កាលពីរសៀលថ្ងៃទី១២ ខែធ្នូ ឆ្នាំ២០២១ម្សិលមិញនេះ នៅបរិវេណខាងមុខប្រាសាទភ្នំបាខែង មានរៀបចំពិធីក្រុងពាលី ដើម្បីប្រារព្ធពិធីបុណ្យដឹងគុណមហាវីរៈដូនតា ក្រោមការផ្ដួចផ្ដើមឡើងដោយមានសទ្ធាជ្រះថ្លារបស់លោកជំទាវឧកញ៉ា នាងវិសាខា អគ្គមហាឧបាសិកា ពុទ្ធសាសនឧបត្ថម្ភកិត្តិបណ្ឌិត សៀង ចាន់ហេង អគ្គនាយិកាក្រុមហ៊ុន ហេង អភិវឌ្ឍន៍ សហការជាមួយអាជ្ញាធរជាតិអប្សរា។ ពិធីនេះប្រព្រឹត្តិទៅក្រោមការនិមន្តចូលរួមរបស់ព្រះសង្ឃ និងអញ្ជើញចូលរួមពីសំណាក់ លោកជំទាវឧកញ៉ា នាងវិសាខា អគ្គមហាឧបាសិកា ពុទ្ធសាសនឧបត្ថម្ភកិត្តិបណ្ឌិត សៀង ចាន់ហេង អគ្គនាយិកាក្រុមហ៊ុន ហេង អភិវឌ្ឍន៍ និង ឯកឧត្តម ហង់ ពៅ អគ្គនាយកអាជ្ញាធរជាតិអប្សរា ព្រមទាំងឯកឧត្តម លោកជំទាវ លោក លោកស្រី ជាមន្រ្តីរាជការ កងកម្លាំងប្រដាប់អាវុធ និងប្រជាពលរដ្ឋជាច្រើនរូបទៀត។
លោកជំទាវឧកញ៉ា សៀង ចាន់ហេង មានប្រសាសន៍ថា គោលបំណងនៃការរៀបចំពិធីនេះ គឺដើម្បីរំលឹកនឹកដល់គុណបុណ្យមហាវីរ:ដូនតា ដែលជាបុព្វបុរសបានបន្សល់នៅសម្បត្តិបីតិកភណ្ឌពិភពលោកដ៏ល្បីល្បាញកន្លងមក និង បួងសួងសុំឲ្យប្រទេសជាតិមានសុខសន្តិភាព ជាពិសេស គឺសម្ដែងនូវការដឹងគុណ ដែលប្រជាពលរដ្ឋខ្មែរទូទាំងប្រទេសមិនអាចបំភ្លេចបានឡើយនូវគុណូបការៈដ៏មហាធំធេងរបស់សម្ដេចតេជោ ក្នុងការស្វែងរកសុខសន្តិភាព ការអភិវឌ្ឍន៍ប្រទេសជាតិ និងការដោះស្រាយដោយ សន្តិវិធីនូវបញ្ហានយោបាយជាតិធំៗជាច្រើន នាំមកនូវសន្តិភាព ការអភិវឌ្ឍន៍ ជូនជាតិមាតុភូមិ ព្រមទាំងធ្វើឲ្យ កិត្យានុភាពនៃព្រះរាជាណាចក្រកម្ពុជាកាន់តែល្បីល្បាញទាំងក្នុងតំបន់ និងនៅលើឆាកអន្តរជាតិ តាមរយៈ នយោបាយការបរទេសដ៏ប៉ិនប្រសប់ និងទន់ភ្លន់ជាមួយប្រទេសជិតខាងភូមិផងរបងតែមួយ និងបណ្តាប្រទេសជា មិត្តនៅលើពិភពលោក ។
លោកជំទាវឧកញ៉ា សៀង ចាន់ហេង មានប្រសាសន៍ថា ពិធីនេះ ក៏មានការបួងសួង និងឧទ្ទិសដល់គុណបុណ្យព្រះរតនត្រ័យ និងវត្ថុស័ក្តិសិទ្ធិទាំងឡាយក្នុងលោក សូមជួយប្រោះព្រំពរជ័យជូន សម្តេចតេជោ និង សម្ដេចកិត្តិព្រឹទ្ធបណ្ឌិត ព្រមទាំងបុត្រា បុត្រី ចៅប្រុស ចៅស្រី និងក្រុមគ្រួសារឲ្យបានជួបប្រទះតែនឹងពុទ្ធពរ ទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។
គួររំលឹកថា ពិធីក្រុងពាលី ដើម្បីប្រារព្ធពិធីបុណ្យដឹងគុណមហាវីរៈដូនតានៅបរិវេណខាងមុខប្រាសាទភ្នំបាខែងនេះ មានរយៈពេល២ថ្ងៃ គឺថ្ងៃទី១២ និងថ្ងៃទី១៣ ខែធ្នូ ឆ្នាំ២០២១ ដោយមានកម្មវិធីជាច្រើនទៀត ដូចជា ៖ ពិធីបួងសួងលើប្រាសាទភ្នំបាខែង , ការសម្ដែងសិល្បៈ ឬល្បែងប្រជាប្រិយតាមទំនៀមទំលាប់ , ពិធីអញ្ជើញស្នងបារមីសម្ដែងរឹទ្ធិ ជាដើម៕
អត្ថបទ និង រូបភាព ៖ លោក ស៊ាន សុផាត
កែសម្រួលដោយ ៖ លោក លីវ សាន្ត
