ឯកឧត្តម ឡុង កុសល អគ្គនាយករង និងជាអ្នកនាំពាក្យ អាជ្ញាធរជាតិអប្សរា បានឲ្យដឹងថា អាជ្ញាធរជាតិអប្សរា គ្រោងរៀបចំពិធីរំលឹកគុណអង្គរ ក្នុងរយៈពេល៥ថ្ងៃ ចាប់ពីថ្ងៃទី១២ដល់ថ្ងៃទី១៦ខែធ្នូឆ្នាំ២០២១ខាងមុខនេះ នៅមុខប្រាសាទអង្គរវត្ត ក្នុងគោលបំណងដើម្បីរំលឹកគុណដល់បុព្វការីជន ព្រះមហាក្សត្រជំនាន់មុនៗ ដែលបានកសាងសំណង់ប្រាសាទជាច្រើនក្នុងរមណីយដ្ឋានអង្គរ ដើម្បីជាសារប្រយោជន៍សម្រាប់សង្គមជាតិរហូតដល់បច្ចុប្បន្ន និងជាការបង្ហាញពីការងារ និងសមិទ្ធផលការងារទូទៅដែលអាជ្ញាធរជាតិអប្សរាសម្រេចបាន ក្នុងបំណងដើម្បីកិច្ចការអភិរក្សប្រាសាទ ដែលជាមរតកដ៏សំខាន់សម្រាប់ប្រជាជាតិយើង។
ឯកឧត្តម ឡុង កុសល បានឲ្យដឹងទៀតថា ពិធីរំលឹកគុណអង្គរនេះ នឹងក្លាយជាព្រឹត្តិការណ៍ប្រចាំឆ្នាំ ដោយចាប់ផ្ដើមពីឆ្នាំ២០២២ តទៅ សម្រាប់ជាប្រយោជន៍ដល់កូនខ្មែរយើងជំនាន់ក្រោយៗ បានឈ្វេងយល់ពីកិច្ចការគាំពារប្រាសាទបុរាណ ដែលជាស្នាដៃដូនតាខ្មែរ ជាពិសេសនៅក្នុងពិធីរំលឹកគុណអង្គរនេះ ក៏មានការរៀបចំឱ្យមានការរៀបចំបង្ហាញពីពិធីសាសនា សម្ដែងសិល្បៈ ល្ខោននបាសាក់ ល្ខោនស្បែកធំ វប្ប និងមានការតាំងពិព័រណ៍ស្នាដៃផ្សេងៗ ដែលកូនខ្មែរបានធ្វើកន្លងមក ។
ឯកឧត្ដម បានបន្ដថា ព្រឹត្តិការណ៍នេះ ក៏នឹងបើកឱកាសដល់សាធារណជន អាចចុះឈ្មោះ ដើម្បីទស្សនកិច្ចស្វែងយល់នៅតាមការដ្ឋានការងារជួសជុលប្រាសាទនានាដែលអាជ្ញាធរជាតិអប្សរាកំពុងដំណើរការផងដែរ ហើយសាធារណជន អាចដឹងកាន់តែច្បាស់ពីកិច្ចការងារទាំងនោះ និងគោលបំណងលើការងារអភិរក្ស និងអភិវឌ្ឍន៍រមណីយដ្ឋានអង្គរប្រកបដោយនិរន្តរភាព ៕
អត្ថបទ និង រូបភាព ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
