កាលពីរសៀលថ្ងៃទី១២ ខែធ្នូ ឆ្នាំ២០២១ សមាគមមត៌កព្រះពុទ្ឋសាសនា និងសង្គមដឹកនាំដោយព្រះតេជគុណ រតនឃោសកោ សោម សេរីឬទ្ឋី នាយកប្រតិបត្តិសមាគម សហការជាមួយព្រះចៅអធិការវត្តប្រាសាទលលៃ សមត្ថកិច្ច និងអាជ្ញាធរមូលដ្ឋាន បានរៀបចំវេទិកានេះឡើង នៅសាលាបឋមសិក្សាលលៃ ស្ថិតក្នុងភូមិលលៃ ឃុំបាគង ស្រុកប្រាសាទបាគង ខេត្តសៀមរាប ក្រោមព្រះអធិបតីភាព ព្រះបវរវិជ្ជា ទេព ភឿន ព្រះរាជាគណ:ថ្នាក់កិត្តិយសព្រះវិន័យធរគណខេត្ត ជាព្រះអនុគណស្រុកជីក្រែង និងជាព្រះចៅអធិការវត្តបុព្វទិសារាមហៅវត្តកំពង់ក្តី និងវត្តមាន ចូលរួមពីអធិការ នៃអធិការដ្ឋានស្រុក មន្ត្រីការិយាល័យអប់រំស្រុក មន្ត្រីការិយាល័យធម្មការស្រុក អាជ្ញាធរភូមិ ឃុំ និងលោកគ្រូអ្នកគ្រូ ជាច្រើនរូបទៀតផងដែរ។
បើតាមព្រះតេជគុណ រតនឃោសកោ សោម សេរីឬទ្ឋី បានមានសង្ឃដីកាថា វេទិកានេះរៀបចំឡើង ក្នុងគោលបំណងបញ្ជ្រាព្រះធម៌របស់ព្រះសម្មាសម្ពុទ្ធ និងការអប់រំសិស្សតាមសាលារៀន ដើម្បីកាត់បន្ថយជាអតិបរមានូវភាពវិនាសអន្តរាយ ដោយសារឥទ្ធិពលគ្រឿងញៀន និងគ្រោះថ្នាក់ចរាចរណ៍។ បន្ថែមពីនេះ ចង់ឱ្យកុមារតូចៗចេះ និងយល់ដឹងពីរបៀបថ្វាយបង្គំព្រះ ការយល់ដឹងពីសុជីវធម៌ ការសំពះ និងជំរាបសួរគោរពប្រតិបត្តិទៅកាន់ចាស់ទុំ លោកយាយ លោកតា ម្តាយឱពុក អ៊ុពូមីងមា គ្រូបាអាចារ្យជាដើម ដើម្បីឱ្យពួកគាត់ ស្គាល់អំពីប្រពៃណីទំនៀមទំលាប់របស់ខ្មែរ។ ការបង្រៀនពីវ័យកុមារភាពទៅ ដើម្បីផ្សារភ្ជាប់សកម្មភាព រវាងព្រះសង្ឃជាមួយនឹងសិស្សានុសិស្សឱ្យមានភាពស្និតស្នាល ក្នុងន័យជួយលើកទឹកចិត្តដល់សិស្សានុសិស្សឱ្យយកចិត្តទុកដាក់សិក្សារៀនសូត្រ ក៏ដូចជាដើម្បីបណ្តុះគុណធម៌ ចរិយាធម៌ដល់ ពួកគាត់ ជាទំពាំងស្នងឬស្សី នាពេលអនាគត។
មានសង្ឃដីកាក្នុងវេទិកានេះដែរ ព្រះបវរវិជ្ជា ទេព ភឿន ព្រះវិន័យធរគណខេត្ត បានបង្ហាញការគាំទ្រ និងបានចាត់ទុកការរៀបចំវេទិកាអប់រំសីលធម៌តាមលំអានព្រះពុទ្ឋសាសនា ភ្ជាប់ជាមួយនូវការផ្តល់ជូនដល់សិស្សានុសិស្សនូវសម្ភារសិក្ខូបករណ៍ថាជាការជួយលើកទឹកចិត្ត និងជំរុញឱ្យពួកគាត់ខិតខំរៀនសូត្រ និងចេះពីរបៀបគួរសមជាមួយចាស់ទុំ ត្រកូលរៀមច្បងផងដែរ។ នេះក៏ជាការបញ្ជាក់កាន់តែច្បាស់ថា រាជរដ្ឋាភិបាលកម្ពុជា បានផ្តល់តួនាទីយ៉ាងសំខាន់របស់ព្រះពុទ្ឋសាសនាក្នុងសង្គមខ្មែរ តាំងពីអតីតកាលរហូតដល់បច្ចុប្បន្ន និងទៅអនាគត ហើយបានចែងក្នុងរដ្ឋធម្មនុញ្ញថា