦ក្នុងក្រុងសៀមរាប ទៅស្រុកប្រាសាទបាគង។ ជប៉ុនជួយជួសជុលប្រាសាទបុរាណរួមមាន ប្រាសាទបាយ័ន និងប្រាសាទអង្គរវត្ត, សាងសង់មន្ទីរពេទ្យកុមារអង្គរ, ជំនួយឧបត្ថម្ភដល់សាលារៀន ព្រមទាំងជួយបណ្ដុះបណ្ដាលផ្នែក ធនធានមនុស្ស តាមរយ:ទីភ្នាក់ងារសហប្រតិបត្តិការអន្តរជាតិជប៉ុន (JICA) និងការជួយកសាងប្លង់គោលប្រើប្រាស់ដីធ្លីក្រុងសៀមរាប។ល។ ហើយថ្មីៗនេះដែរ រាជរដ្ឋាភិបាលជប៉ុន បានផ្តល់អំពូលភ្លើងបំភ្លឺផ្លូវសាធារណ:ប្រភេទ LED ចំនួន២,៤៥០គ្រាប់ ដែលកំពុងប្រតិបត្តិការ លើផ្លូវសំខាន់ៗក្នុងខេត្ត តាមរយ: ក្រុមហ៊ុន Minibea។ គម្រោងពង្រីកសមត្ថភាពប្រព័ន្ធផ្គត់ផ្គង់ទឹកស្អាតសៀមរាប ក្រោមឥណទានរបស់ JICA មានទឹកប្រាក់វិនិយោគសរុបប្រមាណ ៩០លានដុល្លាអាមេរិក គ្របដណ្តប់លើការងារសាងសង់រោងចក្រប្រព្រឹត្តកម្ម ទឹកស្អាតថ្មីមួយទៀត ដែលមានសមត្ថភាពផលិត ៦០,០០០ម៉ែត្រត្រីគុណ និងការសាងសង់បំពង់មេនាំទឹក និងចែកចាយទឹកស្អាត ប្រវែងសរុប ១៩៦គីឡូម៉ែត្រ។
សូមបញ្ជាក់ថា៖ ទាក់ទងទៅនឹងការងារសហប្រតិបត្តិការកម្ពុជា-ជប៉ុន ខេត្តសៀមរាប បានចងសម្ព័ន្ឋមេត្រីភាពជាមួយខេត្តក្រុងចំនួន៣ នៃប្រទេសជប៉ុនក្នុងនោះរួមមានក្រុងកូតា នៃខេត្តអាយឆិ ដោយបានចុះហត្ថលេខារួមគ្នា កាលពីខែវិច្ឆិកា ឆ្នាំ២០១០។ ខេត្តណាហ្គាវ៉ា បានចុះហត្ថលេខានៅខែវិច្ឆិកា ឆ្នាំ២០១៥ និងក្រុងកូម៉ាត់ស៊ុយ បានចុះហត្ថលេខារួមគ្នាលើលិខិតផ្តួចផ្តើម ស្តីពីការបង្កើតសម្ព័ន្ឋមេត្រីភាពកាលពីខែតុលា ឆ្នាំ២០១៦ ដោយផ្តោតសំខាន់លើវិស័យកសិកម្ម អប់រំសង្គមកិច្ច សុខាភិបាល ការងាររដ្ឋបាលសាធារណ: វិស័យវប្បធម៌ សេដ្ឋកិច្ច បរិស្ថាននិងទេសចរណ៍៕
អត្ថបទ និងរូបភាព: លោកយូ វង្ស និងលោកងិន គីមឡេង
កែសម្រួលដោយ លីវ សុខុន
