ក្នុងឱកាសជួបប្រជុំជាមួយក្រុមការងារពិនិត្យ និងស្រាវជ្រាវការកាប់ទន្រ្ទានព្រៃលិចទឹក និងកាន់កាប់ដីដោយខុសច្បាប់នៅតំបន់បឹងនៅក្នុងក្រឡាញ់ កាលពីថ្ងៃទី០៨ ខែធ្នូ ឆ្នាំ២០២១ម្សិលមិញនេះ លោក ពៅ ពិសិដ្ឋ អភិបាលរងខេត្ត និងជាប្រធានក្រុមការងារទី២ ទទួលបន្ទុកស្រុកក្រឡាញ់ នៃក្រុមការងារពិនិត្យ និងស្រាវជ្រាវការកាប់ទន្រ្ទានព្រៃលិចទឹក និងកាន់កាប់ដីដោយខុសច្បាប់នៅតំបន់បឹងទន្លេសាប ស្ថិតក្នុងភូមិសាស្រ្តខេត្តសៀមរាប បានមានប្រសាសន៍ថា ដើម្បីអនុវត្តតាមបទបញ្ជារបស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា ឲ្យកាន់តែមានប្រសិទ្ធភាពនោះ រដ្ឋបាលខេត្តបានបង្កើតក្រុមការងារថ្នាក់ខេត្តទទួលបន្ទុកអនុវត្តការងារតាមបណ្តាក្រុង-ស្រុក ទាំង០៦ ដែលជាប់នឹងបឹងទន្លេសាប ដោយក្រុមការងារនីមួយៗដឹកនាំដោយលោក លោកស្រី ជាអភិបាលរង នៃគណៈអភិបាលខេត្ត ការអនុវត្តតាមបទបញ្ជារបស់សម្តេចតេជោ ហ៊ុន សែន គឺត្រូវធ្វើឲ្យបានហ្មត់ចត់ និងឆាប់រហ័ស ព្រមទាំងស្វែងរករាល់ជនល្មើសដែលបានកាប់បំផ្លិញបំផ្លាញព្រៃលិចទាំងនេះ ហើយត្រូវដកហូតមកធ្វើជាកម្មសិទ្ធរបស់រដ្ឋ ព្រមទាំងដាំដើមឈើទាំងនោះឡើងវិញ ដើម្បីជាជម្រកត្រីពងកូន ។
លោក ពៅ ពិសិដ្ឋ មានប្រសាសន៍ទៀតថា ដើម្បីទប់ស្កាត់ឲ្យបានទាន់ពេលវរលាសម្រាប់ភូមិសាស្ត្រក្នុងស្រុកក្រឡាញ់នេះ សូមឲ្យអាជ្ញាធរគ្រប់លំដាប់ថ្នាក់ត្រូវធ្វើការផ្សព្វផ្សាយដល់ប្រជាពលរដ្ឋឱ្យឈប់ជាបន្ទាន់នូវរាល់សកម្មភាពដែលប៉ះពាល់ដីព្រៃលិចទឹកនៅក្នុងតំបន់៣ ព្រោះថា ការកាប់ទន្ទ្រានព្រៃលិចទឹក ដើម្បីយកដីធ្វើកម្មសិទ្ធ ឬដើម្បីអាស្រ័យផល គឺជាអំពើខុសច្បាប់ ហើយចំពោះអាជ្ញាធរឃុំ ភូមិ ណាដែលបានបញ្ជក់លើលិខិតសុំកាន់កាប់ដី និងលិខិតផ្ទេរសិទ្ធកាន់កាប់ដី នៅក្នុងតំបន់ព្រៃលិចទឹក ត្រូវចេញសេចក្តីសម្រេចមួយ ដោយត្រូវមោឃៈចោលវិញឱ្យបានលឿន ពិសេសត្រូវបន្តចុះស្រាវជ្រាវរកបុគ្គលដែល ពាក់ព័ន្ធការទន្រ្ទានដីព្រៃលិចទឹកដែលបានកើតឡើងថ្មីៗ ដោយត្រូវកំណត់អត្តសញ្ញាណ កំណត់ទំហំផ្ទៃដី ឱ្យបានច្បាស់លាល់ ព្រមទាំងត្រូវទប់ស្កាត់ប្រជាពលរដ្ឋមិនឱ្យចូលទៅធ្វើការដាំដុះនៅក្នុងតំបន់៣ឡើយចាប់ពីពេលនេះតទៅ ។
សូមបញ្ជាក់ថា នៅក្នុងភូមិសាស្រ្តខេត្តសៀមរាប មានក្រុង-ស្រុកចំនួន០៦បានជាប់នៅបឹងទន្លេសាបក្នុងនោះមាន ស្រុកក្រឡាញ់ ស្រុកពួក ក្រុងសៀមរាប ស្រុកប្រាសាទបាគង ស្រុកសូទ្រនិគម និងស្រុកជីក្រែង ដែលមានផ្ទៃដីសុរបជាង១២៦ពាន់ហិកតា ខណៈបច្ចុប្បន្ននេះអាជ្ញាធរពាក់ព័ន្ធកំពុងតែបន្តចុះស្រាវជ្រាវរកបុគ្គលដែល ពាក់ព័ន្ធការទន្រ្ទានដីព្រៃលិចទឹកដែលបានកើតឡើងថ្មីៗ ដោយត្រូវកំណត់អត្តសញ្ញាណ កំណត់ទំហំផ្ទៃដី ដែលបានរំលោភយកដី និងយកដីប្រគល់ជូនរដ្ឋវិញ៕
គួររំលឹកថា កាលពីថ្ងៃទី២៨ ខែវិច្ឆិកា ឆ្នាំ២០២១នេះ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានចេញបទបញ្ជាយ៉ាងម៉ឺងម៉ាត់មួយ ឱ្យក្រសួងស្ថាប័នពាក់ព័ន្ធ និងអភិបាលខេត្តជាប់បឹងទន្លេសាប ត្រូវធ្វើការទប់ស្កាត់ និង បង្រ្កាបជាបន្ទាន់ ចំពោះការលួចកាប់ព្រៃលិចទឹក និងវាទទីយកដីនៅតាមបឹងទន្លេសាប ព្រមទាំងបានស្នើដល់ឯកឧត្តមឱម យ៉ិនទៀង ប្រធានអង្គភាពប្រឆាំងអំពើពុករលួយ ដឹកនាំកម្លាំងដើម្បីចុះស្រាវជ្រាវរកមន្រ្តីណាខ្លះ ដែលមានការពាក់ព័ន្ធជាមួយនឹងការកាប់ទន្ទ្រានយកដីបឹងទន្លេសាបនេះ ដើម្បីរៀបចំសំណុំរឿងបញ្ជូនទៅតុលាការដើម្បីកាត់ទោសទាំងអស់ ៕
អត្ថបទ និង រូបភាព ៖ លោក ឃុត សៅ
កែសម្រួលអត្ថបទ ៖ លោក លីវ សាន្ត