ព្រះពុទ្ឋសាសនាជាសានារបស់រដ្ឋ។ ការផ្សព្វផ្សាយ និងលើកតម្កើងការអប់រំតាមបែបព្រះពុទ្ឋសាសនា បានជួយបង្កើនគំនិត បណ្តុះគុណធម៌ សីលធម៌ ចរិយាធម៌ ដល់កូនចៅយើងតាមបែបសន្តិភាព។ ព្រះវិន័យធរគណខេត្ត បានជំរុញដល់កុមារា កុមារីឱ្យខិតខំសិក្សារៀនសូត្រ ចេះស្តាប់បង្គាប់ឪពុកម្តាយ លោកគ្រូអ្នកគ្រូ និងចូលរួមជួយក្នុងការសំអាត អនាម័យសាលារៀនផ្ទះសម្បែងជាដើមផងដែរ។
ជាមួយគ្នានោះ ព្រះតេជគុណ បានសំណូមពរដល់ព្រះសង្ឃ និងប្រជាពុទ្ឋបរិស័ទគ្រប់ទីកន្លែង កុំភ្លេចជំងឺកូវីដ-១៩ ថ្វីបើរាជរដ្ឋាភិបាល បានបើកប្រទេសឡើងវិញក្តី តែជំងឺនេះមិនទាន់ទៅណាឆ្ងាយពីពិភពលោកនោះទេ បញ្ហានេះទាមទារឱ្យមានការប្រុងប្រយ័ត្ន និងបង្ការទប់ស្កាត់ទាំងអស់គ្នា គប្បីនាំគ្នាអនុវត្តឱ្យបានខ្ជាប់ខ្ជួន នូវសេចក្តីអំពាវនាវរបស់ក្រសួងសុខាភិបាល និងវិធសនការ ៣កុំ ៣ការពាររបស់សម្តេចតេជោ ហ៊ុន សែន នាយករដ្ឋមន្ត្រី។
សូមជម្រាបថា សម្ភារសិក្សាបានផ្តល់ជូនដល់សិស្សមត្តេយ្យ កំរិតខ្ពស់ កំរិតមធ្យមចំនួន ៥៤នាក់រួមមាន៖ សៀវភៅ ៣ក្បាល ខ្មៅដៃ១ បន្ទាត់១ និងដែកខួង១ ថ្នាក់ទី១ ទី២ ទី៣ ទទួលបាន សៀវភៅ ៤ក្បាល ប៊ិច២ដើម(ខៀវ១ ក្រហម១) ខ្មៅដៃ១ បន្ទាត់១ និងដែកខួង១។ សិស្សថ្នាក់ទី៤ ទី៥ ទី៦ ទទួលបាន÷ សៀវភៅ ៥ក្បាល ប៊ិច២ដើម(ខៀវ១ ក្រហម១) ខ្មៅដៃ១ បន្ទាត់១ និងដែកខួង១។ លោកនាយក ទទួលបាន កាដូរ អនុស្សាវរីយ៍មាន÷ សៀវភៅកំណត់ហេតុ ប៊ិច និងថវិកាចំនួន៥០,០០០៛។លោកគ្រូ អ្នកគ្រូ ចំនួន ១០នាក់ ទទួលបានកាដូរ អនុស្សាវរីយ៍មាន៖ សៀវភៅកំណត់ហេតុ ប៊ិច និងថវិកាចំនួន ៣០,០០០៛។សូមជំរាបថា៖ សមាគមមត៌កព្រះពុទ្ធសាសនា និងសង្គម បានចុះបញ្ជីជាផ្លូវការដោយក្រសួងធម្មការ និងសាសនានៅ ខែកុម្ភ: ឆ្នាំ២០១៩។ ក្រោយមកបានធ្វើសកម្មភាពផ្សព្វផ្សាយ និងអប់រំដល់សិស្សានុសិស្សតាមសាលារៀននានា គ្រប់កំរិត ប្រឹក្សាយោបល់ដល់ពុទ្ធសាសនខេមជនគ្រប់ទិសទី និងវប្បធម៌ចែករំលែកបទពិសោធទៅវិញទៅមក។ ដោយរៀបចំវេទិកាអប់រំសីលធម៌ និងឧបត្ថម្ភសិក្ខូបករណ៍ ដល់សិស្សានុសិស្សតាមសាលានានា សរុបមកដល់ពេលនេះបាន១៤លើក។ ជារឿយៗតែងតែជួយជ្រោមជ្រែង និងលើកទឹកចិត្តដល់សិស្សានុសិស្ស ដែលមានជីវភាពលំបាកដោយការឧបត្ថម្ភជាថវិកា និងសម្ភារផ្សេងៗ ផ្តល់ជាទេយ្យទានជូនដល់ចាស់ជរា និងគ្រួសារក្រីក្រដែលកំពុងជួបការលំបាកក្នុងជីវភាព៕
អត្ថបទ និងរូបភាព៖ លោក យូ វង្ស
កែសម្រួល៖ លីវ សុខុន
